KAMAPIM KLIA OL VES BILONG BAIBEL

Matyu 6:33—“Yupela i Mas Painim Pastaim Kingdom Bilong God”

PLEI

“Wok yet long painim Kingdom pastaim na stretpela pasin bilong God na em bai givim olgeta dispela samting long yupela.”—Matyu 6:33, Nupela Taim Trenslesen.

“Tasol yupela i mas painim pastaim kingdom bilong God, na stretpela pasin bilong Em. Na olgeta dispela samting bai God i skruim i go long yupela.”—Matyu 6:33, King Jems Pisin Baibel.

Mining Bilong Matyu 6:33

Kingdom Bilong God em wanpela gavman i stap long heven na dispela gavman bai kamapim laik bilong God long graun. (Matyu 6:9, 10) Man i soim olsem em i painim Kingdom pastaim taim em i putim Kingdom i stap olsem namba wan samting long laip bilong em. a Na tu, em i gat laik tru long kisim save long Kingdom Bilong God na tokim ol narapela long ol gutpela samting Kingdom bai kamapim. (Matyu 24:14) Man i painim Kingdom bai beten tu olsem dispela Kingdom i mas i kam.—Luk 11:2.

Stretpela pasin bilong God i makim tu ol lo bilong em long wanem samting i stret na wanem samting i no stret. (Buk Song 119:172) Olsem na man i soim olsem em i painim stretpela pasin bilong God taim em i bihainim ol lo bilong God long wanem pasin i stret na i no stret, em ol lo we i save helpim man long olgeta taim.—Aisaia 48:17.

Dispela hap tok givim olgeta dispela samting long yupela em i wanpela tok promis olsem God bai givim ol samting ol man i nidim, em ol man husat i putim Kingdom na ol lo bilong em i stap namba wan long laip bilong ol.—Matyu 6:31, 32.

Ol Tok i Stap Paslain na Bihain Long Matyu 6:33

Jisas i mekim ol dispela tok taim em i mekim tok em ol man i kolim olsem Bikpela Tok Long Maunten, we i stap long Matyu sapta 5-7. I klia tru olsem planti bilong ol manmeri i putim yau long tok bilong Jisas long dispela taim em ol lain i stap rabis. Ating ol inap pilim olsem ol i mas lusim taim na strong bilong ol long kisim gutpela sindaun, na ol i lusim liklik taim tasol long painim Kingdom pastaim. Tasol Jisas i kirapim ol long lukim hau God i save lukautim ol plaua na ol animal em i wokim. Na tu, God i promis long lukautim ol manmeri husat i painim Kingdom pastaim.—Matyu 6:25-30.

Tingting Kranki Bilong Ol Man Long Matyu 6:33

Tingting kranki: Man i painim Kingdom pastaim bai i gat planti mani kago.

Tok tru: Jisas i tok ol man i painim Kingdom pastaim bai kisim ol samting ol i nidim, olsem kaikai na klos samting. (Matyu 6:25, 31, 32) Tasol em i no promis olsem man bai kisim planti mani kago, na tu, em i no tok olsem man i gat planti mani kago i soim olsem God i blesim em. Tasol Jisas i tok lukaut long ol manmeri i putim yau long em long ol i no ken tingting long bungim mani kago, bikos dispela inap mekim na man i hatwok long painim Kingdom pastaim. (Matyu 6:19, 20, 24) Aposel Pol i bin wok strong tru long sapotim Kingdom Bilong God, maski i olsem, sampela taim em yet i sot long ol samting. Olsem Jisas, em i givim tok lukaut long ol narapela long hevi we inap kamap long man husat i taitim bun long kisim planti mani kago.—Filipai 4:11, 12; 1 Timoti 6:6-10.

Tingting kranki: Ol Kristen i no ken wok bilong lukautim ol yet.

Tok tru: Baibel i tok ol Kristen i mas wok bilong lukautim ol yet na ol famili bilong ol. (1 Tesalonaika 4:11, 12; 2 Tesalonaika 3:10; 1 Timoti 5:8) Jisas i no tok olsem ol disaipel bilong em i mas painim Kingdom tasol, nogat, em i tok ol i mas painim Kingdom pastaim.

Ol manmeri husat i painim Kingdom pastaim na ol i mekim wok bilong lukautim ol yet, ol i ken bilip olsem God bai helpim ol long kisim ol samting ol i nidim.—1 Timoti 6:17-19.

a “Wok yet long painim” em hap tok ol i trensletim long wanpela tok Grik i makim olsem man i wok yet long mekim, na ol inap trensletim dispela hap tok olsem “painim yet i go.” Olsem na Kingdom em samting man i mas putim i stap namba wan long laip olgeta bilong em na i no samting bilong mekim insait long sampela o sotpela haptaim tasol.