“Maski mi wokabaut long veli i tudak nogut tru, mi no pret long wanpela samting. Long wanem, yu stap wantaim mi; Stik bilong yu long was long sipsip i mekim isi bel bilong mi.”​—Buk Song 23:4, Nupela Taim Trenslesen.

 “God, maski mi wokabaut long ples nogut na bikpela tudak, mi no ken pret long samting nogut, long wanem, yu stap wantaim mi. Mi lukim yu i holim stik ol wasman bilong sipsip i save holim, olsem na bel bilong mi i stap isi. Mi no inap bagarap.”​—Buk Song 23:4, Buk Baibel.

 God i save banisim na lukautim ol man i lotuim em—em i mekim olsem tu taim ol bikpela hevi i painim ol. Baibel i mekim tok piksa long sipsip i stap aninit long lukaut bilong wasman bilong sipsip bilong soim hau God i save lukautim ol man i lotuim em. b Ol i no pilim wanpis taim ol hevi i painim ol, em ol hevi ves i kolim olsem tudak na dai inap painim man. Ol i no pret, i olsem God i stap wantaim ol.

 Long taim bilong ol man bilong raitim Baibel, wasman bilong sipsip i save yusim stik long lukautim sipsip long ol wel animal. Na tu, wasman bilong sipsip i save yusim stik, planti taim ol i yusim longpela stik we het bilong en i krungut, long stiaim o pulim ol sipsip i go longwe long bagarap we inap painim ol. Olsem tasol, Jehova God i olsem Wasman bilong sipsip i gat pasin laikim husat i save lukautim na stiaim ol man i lotuim em. Maski long taim traipela hevi tru i painim ol, Jehova i save lukautim ol long kain kain rot.

•   Em i save skulim na mekim isi bel bilong ol long rot bilong Tok bilong em i stap long Baibel.​—Rom 15:4.

•   Em i save putim yau long beten bilong ol, na mekim bel na tingting bilong ol i stap isi.​—Filipai 4:6, 7.

•   Em i yusim ol wanbilip bilong ol long strongim ol.​—Hibru 10:24, 25.

•   Em i promis long gutpela sindaun long bihain; em taim we em bai pinisim olgeta hevi i wok long painim ol long nau.​—Buk Song 37:29; Revelesen 21:3-5.

 Devit i raitim tok bilong Buk Song 23, em man husat i mekim wok olsem wasman bilong sipsip taim em i liklik yet na bihain em i kamap king bilong Israel long bipo. (1 Samuel 17:34, 35; 2 Samuel 7:8) Kirap bilong dispela song i tok long Jehova olsem Wasman husat i save go pas, givim kaikai, na givim nupela strong long ol man i lotuim em, wankain olsem wasman bilong sipsip i save mekim.​—Buk Song 23:1-3.

 Long Buk Song 23:4, taim Devit i stori long pasin bilong God long lukautim ol man i lotuim em, Devit i no yusim tok (em) we i soim olsem em i laik stori long yumi long God, nogat. Em i senisim tok em i yusim na kolim narapela tok (yu) we i soim olsem Devit i pas gut wantaim Jehova. Devit i save olsem God i tingim em na Em i luksave long ol hevi i painim em. Olsem na Devit i no pret long wanpela samting.

 Long ol tupela neks ves bilong Buk Song 23, ves 5 na 6, tok piksa i senis na i stori long papa bilong haus na wanpela man husat i kam i stap long haus bilong em. Wankain olsem papa bilong haus i gat pasin bilong givim samting, Jehova i mekim gut long Devit olsem wanpela spesel man i stap wantaim em. Na tu, ol birua bilong Devit i no gat strong long pasim ol samting God i mekim bilong lukautim Devit. Long pinis bilong dispela song, Devit i soim olsem em i bilip olsem God bai mekim gut long em na laikim em long laip olgeta bilong em.

 Tok piksa i stap long Buk Song 23 i kamapim klia pasin bilong God long wok yet long laikim na lukautim ol man i lotuim em.​—1 Pita 2:25.