ENMARIE KANI, em wanpela yangpela meri i gat 17 krismas, em i bilong hailans, long Papua Niugini, em i tok: “Long hap bilong mipela, pik em i wanpela bikpela rot bilong famili long kisim mani, olsem na em i bikpela wok bilong lukautim wanpela pik. Taim papa bilong mi i tokim mi long lukautim wanpela pikinini pik, mi amamas, tasol mi pret tu, long wanem, pik i liklik tumas na mi ting em bai dai.”

Enmarie i mekim wanem bilong lukautim liklik pik bilong em? Long ol man bilong ples long Papua Niugini, bilong wanem pik i bikpela samting wankain olsem mani? Enmarie i stori long nius Kirap! olsem.

Inap yu stori long ples bilong yu.

Mi stap wantaim papamama na 4-pela liklik bratasusa—tupela gel na tupela boi—mipela i stap long wanpela liklik haus kunai, long wanpela ples bus long ol maunten long Westen Hailans. I gat 50 manmeri long dispela ples, olgeta em famili bilong mi, na mipela i sindaun arere long wanpela liklik wara i ran i kam daun namel long ol maunten.

Klostu olgeta man bilong ples bilong mipela i save wokim gaden bilong lukautim ol yet. Famili bilong mi i gat bikpela gaden we  mipela planim kaukau, pamkin, kukamba, kopi, na ol narapela samting. Mi save amamas long wokim gaden na mekim ol narapela wok, olsem klinim haus, wasim klos, na lukautim pik bilong famili.

Yu mekim wanem bilong lukautim pik bilong yu?

Inap wanpela yia i go pinis Papa i kisim pik i kam. Pik i liklik tru na mi inap karim long han. Long olgeta de mi save miksim marasin bilong pik—em paura ol i wokim long pis—wantaim kaukau, wara, sol, na wara bilong suga, na givim long pik. Long hailans, ples i save kol tru long nait, olsem na pik i save slip long wanpela beg rais i hangamap klostu long ples bilong paia insait long haus bilong mipela. Mi save slip long plua klostu long pik. Olsem na em i kamap bikpela na em i no dai!

Mi no givim wanpela nem long pik. Mi save kolim tasol Pik, na dispela i kamap olsem nem bilong em. Mi lukautim Pik olsem em i bebi bilong mi, mi givim kaikai long em, wasim em, na pilai wantaim em inap planti aua. Olsem na Pik i laikim mi na bihainim mi long olgeta hap.

Taim Pik i go bikpela, mi mekim narapela samting wantaim em. Mi pasim em long rop na kisim em i go long gaden i stap longwe long haus inap olsem 15 minit. Long gaden mi pasim rop long diwai na pik i ken digim graun de olgeta. Em i yusim strongpela nek na nus bilong em long digim ol rop bilong diwai na painim ol liklik snek, na long seim taim em i brukim graun na fetelaisim graun.  Long apinun mi kisim em i go bek long haus, na mi givim em kaukau i no tan na i tan, na long nait mi putim em long banis pik.

Bilong wanem pik i bikpela samting long ol man bilong hailans?

Mipela ol hailans i gat wanpela tok olsem, Mani em pik na pik em mani. Paslain tru long mani i kam kamap long hailans, ol man i save yusim ol pik olsem mani, em pasin ol i mekim yet long nau. Olsem, wanpela taim wanpela bisnisman bilong salim kar long hailans i bin givim pik long ol wan wan man i baim kar. Ol lain bilong ples i save givim mani na ol pik bilong stretim ol kros namel long ol. Planti man husat i laik marit, ol i save givim ol pik long papamama o klen bilong meri olsem pe bilong baim meri.

Taim man i kaikai pik, i olsem em i kaikai mani, a?

Yu tok stret! Pik i bikpela samting, olsem na mipela i save kaikai pik long ol spesel bung, olsem ol fiuneral na ol narapela bikpela bung. Na tu, sampela lain bilong hailans i save kaikai planti handret pik long ol bikpela bung, dispela i bilong makim olsem lain bilong ol i gat planti mani o bilong mekim gut long ol lain i bin helpim ol.

Famili bilong yu bai mekim wanem long ol pik bilong yupela?

Yu tok stret, em “ol pik,” long wanem, Pik i karim planti pikinini, na i no long taim i go pinis mipela i salim wanpela long K100. Mipela i yusim mani bilong baim bas i go long kibung distrik bilong ol Witnes Bilong Jehova long taun i stap klostu, em Banz. Bilong lukautim famili, ating Papa bai salim ol narapela pikinini bilong Pik.

Bilong wanem yupela i no laik lukautim planti pik moa na kisim bikpela mani?

Mipela i no tingting long kamap maniman, mipela i laik kisim tasol ol samting mipela i nidim, olsem kaikai, klos, na haus. Bikpela samting long famili bilong mipela em long mekim ol wok lotu. Olsem mekim wok bilong God bilong mipela, em Jehova, go long ol miting Kristen, na helpim ol narapela manmeri sapos mipela inap—long sait bilong skin o sait bilong lotu—na mipela i save mekim ol samting wantaim olsem famili. Mipela i no gat planti samting, tasol mipela i pas gut wantaim na stap amamas.

Long nau, mi mekim wok gaden na lukautim ol pik, tasol mi mekim sampela de tasol. Nambawan wok bilong mi em wok bilong autim tok bilong God, na skulim ol narapela man long tok bilong Baibel. Em wok Jisas i bin givim long ol disaipel bilong em, na mi save mekim dispela wok sampela de long wik. (Matyu 28:19, 20) Mi laik tru olsem wanpela taim bai mi go wok long brens ofis bilong ol Witnes Bilong Jehova long Pot Mosbi, we ol i save tanim ol buk na nius bilong Baibel i go long sampela tokples bilong Papua Niugini. Tasol sapos mi no go, mi save olsem mi bai kisim bikpela amamas long mekim wok bilong Jehova na putim ol samting bilong lotu i stap namba 1. Mi amamas olsem mani mi kisim long rot bilong ol dispela pik i helpim mi long ol samting bilong skin.

[Blok/Piksa long pes 26]

PIK

● Long ailan Papua Niugini, i gat samting olsem 2 milion pik em ol man i lukautim, olsem 1-pela pik long olgeta 3-pela 3-pela man.

● Long ol man bilong ples, planti bilong ol i gat ol pik.

[Ol Mep long pes 24]

(For fully formatted text, see publication)

INDONESIA

PAPUA NIUGINI

AUSTRALIA

INDONESIA

PAPUA NIUGINI

POT MOSBI

WESTEN HAILANS

AUSTRALIA

[Piksa long pes 24, 25]

Go long gaden

[Piksa long pes 25]

Taim bilong was was

[Piksa long pes 25]

Taim bilong pilai