Ankan kxpulakni

Ankan xlipulaktiy niku tsuku

Xtatayananin Jehová

totonaco

Tuku talichuwinalh ktamakxtumit xaʼakgatunu kata

«Xlibro Dios lu lanka xtapalh»

Tuku talichuwinalh ktamakxtumit xaʼakgatunu kata

Kilhtamaku 5 chu 6 xla octubre kata 2013, 1,413,676 latamanin xalak 31 países kgaxmatkgolh tuku talichuwinalh ktamakxtumit xaʼakgatunu kata número 129 xla Watch Tower Bible and Tract Society of Pennsylvania. Makgapitsi tamakxtumikgolh kSalón de Asambleas xalak Jersey City (Nueva Jersey, Estados Unidos), pero atsinu ni putum kʼInternet kgaxmatkgolh.

Tamakxtumit limatsukilh Guy Pierce, kgolotsin tiku makgpulalin xtatayananin Jehová. Tala Pierce tlawalh pi xkgaxmatputunkgolh tiku xwilakgo ktamakxtumit akxni kawanilh pi anta xʼama takgalhti lu xlakaskinka takgalhskinin xlakata Biblia, tlakg xtamakgatekgsanalh makgapitsi tamasiy chu xkilhtamaku xʼama tamasta liwat xla takanajla (Mateo 24:45; Proverbios 4:18).

«Wi tuku wilika nema malanki Jehová.»

Mark Sanderson, kgolotsin tiku makgpulalin xtatayananin Jehová, lichuwinalh pi wi tuku wilika niku pulalinkan xtaskujutkan xtatayananin Jehová xlikalanka katiyatni, kBrooklyn (Nueva York, Estados Unidos). Wanikan «Biblia chu xtukuwani Dios». Uma masiya la xlilakaskinka xtukuwani Dios anta kTatsokgni xaHebreo chu kTatsokgni xaGriego. Tiku naʼankgo naʼakxilhkgo Biblia xalakgmakgan, tuku xmaklakaskinkan makgasa chu páginas xalak Biblia xla Edad Media.

Anta niku kawilikanit uma, wilakgo páginas xla Biblia xalak siglo XVI nema tlawalh William Tyndale. Wa tiku pulana matitaxtilh Biblia chu wililh xtukuwani Dios kxaʼinglés. Na wi maktum página xapulana edición xla Reina-Valera, nema tlawaka kkata 1602. Uma Biblia kxaʼinglés akxni matitaxti xtukuwani Dios wili «Iehova». Nachuna, tlan akxilhkan maktum Biblia xaʼinglés nema wanikan Great Bible (Gran Biblia; impresión de 1549), chu nachuna maktum Biblia nema limin 12 tachuwin xla Elias Hutter (nema lilakgapaskan Políglota de Núremberg; edición de 1599) chu maktum xla Geneva Bible (Biblia de Ginebra; impresión de 1603). Umakgolh maktutu Biblia maklakaskinkgo xtukuwani Dios.

Tala Sanderson kawanilh pi xʼankgolh akxilhkgo uma tuku wilikanit. Wa: «Skiniyaw Jehová pi [...] uma kakamakgtayalh putum latamanin chu tiku tanu tanu takgalhtawakga kgalhikgo xlakata napaxkikgo tuku akinin na lu paxkiyaw: xTachuwin Dios, Biblia, chu xalanka xtukuwani Dios: Jehová».

Texto xla kata 2014.

Akxni tala Gerrit Lösch, kgolotsin tiku makgpulalin xtatayananin Jehová, xmatitaxtinita tuku lichuwinan revista Makatsinina xla ama semana, tala Pierce wa tukuya texto xʼama tawila kkata 2014. Wa xlakata Mateo 6:10, niku wan: «Kamilh mintamapakgsin». Maski uma versículo lu xlakaskinka akxilhkgo xtatayananin Jehová, kkata 2014 tlakg xlakaskinka nawan, xlakata natakgatsi akgtum ciento kata lata tawilalh xTamapakgsin Dios anta kʼakgapun.

«Lu xlakaskinka xtamaskiwin Jehová.»

Alistalh, putum lipaxuwakgolh video nema lichuwinan xlakata Traducción del Nuevo Mundo de las Santas Escrituras, tlawakgonit xtatayananin Jehová chu nema makgapitsi lakpuwankgo pi wa tlakg tlan la matitaxtikanit. Ktamakxtumit xaʼakgtati kilhtamaku «Talhuwi tuku xla Dios», nema tatlawalh kkata 1950, Nathan Knorr masiyalh xapulana nema tatlawalh chu kawanilh tiku xwilakgo pi xamaktuminika xlikgalhtawakgakgolh, xputsananikgolh chu xkamakgtayakgolh amakgapitsi xlakata xlikgalhtawakgakgolh xlakata xmalankikgolh Jehová. Xlikana, chuntiya makgtayanan uma lu tlan tastakyaw.

«Lakapastakkan tuku titaxtunit.»

Uma taʼakgchuwin lakgchalh Samuel Herd, kgolotsin tiku makgpulalin xtatayananin Jehová. Na limin akgtum video niku kakgalhskinka kgalhtati betelitas xalak Estados Unidos tiku xwilakgo akxni taxtulh Traducción del Nuevo Mundo. Uma Biblia akgchaxan volúmenes taxtulh kkata 1950 chu 1960.

Eunice Timm lichuwinalh la kitaxtunilh akxni tsukulh maklakaskin Traducción del Nuevo Mundo ktamakxtumit. Xlakgati tamakgtay nema xtalikgalhtawakga Biblia, notas chu referencias. Xlakata lu tuwa xwanit xlinkan makchaxan volúmenes anta ktamakxtumit, kaj wa xlin tuku xlakpuwan pi xʼama maklakaskin. Pero komo xlikgalhtawakgaka akgtum versículo xla atanu volúmen, na xlin xaʼaktsu Biblia xla King James Version (Versión del Rey Jacobo).

Uma xasasti Biblia na kamakgtayalh kxtakakninkan. Akgtum liʼakxilhtit, Fred Rusk wa pi akxni nina xchan 1950, natalan tiku xtlawakgo oración kBetel xmaklakaskinkgo tachuwin nema xwi kBiblia King James Version. Pero, akxni aku xtaxtunit Traducción del Nuevo Mundo, umakgolh natalan nialh maklakaskinkgolh uma tachuwin chu tsukukgolh maklakaskinkgo kxʼoracionkan tuku xmaklakaskinkgo chali chali.

John Wischuk ni kajwatiya lakgatilh xlakata la xtamatitaxtinit uma Biblia, wata na kaks lilakawa la xtataktujukgo Comité xla Traducción del Nuevo Mundo. Xla wa: «Ni xlakaskinkgo pi xkatsika xtukuwanikan, maski akxni xnikgolh, xlakata xlakaskinkgo pi wa Jehová tiku xmalankika». Tuku wa Charles Molohan limasiyalh tuku xmakgkatsikgo tiku kakgalhskinka. Xla wa: «Traducción del Nuevo Mundo, matliwakglhli tuku xaxlikana kkinakujkan chu matliwakglhli kintakanajlakan. Chu uma kinkamakgtayanitan nakkamakgtayayaw amakgapitsin na namatliwakglhkgo xtakanajlakan».

«Nkintachuwinkan nkgaxmatnikgoyaw lichuwinankgoy ntlanka likakni ntu ntlaway Dios.»

(Hechos 2:11.) Kxtaʼakgchuwin, Geoffrey Jackson, kgolotsin tiku makgpulalin xtatayananin Jehová, wa tiku wa pi xtaxtunit Traducción del Nuevo Mundo kxaʼinglés xla kata 2013 nema lakputsananiparaka. Akxni sputli taʼakgchuwin, putum tiku kgaxmatkgolh, asta tiku kʼInternet xkgaxmatmakgolh, kamaxkika maktum uma Biblia.

Akxni lakapastakkgolh pi xtitaxtunita akgchaxan décadas lata taxtulh pulaktum xla Biblia Traducción del Nuevo Mundo, tala Jackson wa pi maski tachuwin Inglés talakgpalitilhanit chuna la titaxtunit kata, watiya tuku klakaskinaw akxni kmatitaxtiyaw Biblia. Literal kmatitaxtiyaw xTachuwin Dios akxni chuntiya taʼakgatekgsa tuku wamputun tuku litsokgka Biblia.

Kkata 2005, Lakgkgolotsin tiku Pulalinkgo xTatayananin Jehová wa pi xmatitaxtika uma Biblia ktlakg lhuwa tachuwin. Uma kata, Traducción del Nuevo Mundo xwija k52 tachuwin. Pero la uku tlan likgalhtawakgakan k121 tachuwin, chu tamatitaxtima k45 tachuwin. Chuna la titaxtunit kata, skinkgonit tamakgtay xlakata tlakg liwana naʼakgatekgskgo tuku wamputun makgapitsi tachuwin. Asta la uku, 52,000 takgalhskinin anan chu lhuwa makgtayanalh xlakata xtekgska kBiblia xaʼinglés nema xtalakaskin pi xlakgpalika chu xwilika atanu.

Akgtum liʼakxilhtit, tala Jackson lichuwinalh xlakata 1 Samuel 14:11, niku wan pi Jonatán chu tiku xlini xʼescudo tayakgolh niku filisteos tlan xkaʼakxilhkgolh. Wa pi xapulana ediciones xla Traducción del Nuevo Mundo kxaʼinglés xmaklakaskinkgo tachuwin nema xmakgatekgsanalh pi Jonatán chu tiku xlini xʼescudo ni klhkganankgonit kxlakatinkan filisteos. Akxni putsananiparaka maklakaskinka tachuwin nema ni chuna xtaʼakgatekgsli. Kaʼakxilhparaw atanu. Miqueas 2:6 xapulana xwan: «Ni kamakgxtakgtit natakta tachuwin. Xlakan mastakgo talakaskin natakta tachuwin». Pero chuna la tamatitaxtilh lu literal chu tuwa akgatekgskan. Pero, la uku wan xaʼinglés nema putsananika: «“¡Nialh kalichuwinantit Dios!”, xlakan lichuwinankgo Dios».

Comité tiku putsananilh Traducción del Nuevo Mundo xaʼinglés wa Lakgkgolotsin tiku Pulalinkgo xTatayananin Jehová kalaksakli akgkitsisa kata. Chu lhuwa taskujut nema tlawakgolh tlantiya nalikgalhtawakgakan. Lu stlan tasiya uma xasasti edición chu lu tlan likgalhtawakgakan, chu tuku litlawakanit natayani maski lhuwa namaklakaskinkan. Tala Jackson wa pi edición nema kgalhi xalaklanka letra chu xabolsillo nialh makgas nataxtukgo.

“Aktanks kamalakatanksaw tachuwin xla xaxlikana.”

Texto nema pulalilh tuku matitaxtilh tala Stephen Lett, na kgolotsin tiku makgpulalin xtatayananin Jehová, wa 2 Timoteo 2:15. Xla wa pi tachuwin nema litsokgka Biblia niku wan aktanks malaktanksakan wamputun «liwana kakan». Wa xlakata, kstalanina Cristo xlikatsinit “liwana nalikanan” «kspada spiritu santo» (Efesios 6:17). Kxtaʼakgchuwin, tala Lett lichuwinalh tuku limin uma xasasti edición chu lichuwinalh la uma nakinkamakgtayayan aktanks namaklakaskinaw Biblia.

  1. Tuku litsuku kgalhi 20 takgalhskinin xlakata tuku pulana masiya Biblia chu na limin versículos nema kgalhti takgalhskinin.

  2. Tatakgatsin A lichuwinan xlakata la putsananika, xlakata la tamaklakaskin xtukuwani Dios chu la lakgpalika xʼestilo chu tachuwin nema tamaklakaskin.

  3. Tatakgatsin B, nema kgalhi 15 secciones chu kgalhi color, limin mapas, diagramas chu tablas nema makgtayanan akxni kgalhtawakgakan chu xlakata nakamasiyanikan amakgapitsin.

  4. Akxni tsuku makatunu libro wi tuku limin nema makgtayanan xlakata lakapala natekgsa texto nema naputsaya. Uma wa tawila xlakgxokgo titulillos nema wilakgo kxapulana ediciones.

  5. Glosario lichuwinan tsinu tuku wamputun makgapitsi tachuwin nema tamaklakaskilh kBiblia.

  6. Nialh lhuwa kgalhi índice niku wilakgolh tachuwin. La uku kaj wa limin tachuwin chu versículos nema tlakg tamaklakaskin akxni lichuwinankan Dios.

  7. Referencias marginales, tuku wilakgo kxʼitat páginas, na nialh lhuwa kgalhi. La uku kaj wa kawilikanit tuku tlakg tamaklakaskin akxni talichuwinan Dios.

  8. Knotas nema wilakgo xpakgalhu páginas wilakgo tuku tlan nalikgalhtawakgaya, tuku literal tamatitaxtinit chu xtatakgatsin.

Aplicación JW Library.

John Ekrann, tiku makgtapakgsi kComité de Sucursal xalak Estados Unidos, maklakaskilh teléfonos, tabletas chu computadoras xlakata xmasiyalh xasasti aplicación JW Library. Uma makgtayanan xlakata tlan nalikgalhtawakgakan Traducción del Nuevo Mundo kxaʼinglés xla kata 2013 chu atanu makkitsis Biblias. Lata 7 xla octubre xla kata 2013 tlan namaktikan kʼInternet umakgolh aplicaciones chu ni taxokgo.

«Xatakgatsin la tamatitaxtilh xTachuwin Dios.»

Achatum kgolotsin tiku makgpulalin xtatayananin Jehová, Anthony Morris, tlakg lichuwinalh tuku xlakata comité tiku kalakgayawakanit lakputsananiparakgolh Traducción del Nuevo Mundo. Xlakata tuku wan 1 Corintios 14:8, 9, comité lakpuwa pi uma Biblia ni tuwa xʼakgatekgsnikgolh. Wa xlakata ni wilika akgtum traducción literal nema xtlawalh pi ni xtaʼakgatekgsli.

Komo literal xtamatitaxtilh Génesis 31:20 xwa: «Jacob kgalhalh xnaku Labán». Pero, kxahebreo, «kgalhankan naku» taʼakgatekgsa pi akgskgawinankan. Wa xlakata Traducción del Nuevo Mundo wan pi Jacob tlakg skgalala wa nixawa Labán. Nachuna xlakata 1 Corintios 7:39. Komo lu literal xwilika uma versículo xwamputulh pi komo chatum chixku tiku tamakgaxtokgnit klhtatalh, xpuskat tlan xtatamakgaxtokgli atanu. Chu kBiblia min kilhtamaku tamaklakaskin tachuwin lhtatakan akxni «nikan». Wa xlakata, Traducción del Nuevo Mundo wililh lhtatakan kkalinin xlakata liwana nataʼakgatekgsa.

Tala Morris wa: «Biblia tsokgka chuna la chuwinankgo putum latamanin, la chuwinankgo chanananin, tiku kuentajtlawakgo borregos chu skitinanin. Wa xlakata, maktum Biblia nema liwana tamatitaxtinit wa tuku tlan nataʼakgatekgsa maski tanu tanu takgalhtawakga kgalhikan».

«Maklakaskin lakwan chu tachuwin nema xlilat.»

Uma título, takilhtilh kʼEclesiastés 12:10, nema mastalh David Splane, achatum kgolotsin tiku makgpulalin xtatayananin Jehová. Tiku tsokgkgolh Biblia kuenta tlawakgolh akxni tsokgwilikgolh xtalakapastakni Dios chu xapulana Comité xla Traducción del Nuevo Mundo nachuna lu kuenta tlawalh. Traducción del Nuevo Mundo xla kata 2013 nachuna tlawaka: maklakaskilh tachuwin nema xlilat chu lu xaxlikana, chu liwana nataʼakgatekgsa xtamakatsin Dios.

Tala Splane wa: «Lhuwa tachuwin xaʼinglés pulaklhuwa tuku wamputun». Xlakata xlimasiyalh lichuwinalh 2 Timoteo 1:13, «xaliʼukxilhtit xla yuma aktanks xatlan tamasiyun». Tachuwin «xaliʼukxilhtit» nema tamaklakaskilh kBiblia Traducción del Nuevo Mundo wa pattern, nema wamputun «tuku likaxtlawanankan». Wa xlakata, makgapitsi wankgo pi uma versículo kilhchanima tuku lu lakswan nema kgalhi tuku masiya Biblia. Pero, tuku lakgchan tachuwin nema tamaklakaskilh akxni tsokgka Biblia wa «xaliʼakxilhtit xlakata namaxtukan atanu tuku xtachuna». Wa xlakata, xasasti Biblia maklakaskin tachuwin standard, nema kxaʼinglés kilhchanima chuna la xlilat.

Tala Splane lichuwinalh makgapitsi tuku lakgpalika xlakata chuna xwilika la chuwinankan inglés xala uku. Akgtum liʼakxilhtit, tachuwin nema xmaklakaskin Traducción del Nuevo Mundo kxaʼinglés xlakata akxni wi tiku mawakakan kkgantum kiwi, la uku taʼakgatekgsa pi wi tiku lalakgxtokgokan kgantum kiwi. Pero Jesús ni lilakgxtokgoka kgantum kiwi, wata mawakaka kkgantum kiwi chu xasasti Biblia chuna wan (Mateo 27:22, 23, 31).

Xlakata xlimasputulh, akxni lichuwinalh xasasti Biblia Traducción del Nuevo Mundo, tala Splane wa: «Kskinaw kʼoración pi akxni nalikgalhtawakgayatit chu naputsanananiyatit uma Biblia kakamakgtayan xlakata tlakg tlan natalalipinatit Jehová, xlakata putum kilhtamaku minTlatkan nawan, miDioskan chu miAmigojkan».

Tuku lisputli.

Tala Pierce wa pi uma xasasti Biblia wa tuku tlakg kinkamatliwakglhan xliputum liwat xla takanajla nema kinkamaxkiyan Jehová (Isaías 25:6). Chu xlakata xlimasputulh, kawanilh tiku tamakxtumikgonit pi xmaxtukgolh tuku likilhtlikgo chu xkilhtlikgolh 114, nema wanikan «Xlibro Dios lu lanka xtapalh».