Ankan kxpulakni

Ankan xlipulaktiy niku tsuku

Xtatayananin Jehová

totonaco

Akgkunajatsa mil boletos: ¡akgtum lanka tamaskiwin!

Akgkunajatsa mil boletos: ¡akgtum lanka tamaskiwin!

Julio kata 2013, Lakgkgolotsin tiku Pulalinkgo xtatayananin Jehová kamalakgachanilh maktum carta misioneros chu amakgapitsi tiku skujmakgo la especiales kʼatanu país. Carta xlichuwinan akgtum tamakgtay xlakata tlan xʼankgolh kʼakgtum tamakxtumit xaʼakgtati o xaʼakgtutu kilhtamaku kkata 2014 chu xkilhtsukut kata 2015.

Tuku xtatlawaputun ni kaj watiya xʼankgolh ktamakxtumit, wata na xkalakgapaxialhnankgolh xfamilias chu amigos. Uma carta xwan pi wa organización xʼama xokgo xpasajekan tuku xliʼankgolh chu xlitaspitkgolh.

Maski katata nachuna xtlawakanit, pero uma kata tanu la xʼamaka tlawakan. Wa Comité de Enseñanza xla Lakgkgolotsin tiku Pulalinkgo, lakkaxwilikgolh akgtum departamento xlakata kxokgowilikgolh xboletoskan tiku xmimakgolh xlikalanka katiyatni.

Akxni nina makgas la xmalakgachakanit carta, kSección de Viajes tsukukgolh malakgatsamakgo tuku xtaskin. Enero kata 2014, uma departamento lhuwa taskujut kgalhilh. Tiku kskujkgo kSección de Viajes putsakgolh chu xokgowilikgolh tanu tanu hora nema xkalakgchan tiku putum kilhtamaku skujnanimakgolh Dios xlikalanka katiyatni.

Lakkaxwilikan la xchinkgolh natalan tsinu tuwa xwanit. Makgapitsin ankgolh lata Reykjavík (Islandia) asta Cochabamba (Bolivia); amakgapitsi lata Nouméa (Nueva Caledonia) asta Antananarivo (Madagascar). Wi tiku ankgolh lata Port Moresby (Papúa Nueva Guinea) asta Seattle (Washington, Estados Unidos), chu lata Ouagadougou (Burkina Faso) asta Winnipeg (Canadá).

Kgalhkitsis tiku skujmakgolh kSección de Viajes xokgowilikgolh 19,000 xboletoskan 4,300 natalan xalak 176 países. Tlan kitaxtulh xlakata tumin nema xatapaxuwan mastakgolh congregaciones nema chuna xlilakkaxwilikanit.

Ni makgas kilhtamaku titaxtulh natalan tsukukgolh paxtikatsininankgo. Akgtum tamakgaxtokgat misioneros tsokgnalh: «La uku ktaspitmaw ksureste asiático, niku kmakgtayanamaw. Lu kpaxtikatsiniyaw xlakata kilamakgtayaw tlan nakanaw kʼInglaterra, kkinchikkan, chu kʼakxilhwi kifamiliajkan nema akgkitsis kata nitu xakaʼakxilhmaw. Komo ni xkintilamakgtayaw nila xaktiʼaw. Lu xliputum kinakujkan kpaxtikatsiniyaw tiku makgtayanankgolh».

Chatum misionero tiku makgtayanama kParaguay tsokgnalh: «Kimpuskata chu akit lu kkapaxtikatsiniputunan xlakata tlan kkaw ktamakxtumit xaʼakgtati kilhtamaku kNueva Jersey (Estados Unidos). Akxni xtsukuma kata 2011, ktsukuw mastokgaw kintuminkan xlakata nakkanaw kʼEstados Unidos chu naklakgapasaw niku pulalinkan taskujut. Pero junio xla ama kata, kinkawanikan nakanaw kalakgapaxialhnanaw congregaciones xla tachuwin xla señas xalak Paraguay. Pero lu lakgamakgat xakanaw. Wa xlakata, akxni liwana xaklakapastaknitawa, klakkaxwiliw maski ni nakkanaw kʼEstados Unidos chu xaktamawaw akgtum putlaw xlakata tlan xakmakgantaxtiw tuku xkinkalakgayawakanitan. Akxni chu kinkawanikan pi xakaw ktamakxtumit xaʼakgtati kilhtamaku. ¡Tuku xaklakpuwanitaw xkgantaxtuma! Kpaxtikatsiniyaw Jehová xtalakgalhaman chu xtapaxkit nema kinkamaxkinitan».

Chatum tamakgaxtokgat xalak Malaui tsokgnalh: «Kmalakgachamaw uma correo electrónico xlakata nakkawaniyan: “¡Lu kpaxtikatsiniyan!”. Nila liwana klakpuwanaw la xlilhuwa, kilhtamaku chu tumin talakaskilh xlakata xlakkaxwilika uma. Lu kpaxtikatsiniyaw mintaskujutkan chu, xtalakgalhaman xkachikin Jehová nema tlawalh pi tlan xakaw kkinchikkan, xakaw ktamakxtumit xaʼakgtati kilhtamaku chu akxtum xakktatawilaw kifamiliakan chu kiʼamigoskan».

Tiku skujkgo kSección de Viajes xatapaxuwan tlawakgolh xtaskujutkan. Mileivi wa: «Kamakgtayakan misioneros nataspitkgo kxchikkan chu naʼakxilkgo xfamiliajkan chu xʼamigoskan uma lu stlan taskujut». Dorise, xla wa: «Kkakxilhli la xkachikin Jehová kapaxki tiku makgtayanankgo ktanu países». Chu Rodney, tiku pulalin uma departamento, wa: «Lu makgapaxuwanan makgtayanankan kʼuma taskujut».

Xtatayananin Jehová xlikalanka katiyatni lu paxuwakgo pi na makgtayanankgolh xlakata xnatalan tiku wi tuku limakgxtakgkgonit chu lu skujkgo xmakglhtinankgolh uma tamaskiwin.