Ankan kxpulakni

Ankan xlipulaktiy niku tsuku

Xtatayananin Jehová

totonaco

Lu xlakaskinka tamakxtumit xla xtatayananin Jehová k’akgtujun países

Lu xlakaskinka tamakxtumit xla xtatayananin Jehová k’akgtujun países

Xtatayananin Jehová tlawakgolh lu xlakaskinka tamakxtumit kBrasil, Costa Rica, Hong Kong, Irlanda, Israel, Nueva Zelanda chu Suecia. Xapulana lanka tamakxtumit tatlawalh kSuecia, kjulio kata 2012, chu akgtutu xa’awatiya tlawaka kCosta Rica chu kNueva Zelanda, k’enero kata 2013.

Chuna la tatlawa k’atanu tamakxtumit xa’akgtutu kilhtamaku nema lakkaxwilikgo xtatayananin akgatunu kata, programa xla umakgolh tamakxtumit mastakan ta’akgchuwin, matitaxtikan limasiyat chu dramas.

K’umakgolh tamakxtumit kilakgolh tiku xalak alakatanu países. Akxni nina xtsuku tamakxtumit chu akxni ksputnita, tiku kilakgolh kamalakgapasnika lakalhuwa niku lu kastlan.

Chatum tiku kilalh ktamakxtumit kBrasil wa: «Lu tlan klimakgkatsilh akxni kakxilhli pi natalan lu paxkinankgo chu lu tlan likatsikgo. Kmakgkatsilh pi kifamilia kaj lakapala talhuwilh».

Tiku kilalh ktamakxtumit kHong Kong wa: «Lu kaks klilakawa akxni kakxilhli la natalan makgamakglhtinankgolh xasasti likgalhtawakga kmandarín xkalikuxmuchipakan, litasakgolh chu na lipaxuwakgolh».

Akgatunu kata xtatayananin Jehová tlawakgo laklanka tamakxtumit xlikalanka katiyatni, chu lhuwa millones ankgo.

Umakgolh tamakxtumit tlawa pi tiku ankgo nalalimasiyanikgo tapaxkit, tapaxuwan chu takaksni nema kalilakgapaskan xtatayananin Jehová. Chu chuna la akxni anan umakgolh laklanka tamakxtumit chu tamakxtumit x’akgtati kilhtamaku. Tastunut tiku ankgo ktamakxtumit latachuwinankgo, akxtum wayankgo, wi tuku lamaskiwi, lamaxki xdirección, akxtum taxtukgo kfotos chu lalimasiyani pi lapaxki akxni la’akgpixtiya, o lasnata.

Chu xtachuna la putum laklanka tamakxtumit, na tlan kamakgamakglhtinankan tiku ni xtatayananin Jehová.