Ankan kxpulakni

Xtatayananin Jehová

Laksakkan tachuwin totonaco

Graduación xla clase 133 kʼEscuela Bíblica de Galaad

Sábado 8 xla septiembre kata 2012

Graduación xla clase 133 kʼEscuela Bíblica de Galaad

Akxni sputli curso nema kamaxkika akgkitsis papaʼ, 48 tiku kilakgolh kʼEscuela Bíblica de Galaad xla Watchtower lipaxuwakgolh tuku tlawaka akxni kgalhsputli, nema tatlawalh niku katlawakan escuelas xla xtatayananin Jehová kPatterson (Nueva York). Kʼuma programa na kilakgolh 9,694 xʼamigoskan, xfamiliaskan chu amakgapitsi tiku xwilakgolh na xlimasiyamakgo pi xkatatayakgo.

Lata kata 1943, liwaka 8,000 tiku tlakg katsinikgo lichuwinankgo Dios makgamakglhtinankgonit uma takgalhtawakga xlakata misioneros nalitaxtukgo. Biblia wa libro tuku talikgalhtawakga kʼuma curso nema matliwakglha xtakanajlakan tiku ankgo kʼuma escuela chu kamakgtaya xlakata nakgalhikgo lakwan tayat nema talakaskin xlakata natayanikgo tuku nitlan natitaxtukgo niku nalichuwinankgo Dios.

«Liwana kalilakapastaktit xlakata tapaxkin.» Tiku matsukilh tamakxtumit wa Anthony Morris, tiku makgtapakgsi Lakgkgolotsin tiku Pulalinkgo xTatayananin Jehová. Limatsukilh Filipenses 4:8, nema wan «chu xlipaks wa [...] lantlata tapaxkin, [...] wa yuma nkalakapastaktit natlawayatit».

Tala Morris lichuwinalh tuku nakinkamakgtayayan wa nalilakapastakaw tuku tlan xlakata uma kakilhtamaku litsama tuku lixkajni wa kalilakapastaknaw tapaxkit, o nema natlawa pi lu nalakgalhamananaw. Chuna la xchuwinama, xla wa: «Skgalalh katawilatit chu kaputsatit tuku xatlan tapaxkit; nachuna, wixin tlan kalikatsitit».

Xlakata uma, putum akinin katlawaw chuna la likatsi kinTlatkan xalak akgapun, xlakata xla ni wa kintalakgalhinkan akxilha (Salmo 130:3). Tala Morris mastalh uma tastakyaw: «Ni kaʼakxilhtit tuku nitlan tlawakgo mincompañeroskan, chu katlawatit pi kakapaxkikgon amakgapitsin».

«Tlakg kakatsitit, pero ni kalakpuwantit pi nikxni natlawayatit tuku nitlan.» Xtaʼakgchuwin Harold Corkern, tiku makgtapakgsi kComité de Sucursal xalak Estados Unidos, lichuwinalh tuku wan Eclesiastés 7:16. Maski Dios lakaskin pi kakgalhiw takatsin chu liwana kalimaklakaskiw, xla ni lakaskin pi «tlankajwa nakinkalimakgkatsikanan».

Tala Corkern na lichuwinalh pi lu xlakaskinka nalimasiyakan tapaxkit akxni mastakan tastakyaw. Ni tlakg kakaskiniw kinatalankan chuna la Jehová kaskini. «Komo wixin liwana nalimaklakaskinatit liskgalala, tuku katsiyatit chu tuku akgatekgsatit, uma natlawa pi natalan nakakgalhiniyan tapaxkit.» Chuna lichuwinalh tala Corkern.

«Ni natakgtsonkgswa tu katlawanit [Dios].» (Salmo 78:7.) Guy Pierce, tiku namakgtapakgsi Lakgkgolotsin tiku Pulalinkgo xTatayananin Jehová, limatsukilh xtaʼakgchuwin lichuwinalh tuku tlan o nitlan xlakata xtayat aktsu kgawasa litasiya la likatsikgo xnatlatni (Proverbios 20:11). Nachuna, kintayatkan limasiya la likatsi Jehová, kiDioskan chu kinTlatkan. «Wa yuma litalakgapaskgoy xlakgskgatan Dios, chu xlakgskgatan akgskgawini: kaxati kawa nti ni tlaway wa ntu akgstitum, chu na ni paxkiy xtala, ni wa ntapakgsiniy Dios.» (1 Juan 3:10.)

Tala Pierce kawanilh tiku kilakgolh kʼuma escuela akxni kawanika pi naʼankgo kʼEscuela de Galaad xlakata kgalhikgo lakwan tayat, chuna la tataktujut chu kawanilh pi chuntiya xtataktujukgolh. Tuku kamasiyanikantit uma ni tlawa pi tlakg laklanka wixin ni xawa amakgapitsin; wata tlawa pi tlakg makxtum natawila xkachikin Dios xlikalanka katiyatni chu tlan liʼakxilhtit nawanatit xlakata tataktujut (Salmo 133:1). Tala Pierce wa: «La uku katsiyatita: chuntiya kakatsitit xlakata Jehová chu tlakg kalakgapastit».

«Xampi ni tu tlakg tlawaw xman wa ntlawaw wa ntu xkinkalimapakgsikanitan.» William Samuelson, superintendente xla Departamento xla Escuelas Teocráticas, kgalhskininalh: «¿La naʼakxilhaw tuku nakinkalakgayawakanan komo ni wa nema xlakaskinaw?». Kaʼakxilhwi tuku kinkamasiyaniyan umakgolh tachuwin, takilhtinit anta kLucas 17:7-10: «Akxni xlipaks xtlawatit wa ntu nkalimapakgsikantit, nawanatit: “Kin skujnin, ni xatalipawan nkin, sampi ni tu tlakg tlawaw xman wa ntlawaw wa ntu xkinkalimapakgsikanitan”». Xlikana pi komo natatalakxtumiyaw kiMalanakan, Jehová, akinin «ni xatalipawan nkin».

Tiku kilakgolh kʼuma escuela akglhuwa semana kgalhtawakgakgolh kpukgalhtawakga. Pero, makgapitsi tuwa makgkatsikgolh. Chuna lichuwinalh tala Samuelson: «Mimputumkan tlawatit tuku militlawatkan, chu la uku akxilhatit pi tlan kakitaxtunin, mintakanajlakan tlakg tatliwakglhli.» Chuna limasputulh xtaʼakgchuwin: «Skujnikan Malana xalak kʼakgapun la xatalipaw mayordomos akgtum lanka talakgalhaman miliʼakxilhatkan».

«Kalakapastaktit xtamalaknun Jehová akxni tuwa tuku natitaxtuyatit.» Sam Roberson, superintendente auxiliar xla Departamento xla Escuelas Teocráticas, kawanilh tiku kilakgolh kʼescuela pi xʼama min kilhtamaku akxni xtaxlajwanikgolh. Wa xlakata kawanilh pi akxni chuna xtitaxtukgolh xlilakapastakkgolh xalakgmakgan xlakskujnin Dios tiku kawanilh pi xʼama kamakgtaya. Akgtum liʼakxilhtit, Moisés liwana wanilh Josué: «Jehová [...] chuntiya natatawilayan. Ni miʼakstu katimakgxtakgni chu ni putum katimakgxtakgni» (Deuteronomio 31:8). Akxni xʼamaja niy, Josué tlan wa: «Putum xalakwan tachuwin wantuku wanit Jehová miDioskan paks kgantaxtunit» (Josué 23:14).

Jehová kamalaknuni xlakskujnin: «Ni lhtuj kaktimakgaxtakgni, na ni kaktimakgaxtakgni» (Hebreos 13:5). Xla kinkamalaknuniyan pi chuna natlawa la kilhchani xtukuwani («Xla Tlawa pi chuna Kakitaxtulh») natlawa tuku natalakaskin xlakata nakakuentajtlawa xlakskujnin. Wa uma tachuwin tuku kalimakgpuwantinilh tala Roberson: «Ni kataxlajwani, katayani, chu chuntiya kaliskujti. Kalakapastaktit pi Jehová nipara makgtum chu nikxni nakamakgalipuwanan».

«Xlikatlanka nkatiyatna ntakgawaninit xtamakatsininkan.» (Romanos 10:18.) Mark Noumair, chatum tiku kamakgalhtawakgelh, na matitaxtilh pulaktum tiku kgalhtawakgakgolh kxalak alakatanu países lichuwinankgolh o limasiyakgolh la kakitaxtunilh akxni lichuwinankgolh Dios lakatsu kPatterson. Akgtum liʼakxilhtit, akgtum tamakgaxtokgat xalak Sudáfrica tekgskgolh kgalhatutu lakpuskatin xalak xpaís chu katachuwinankgolh ktachuwin zulú chu xhosa. Chu atanu tamakgaxtokgat xalak Sri Lanka tatanokglhli chatum chixku xalak India chu xpuskat chu xtsumat nema lamakgolh kSri Lanka. Chixku nikxni xʼakxilhnit maktum Biblia, wa xlakata uma tamakgaxtokgat xatapaxuwan makgxtakgnikgolh Biblia nema xlinkgo.

«Paks tlan nakatsiy lantla natlaway xlipaks ntu ntlan.» Gene Smalley, chatum tiku makgtayanan kComité de Redacción, kakgalhskilh akgtiy tamakgaxtokgat tiku makgalhsputukgolh xtakgalhtawakgakan. Tamakgaxtokgat xalak Sierra Leona lichuwinalh pi chali chali xʼankgo xkgatkgo chu xlinkgo kxchikkan. Pero xlakata xlipaxuwakgo xlakata 50 tiku xkamakgalhtawakgamakgolh, uma ni lu tuwa xʼakxilhkgo. Umakgolh tamakgaxtokgat paxtikatsinikgolh xlakata tuku kamasiyanika, xlakata kamakgtayanit xlakata tlan «natlawa[kgo] xlipaks ntu ntlan» kilhtamaku nema aku mima (2 Timoteo 3:16, 17).

«Katayani asta xlisputni chu lata natalakaskin.» Gerrit Lösch, tiku namakgtapakgsi Lakgkgolotsin tiku Pulalinkgo xTatayananin Jehová, limatsukilh xapulana taʼakgchuwin niku wa, xlakata tiku kgosnankgo lakputsakgo la namakgalhsputukgo takgosni. Maski akxni kgosnankan kaj chatum natlajanan, tiku kstalaninanin Cristo natlajanankgo putum tiku natayanikgo asta kxlisputni kakilhtamaku.

Tiku kstalaninanin Cristo, tayanikan wamputun pi skujnanikan Dios putum kilhtamaku, chu ni mastakan talakaskin pi taʼakglhuwit, taputsastalanit, chu tuku kaliʼakxilhkan o ni nakgantaxtu tuku wankanit uma natlawa pi nialh nakanajlaya takgalhkgalhin. Jesús wa: «Wampi wa nti ntliwakglh natawilay kxtakanajlani asta kxlikgatsputni, wa yuma naʼakgaputaxtuy» (Mateo 24:13). ¡Lu kinkamatliwakglhan xlakata katsiyaw pi Jehová chu Jesús kuentajtlawa xlakata tayaniyaw! Alistalh tala Lösch lichuwinalh makgapitsi tuku lu xlakaskinka nema kinkamakgtayayan xlakata natayaniyaw maski kgalhiyaw taʼakglhuwit. Kaʼakxilhwi makgapitsi:

  • Tlawanikan oración Dios, «wanti mastay ntapaxuwanaliyan» chu «chali chali kinkamakgtayayan xlakata [...] laktsinka kintakukakan» (Romanos 15:5; Salmo 68:19).

  • Kalakpuwaw pi ni namakgxtakgnanaw chu liwana kakanajlaw pi «Dios ni makgxtakgnan, chu ni katimastalh talakaskin [pi xlakskujnin] tlakg nakamatlawiputunkanatit tuku nila natayaniyatit, wata akxni nachin tuku nitlan na nakamakgtayayan xlakata tlan natayaniyatit» (1 Corintios 10:13).

  • Putum kilhtamaku kalilakapastakwi kintakgalhkgalhinkan. Xlakata Jesús, tiku kiliʼakxilhatkan, Biblia wan: «Tipatinalh [...] [«kkgantum kiwi», TNM], ni lilakapastakli mpala limaxana» (Hebreos 12:2).

Tala Lösch wa pi nila taxlajwaniyaw uku xlakata nialh lhuwa tsankga nachanaw niku kilichanatkan. «Katayaniw niku kgosnamaw nema wilikanit kkilakatinkan.» (Hebreos 12:1, TNM.)

Chatum tiku xkgalhtawakgama limakgalhsputulh uma programa xlakata likgalhtawakgalh akgtum tatsokgni nema xwan la xpaxtikatsinikgo takgalhtawakga nema makgamakglhtinankgolh. Uma tatsokgni xwan pi xlakata liwana kamasiyanika xlakata la lakgtsokgwilika Biblia ni kaj watiya akgatekgskgolh xlakata xtalakaskin Dios, nachuna lu kamatliwakglhnilh xtakanajlakan. Tatsokgni xwan «liwana lakpuwanitaw naktlawayaw putum tuku laktlan katsininitaw».