Ankan kxpulakni

Xtatayananin Jehová

Laksakkan tachuwin totonaco

Graduación xla clase 136 xla Escuela Bíblica de Galaad

Graduación xla clase 136 xla Escuela Bíblica de Galaad

Akxni akgasputli curso xaʼakgkitsis papaʼ, clase 136 xla Escuela de Galaad tlawaka graduación sábado 8 xla marzo kata 2014. Uma escuela kamakgtaya xtatayananin Jehová nema lhuwa tuku titaxtukgonit xlatamatkan xlakata tlakg tlan nalichuwinankgo Dios chu namatliwakglhkgo xtakanajlakan xnatalan. Kʼuma tamakxtumit kilakgolh 11,548 latamanin. Lhuwa anta akxilhkgolh niku tlawakan uma escuela xla xtatayananin Jehová kPatterson (Nueva York), chu amakgapitsin nema matitaxtika kʼauditorios xla Canadá, Estados Unidos, Jamaica chu Puerto Rico.

«Kakgalhitit watiya yuma ntalakapastakni.» David Splane, kgolotsin tiku makgtapakgsi tiku Pulalinkgo xTatayananin Jehová, matitaxtilh taʼakgchuwin. Tuku lichuwinalh xtakilhtinit kFilipenses 2:5-7, nema wan «Kakgalhitit watiya yuma ntalakapastakni wantu na xkgalhi nCristo Jesús». Akxni xlama kKatiyatni, ni xlakaskinka xʼakxilha tuku xlitaxtu; wata taktujulh chu xliputum xlatamat tlawalh taskujut nema xlakgayawanit Dios.

Tala Splane, masiyalh pi Jesús xlakaskinka xkaʼakxilha amakgapitsi kskujnin Dios. Akgtum liʼakxilhtit, akxni makgtutu xliʼakxilhputun Akgskgawini kdesierto, Jesús kgalhtilh «chuna ntatsokgnit» chu kilhtiyalh xtachuwin Moisés xla xtaʼakgchuwin nema xkamaxkinit kachikin Israel (Mateo 4:4, 7, 10; Deuteronomio 6:13, 16; 8:3). Maski xKgawasa Dios chu Mesías xwanit, tlan wi tuku xtilikgalhtilh Akgskgawini xlakata xkgalhi limapakgsin. Pero taktujulh, limasiyalh pi lanka xtapalh xʼakxilha xtaskujut Moisés. Akinin na xlakaskinka naʼakxilhaw tuku lu tlan tlawakgo amakgapitsin chu nakawaniyaw pi tlan taskujut tlawakgo.

Alistalh kxtaʼakgchuwin lichuwinalh xatlan tayat nema Jesús masiyalh akxni xʼmakgalhsputumaja tuku xlakgminit kKatiyatni. Kʼakgtum oración nema wanilh xTlat: «Kmatlankinitan yunu nkatuxawat, na kmasputunit ntaskujut ntu nkintimaxki naktlaway. Wa nchuj Tataj, kakimatlanki wixa kmimpaxtun, watiya litlanka ntu xakkgalhiy kmimpaxtun akxni ni naj xanan nkatuxawat» (Juan 17:4, 5). Jesús ni kskima pi akxni xchampa kʼakgapun xlakgayawaka tuku lu xlakaskinka, kaj xtlawaparaputun taskujut nema xlakgaya xapulana. Tiku kilakgolh kʼGalaad natlawakgo la Jesús komo ni wa tlakg xlakaskinka naʼakxilhkgo tuku litaxtukgo, wata wa nakuentajtlawakgo taskujut nema nalakgatayakgo. Chuna napaxuwakgo maski ni nakalakgayawakan tuku lu xlakaskinka akxni nachankgo niku kamalakgachamaka.

«Tuku nalimakgxtakgatit nialh nalakapastakparayatit.» William Malenfant, xmakgtayana Lakgkgolotsin tiku Pulalinkgo xTatayananin Jehová xla Comité de Enseñanza, kawanilh pi nachuna xtlawakgolh la apóstol Pablo, tiku lhuwa tuku limakgxtakgli xlakata kskujnilh Dios. Pablo nialh xlakglipuwan tuku xmakgxtakgnit. Xla wa: «Kpatsanka xalamakasa chu kliskuja xlakata naklakgchan tuku wi klakatin. Tuku klakgchamputun» (Filipenses 3:13, 14, La Palabra de Dios para Todos).

Komo chuntiya wi tuku nalimakgxtakgkgo chu nialh nalakapastakkgo, nachuna tlawamakgolh nawan la skujnin xalamakgasa chu xala uku tiku ni makgxtakgkgolh Dios. Tala Malenfant lichuwinalh Clara Gerber Moyer, tiku tsukulh skujnani Dios akxni aktsujku xwanit. Xla tsokgli: «Akgtum talakgalhaman akxni klakapastaka tatipuxam kata la kskujnanilh Dios, chu ni klakpuwan pi nitlan tuku ktlawalh. Komo amakgtum xaklatamapa [kiltamat] chuntiya xaktlawapa tuku ktlawalh».

«Kalichuwinantit Tamapakgsin chuna la tlawakgo ángeles chu la likatsikgo ángeles.» Gerrit Lösch, tiku makgtapakgsi Lakgkgolotsin tiku Pulalinkgo xTatayananin Jehová, kalimalakapuwanilh akgtiy talakgalhaman nema kgalhikgo tiku lichuwinankgo Dios. Pulaktum, akxni linkgo tamakatsin xla xalakwan xalaksasti xla Tamapakgsin, nachuna tlawakgo la ángeles, xlakata uma tachuwin «ángel» xalak Biblia xagriego chu xahebreo wamputun «makatsinina». Nachuna, ángeles wa tiku kapulalin kxtaskujutkan, chuna la pulalinkgolh stalanina Felipe (Hechos 8:26-35).

Alistalh, tala Lösch lichuwinalh lanit akxni xlichuwinamaka Dios. Lichuwinalh Gabino, chatum xtatayana Jehová xalak México xla kaj makgtum o makgtiy tlakga malakcha kʼakgatunu chiki. Pero kʼakgtum chiki tlakgli makgtati. Taxtulh chatum chixku chu wanilh: «¿Akxilha tasiw nema waka talhman? Akxni xlimakgtati tlakgti, xakwilinita kkimpixni. Pero ktapixtupa xlakata xakmalakkinin malakcha. Paxkatsinilh xlakata makglhuwa tlakgti, komo wix ni chuna xtitlawa akit xaktapixchitawakalh».

Uma tuku lalh max kaj anta lakgchalh, pero makglhuwa akxni chuna la ni kaj xalan. Uma limasiya pi xʼángeles Dios xlikana pulalinkgo tiku lichuwinankgo Dios xlikalanka katiyatni (Apocalipsis 14:6).

«Tiku tlakg tlan likatsikgo nakasikulunatlawakan.» Michael Burnett, tiku masiyalh kEscuela de Galaad, kxtaʼakgchuwin lichuwinalh xliʼakxilhtit Jabez, xalak xfamilia Judá. Biblia wan pi xla «tlakg tlan xlikatsi nixawa xnatalan». Makgtum, Jabez skinilh Dios pi kskulunatlawalh, chu xmalankilh xtiyat, xmakgtayalh chu xkuejtlawalh xlakata ni xlakgchilh tuku nitlan (1 Crónicas 4:9, 10).

¿La tlan nachuna xtlawakgolh tiku kilakgolh kʼGalaad? Akxni liwana xwanikgolh Dios tuku xlakaskinkgo. Pulaktum tuku tlan kskinikgolh wa xkamakgtayalh xlakata tlan xmakgantaxtikgolh tuku xlakata kilakgolh kʼGalaad. Nachuna, tlan naskiniyatit kakakuentajtlawan, ni kaj kamasputulh tuku nitlan, wata kakamaxkin litliwakga xlakata natayaniyatit talipuwan chu tuku tuwa natitaxtuyatit. Chuna la Dios kgaxmatnilh xʼoración Jabez, na nakgaxmata xʼoracioneskan tiku kilakgolh kGalaad.

«Ni kamastatit talakaskin pi namixa lhkuyat.» Wa uma tuku lichuwinalh Mark Noumair, tiku masiyalh kʼEscuela de Galaad chu na makgtayanan kʼComité de Enseñanza. Texto nema lichuwinalh wa 1 Tesalonicenses 5:16-19. Wa pi xlakata chuntiya napasa lhkuyat pulaktutu tuku talakaskin: gas, un, chu lhkakna. Nachuna, tiku kilakgolh kʼGalaad pulaktutu tuku maklakaskinkgo xlakata chuntiya napaxuwakgo akxni nalichuwinankgo Dios.

Xapulana tuku maklakaskinkgo wa tapaxuwan anta 1 Tesalonicenses 5:16 wan: «Xaliʼankgalhin kapaxuwatit». Xlakata tlakg napaxuwakgo, tiku kilakgolh kʼGalaad xlilakpuwanatkan tuku tlan kitaxtu xlakata Jehová tlan kaʼakxilha. Chuna la gas, tapaxuwan natlawa pi tlakg nalichuwinamputunkgo Dios. Xlipulaktiy wa oración. Versículo 17 wan: «Ni anan xtajaxni nkatlawatit mioraciónkan». Oración litaxtu la un nema talakaskin chuntiya kapasalh lhkuyat. Lu tlan komo laklhman chu liwana nalakpuwanaw tuku nawaniyaw Jehová nema taxtuyacha kkinakujkan. Xlipulaktutu nema talakaskin limin kversículo 18: «Xlipaks kalimastatit mpaxkatsinit». Tapaxtikatsini wa lhkakna nema tlawa pi chuntiya lu napaxuwayaw. Akxni paxtikatsininanaw, ni mastayaw chuna la talalinaw Jehová chu kinatalankan nalakgmixa. Tala Noumair kawanilh tiku kilakgolh kʼGalaad: «Chuntiya kapaxtikatsininantit». «Chuna ni katiwantit tuku nitlan xpalakata amakgapitsin».

«Nachuna kamalankitit Jehová la tlawakgo akgapun.» Sam Roberson, tiku masiyalh kEscuela de Galaad, xtakilhtinit xtaʼakgchuwin kversículos nema lichuwinan pi Chichini, Papaʼ chu staku malankikgo Jehová (Salmo 19:1; 89:37; 148:3). Akxni xlichuwinanita pi tiku kilakgolh kʼGalaad na xmalankikgonit Jehová akxni lichuwinankgolh, tala Roberson kawanilh pi xmatitaxtikgolh liʼakxilhtit tuku lu tlan kakitaxtunilh akxni lichuwinankgolh Dios. Akgtum liʼakxilhtit, makgtum chatum tiku kilalh kʼGalaad xmatlawanima xputlawaw chu tachokgolh xlakata tlan xʼakgpakgosli tiji chatum chixku tiku xʼan ksilla de ruedas. Uma chixku lu paxtikatsinilh, chu alistalh tatanokglhpa chu wanilh pi lu tlan tuku xtlawanit. Uma tlawalh pi xmatsukilh takgalhchuwin, chu uma chixku makgamakglhtinalh akgtum takgalhtawakga xalak Biblia. Akxni xʼankan maxkikan takgalhtawakga xalak Biblia, tiku kilalh kʼGalaad tlan xkalitachuwinan Dios tiku xlakgapaxialhnankgo. Xlakata ama takgalhchuwin, kgalhtujun tiku makgamakglhtinankgolh takgalhtawakga xalak Biblia.

«Liwana kamaklaskintit tuku kamasiyaniman Dios xlakata tliwakga nawanatit.» Donald Gordon, makgtayanan kʼComité de Publicación, kakgalhskilh chatiy tamakgaxtokgat tiku kilakgolh kʼGalaad. Chatum tala wa pi anta kcurso lichuwinanka tuku wan Efesios 3:16-20. Katsinikgolh komo xtaktujukgolh chu tlan katachuwinankan, chu naʼakxilhkgo pi Jehová chuntiya nakamaxki taskujut putum kskujnin, xla «tliwakga» nakatlawa. Chatum tala puskat, lakgatilh limasit nema maklakaskilh chatum tiku masiya kʼEscuela de Galaad. Xla kawanilh tiku kilakgolh kʼGalaad pi xlitaxtuputunkgolh la tantum aktsu skiti (tamakgnin) kʼakgtum lanka pupunu, ni la lanka skiti kʼakgtum aktsu pecera, niku nialhla stakkan. Tala puskat wa: «Uma kimasiyani pi komo naklitaxtu la tiku ni lanka kxkachikin Jehová, xla nakimaxki talakaskin nastaka kintakanajla».

«Jehová kakalakapastakni tuku tlan.» Mark Sanderson, tiku makgtapakgsi Lakgkgolotsin tiku Pulalinkgo xTatayananin Jehová, wa tiku kamaxkilh taʼakgchuwin tiku kilakgolh kʼGalaad. Tuku lichuwinalh kilhtiyalh ktachuwin nema Nehemías wanilh Dios. Xla tsokgli: «Kakilakapastakti, chuna, oh kiDios, xlakata tlan nakinkitaxtuni» (Nehemías 5:19; 13:31). Nehemías nitu xlakpuwama pi Jehová xʼama patsankga chu taskujut nema xtlawanit. Wata tuku kskinima pi tlan xlakapastakli chu ksikulunatlawalh.

Tiku kilakgolh kʼGalaad nachuna liwana xlikatsitkan pi Jehová tlan nakalakapastaka komo namakgantaxtikgo tuku kamasiyanika kcurso. Tuku kamasiyanika wa pi naskujnanikgo Dios kaj xlakata paxkikgo chu ni kaj wi tuku namakglhtinamputunkgo (Marcos 12:30). Abrahán, akgtum liʼakxilhtit, xliputum xnaku paxkilh Jehová, chu xla tlan lakapastaka. Asta akxni xtitaxtunita akgtum mil kata lata xninita Abrahán, Jehová wanilh «kiʼamigo» (Isaías 41:8).

Alistalh, tala Sanderson kamalakapastakalh tiku kilakgolh kʼGalaad pi xlipaxkitkan xtalatamankan, tlakg liwaka xnatalankan tiku na watiya takanajla kgalhikgo (Marcos 12:31). La xatlan samaritano tiku tlan likatsinilh xtalataman tiku judío xwanit chu wilinikgolh kgalhananin, tiku kilakgolh kʼGalaad wa pulana namakgtayaputunkgo tiku wi tuku maklakaskima (Lucas 10:36). Lichuwinalh Nicholas Kovalak, tiku na kilanit kʼGalaad chu superintendente de distrito wa chu xlilakgapaskan pi lu tlan xlikatsi chu xkapaxki amakgapitsin. Makgtum, xlakata xmatliwakglhputun chatum superintendente de circuito chu xpuskat xlakata tlakg lhuwa kskujnikgolh Dios kawanilh: «Sok tantaku, sokg akgatunu semana, sokg akgatunu papaʼ chu sokg akgatunu kata». Pero akxni xʼakxilhnita makgapitsi kilhtamaku la skuja tala puskat. Wanilh: «Ni kuentajkatlawa tuku kwa ama kilhtamaku. Lhuwata tuku tlawaya. Tsinu kalimakti, chuna tlakg makgas naskujnaniya Dios». Xtachuwin nema wanilh chu limasiyalh pi xlakgalhaman, makgtayalh uma tala puskat xlakata chuntiya skujnanima Jehová lhuwa kata.

Tala Sanderson limakgalhsputulh, kawanilh pi xkamasiyanikgolh amakgapitsin la xtlawakgolh taskujut chu xlakan chuntiya xmakgantaxtikgolh tuku xkalakgayawakanit (2 Timoteo 2:2). Komo chuna natlawakgo, tlan namakgantaxtikgo tuku kamasiyanika kcurso: nakamatliwakglhkgo natalan chu tlawakgo pi akxtum natawilakgo xkachikin Dios, chu liwana nakatsikgo pi Jehová tlan nakalakapastaka (Salmo 20:1-5).

Tuku lisputli. Akxni xmakglhtinankgonita xdiplomaskan, chatum tiku lakgayawaka nalikgalhtawakga carta xlakata tiku kilakgolh kʼEscuela de Galaad paxtikatsininankgolh. chu xaʼawatiya, 15 tiku kilakgolh kʼEscuela de Galaad ni maklakaskinkgolh tatlakgni akxni kilhtlikgolh takilhtlin 123 xla libro Cantemos a Jehová, nema wanikan «Nuestros pastores son un regalo de Dios».