Ankan kxpulakni

Xtatayananin Jehová

Laksakkan tachuwin totonaco

Graduación xla clase 134 xla Escuela de Galaad: «Na kakgalhitit xtakanajlakan»

Graduación xla clase 134 xla Escuela de Galaad: «Na kakgalhitit xtakanajlakan»

Sábado 9 xla marzo kata 2013 tatlawalh graduación xla clase 134 xla Escuela Bíblica de Galaad xla Watchtower anta niku kamakgalhtawakgakan xtatayananin Jehová, kPatterson (Nueva York). Uma escuela tlakg kamasiyani xtatayananin Jehová tiku lhuwata kata skujnimakgo Dios xlakata tlakg liwana nalichuwinankgo. Kilakgolh 9,912 chu anta xwilakgo xfamiliaskan, xʼamigoskan chu amakgapitsi tiku kawanika pi xʼankgolh.

Tiku pulalilh tamakxtumit wa Mark Sanderson, kgolotsin tiku na makgpulalin xTatayananin Jehová. Tala Sanderson kamalakapastakalh tiku xtamakxtumikgonit akxni lakatsukulh uma escuela, 1 xla febrero kata 1943, nema titaxtunita tutumpuxamakaw kata. Uma kilhtamaku, Nathan Knorr, tiku xpulalin escuela, wa uma tachuwin nema limasiya takanajla chu wa tuku xlakata tlawaka uma curso: «Lhuwa ciento chu miles latamanin xkgaxmatkgolh [xalakwan xalaksasti xlakata xTamapakgsin Dios] komo tlakg lhuwa xʼanalh tiku kskujkgolh. Xlakata xtasikulunalin Dios, tlakg naʼanan». ¿Kaj xmalakatsalima?

Kalakapastakwi uma: akxni aku xtsukunit clases, tala Knorr alh kMéxico xlakata xʼakxilhli niku tlan xkamalakgachaka misioneros nema xtagraduarlikgolh kʼescuela. Akxni kilalh, tlawaka akgtum tamakxtumit niku tapakgsi México chu kawanika pi xʼankgolh congregaciones nema xwilakgo 240 kilómetros xlimakgat chu 400 tamakxtumikgolh. ¿Chu tuku xlalh komo nachuna xtlawaka, akxni titaxtunita tutumpuxamakaw kata lata chinkgolh xapulana misioneros? Talakpuwan pi xtamakxtumikgolh liwaka 200,000 latamanin.

«¿Tuku kgalhiyatit kmimakankan?» Anthony Griffin, tiku makgtapakgsi kComité de Sucursal xalak Estados Unidos, mastalh taʼakgchuwin nema takilhtilh kʼÉxodo 4:2. Kʼuma versículo, Dios kgalhskilh Moisés: «¿Tuku chipanita?», chu Moisés kgalhtinalh: «Kgantum lixtokgo». Jehová xʼakxilha pi uma lixtokgo xkilhchanima limapakgsin chu taskujut nema xlakgayawanit (Éxodo 4:5). Dios makgtayalh Moisés akxni xlimaklakaskin limapakgsin xlakata nalimalanki; pero akxni limaklakaskilh xlakata xakstu namalankikan chu nakamaktuju xnatalan, chuna la tlawalh kMeribá, Jehová malakgaxokgelh (Números 20:9-13).

Tala Griffin tamalakxtumilh xlixtokgo Moisés tuku kamasiyanika tiku kilakgolh kʼGalaad. Chuna, kawanilh pi putum kilhtamaku tlan xlimaklakaskinkgolh limapakgsin nema kgalhikgo chu kastakyawalh: «Putum tuku kamasiyanikanitantit wa kalimalankitit Jehová. Chuna chuntiya akgtum tasikulunalin nalitaxtuyatit xpalakata tiku nakaskujniyatit».

«Kalakapastaktit maná.» Stephen Lett, kgolotsin tiku na makgpulalin xtatayananin Jehová, lichuwinalh pulaktati tuku kinkamasiyaniyan xlakata milagro nema tlawalh Dios anta kdesierto akxni kamaxkilh maná israelitas.

  • Chuntiya lhuwa naskujaw (Números 11:8). Xlakata tlan xwakgolh maná, tunkun xlisakitkan xwanit, xlakata xkaxtlawakgolh chu xmakchakgolh (Éxodo 16:21).

  • Nikxni kawaw pi nitlan tuku kinkamaxkiyan Jehová (Números 11:5, 6). Israelitas ni lakgatikgolh akxni kamaxkika maná chu Dios akxilhli pi xlakgmakgamakgo. La uku, liwat xla kintakanajlakan nema makglhtinanaw namin kilhtamaku ni liwaputu naʼakxilhaw; pero, chuna la maná, putum kilhtamaku nakinkamatliwakglhan. Kilipaxtikatsinitkan putum tuku kinkamaxkiyan Jehová xlakata kintakanajlakan.

  • Lu kalipawaw pi Jehová nakinkamaxkiyan tuku maklakaskinaw. Israelitas nikxni katsankganilh maná. Asta, xlakata xkgalhikgolh tuku xwakgolh sábado, viernes tlakg xtakta (Éxodo 16:22-26). Nachuna, akinin liwana kilikatsitkan pi Dios nakinkamaxkiyan tuku maklakaskinaw (Mateo 6:11).

  • Jehová nikxni kasikulunatlawa tiku ni kgalhakgaxmatkgo (Éxodo 16:19, 20, 25-28). Jehová nitlan kaʼakxilhli israelitas xlakata sábado xmakiputunkgo maná. Chu tiku xmakikgo maná akxni xkawanikanit pi ni namakikgo, xmasa chu xluwala.

Tala Lett wa pi komo nalakapastakaw uma, natlawa pi Jehová nakinkamalakkiniyan «akgapun» chu xlikana nakinkamaxkiyan «tasikulunalin asta akxni nialh namaklakaskina[w]» (Malaquías 3:10).

«Katakaxtit xlakata nalatapayatit kxasasti kakilhtamaku.» Uma tema mastalh William Samuelson, superintendente xla Departamento de Escuelas Teocráticas. Wa pi akinin lu latamaputunaw kxasasti kakilhtamaku. Pero ¿takaxnitaw xlakata anta nalatamayaw? Xlakata anta nalatamayaw liwana kililakpuwanatkan (1 Pedro 4:7).

Tiku liwana lakpuwan liwana katsi pi makglakgalhina. Ni limawaka Satanás xlakata tuku nitlan tlawa chu nipara kakilhtamaku, chu ni lakpuwan pi kxasasti kakilhtamaku, akxni Dios namasputu tuku nitlan anan, natalakgpali. Tala Samuelson lichuwinalh pi la uku lu xlakaskinka ni namastayaw talakaskin pi natlawayaw tuku nitlan, la kiakstukan nakinkapaxkikanan chu nalilhakgananaw «xasasti tayat» (Efesios 4:24, TNM).

«Kamakgxtakgtit tuku litsokgnanatit.» Mark Noumair, chatum tiku kamakgalhtawakgalh wa pi min kilhtamaku «chipayaw tuku litsokgnanaw xlakata tsokgputunaw tuku tlawaw kkilatamatkan». Pero xla wa pi «namakgxtakgaw tuku litsokgnanaw» chu namastayaw talakaskin pi Jehová katsokgtilhalh tuku tlawayaw kkilatamatkan.

Maski mapakgsina Saúl pulana tlan xlikatsi, alistalh xla «tsokgputulh tuku tlawalh kxlatamat». Akxni mapakgsina wa, xtataktuju chu ni tlanka xmakgkatsikan (1 Samuel 10:22, 27; 11:13). Pero ni makgas kilhtamaku titaxtulh tsukulh tlawa tuku xla xlakpuwan chu putsalh pi wa namalankikan. Dios lakgmakgalh xlakata ni kgalhakgaxmatli (1 Samuel 14:24; 15:10, 11).

Tala Noumair wa pi maski tiku kilakgolh kʼescuela ni makgxtakgkgonit Dios asta la uku, chuntiya xliskujnitkan Dios chuna la xla lakaskin. Kawanilh: «Kuenta katlawatit, maski Dios kamaklakaskinan, ni wamputun pi tlan kinkaʼakxilhan». Akgtum liʼakxilhtit, Moisés ni tlawalh chuna la xwaninit Dios xlakata tlan xmaxtulh chuchut kchiwix. Maxtulh chuchut, pero Jehová ni sikulunatlawalh (Números 20:7-12).

«Akxtum katachuwinaw ángel nema lawaka kxʼitat akgapun.» Sam Roberson, atanu makgalhtawakgana, xtaʼakgchuwin xtakilhtinit kʼApocalipsis (Revelación) 14:6, 7. Alistalh wa pi xtitaxtukgolh makgapitsi tiku kgalhtawakgakgolh nema limasiyakgolh la kakitaxtunilh akxni lichuwinankgolh Dios papaʼ nema titaxtukgolh. Chatum tiku xpaksma xlakata xchukukanit litachuwinalh Dios chatum enfermera khospital. Xlakata xla xalak Perú, masiyanilh maktum foto nema tasiyalh kjw.org niku makgapitsi natalan xlichuwinamakgo Dios kChachapoyas (Perú). Uma tlawalh pi xla chu xchixku xmakgamakglhtinankgolh akgtum takgalhtawakga xalak Biblia.

«Kiʼakgskgawi [...] chu akit ktaʼakgskgawilh.» (Jeremías 20:7.) Allen Shuster, tiku makgtapakgsi kComité de Sucursal xalak Estados Unidos, kakgalhskilh akgtiy tamakgaxtokgat tiku kilakgolh kʼGalaad. Xlakan xlakpuwankgo pi Jehová xkaʼakgskgawinit. ¿Tuku xlakata? Wankgolh pi xapulana xlakpuwankgo pi nila xmakgantaxtikgolh tuku xkaskinika kcurso, pero tlan makgantaxtikgolh xlakata lhuwa kamakgtaya kcurso. Marianne Aronsson, chatum tiku kilalh kʼescuela lu paxtikatsininalh xlakata curso. Xla wa: «Nikxni ktiputsapa tuku naklikgalhtawakga, xlakata kkatsilh pi akgatunu versículo xalak Biblia lu xlakaskinka».

«Na kakgalhitit xtakanajlakan.» David Splane, kgolotsin tiku na makgpulalin xtatayananin Jehová, mastalh taʼakgchuwin nema pulalilh uma tamakxtumit. Takilhtilh kHebreos 13:7 niku wan: «Kalilakapastaktit mimpuxkunaninkan nti ntikalixakgatlikgon xtachuwin Dios. Kaliʼukxilhtit wa lantla nkitaxtunikgolh lakwan xtatlawkan kxlatamatkan, na kakgalhitit xtakanajlakan». Wa pi tiku xpulalinkgo xtatayananin Jehová tutumpuxamakaw katata limasiyakgolh xtakanajlakan. Kaʼakxilhwi la tlawakgolh.

Kata 1942, 24 xla septiembre Nathan Knorr kamamakxtumilh tiku xpulalinkgo akgtiy tamakxtumit nema xmaklakaskinkgo xtatayananin Jehová chu wa pi xtsukulh akgtum escuela: Galaad. ¿Tuku xlakata? Xlakata xkamasiyanikgolh misioneros nema xpulalinkgolh la xtalichuwinalh Dios niku nina xtalichuwinan. Pero, uma kilhtamaku ni lu tlan xwanit, xlakata tatlawalh xliʼAkgtiy Guerra xLikalanka Katiyatni chu uma tlawalh pi klhuwa países nila xtanukgolh misioneros. Nachuna, década nema xtitaxtunit ni lu xʼanan tumin chu chuntiyaku xwi. Chu xkachikin Jehová xkgalhi tumin xlakata kaj akgkitsis kata xtawi uma escuela. Maski chuna, limasiyakgolh takanajla chu wankgolh pi tlan chuna xtatlawalh.

Tiku kilakgolh akxni tsukulh Galaad na limasiyakgolh takanajla nema na kilikgalhitkan. Katsinikgolh nalipaxuwakgo tuku xkgalhikgo chu ni lhuwa tuku xkgalhiputunkgolh (Hebreos 13:5, 6). Lhuwa tiku kilakgolh kʼGalaad xlakpuwankgo pi nikxni xʼamakgo kaʼakxilhparakgo xfamiliajkan, xlakata ni xkgalhikgo tumin chu nila xkamakgtayakgo xlakata xkaxokgonikgolh xpasajekan. Chu asta akxni titaxtulh akgkaw o akgkukitsis kata kaʼakxilhparakgolh xfamiliajkan. Pero, putum liwana xkatsikgo pi Jesús chuntiya xʼama kakuentajtlawa chu nachuna xfamiliaskan, chuna la putum kilhtamaku xtlawanit (Hebreos 13:8).

Xapulana clase xla Galaad, 1943

Tala Splane lichuwinalh tuku titaxtukgolh makgapitsi misioneros nema xmakgtayanankgo kʼatanu país niku katuwa xwanit asta akxni nina xʼankgo kʼGalaad. Chu kawanilh tiku kilakgolh kʼescuela: «Wixin litaxtuyatit xasasti lakchixkuwin chu lakpuskatin tiku ni makgxtakgkgo Dios nema kilakgolh kʼEscuela de Galaad, chu chuntiya tlawapatit chuna la tsukulh tatlawa tutumpuxamakaw katata. [...] Xatapaxuwan kaskujnitit Jehová niku natawilayatit».

Tala Splane limasputulh xtaʼakgchuwin akxni masiyalh fotografías xla 77 tiku kilakgolh kʼescuela chu la uku skujmakgo ksucursal xla xtatayananin Jehová xalak Estados Unidos. Na anta tasiyalh maktiy fotos xla xapulana clase, nema tatlawalh kkata 1943. Nachuna, uma fotografías xkgalhi takilhtlin nema xmaklakaskinkgo xtatayananin Jehová tutumpuxamakaw kata nema titaxtunit.

Akxni sputli graduación kamaxkika diplomas, chatum likgalhtawakgalh maktum carta niku clase xpaxtikatsininankgo. Tala Sanderson limasputulh tamakxtumit niku wa pi maski titaxtunita tutumpuxamakaw kata, chuntiyaku makgtayanan tuku tala Knorr kawanilh xapulana clase: «Anta niku nakamalakgachakanatit, kalakapastaktit pi wixin [...] lichuwinanatit Tamapakgsin chu kgalhiyatit tlakg lanka talakgalhaman nema niti maxkimaka kKatiyatni: nalichuwinanatit xlilanka Dios la uku, akxni nina min Armagedón. [...] Xlakata kamaxkikanatit talakaskin nalichuwinanatit Dios, chuna katlawatit».