Ankan kxpulakni

Ankan xlipulaktiy niku tsuku

Xtatayananin Jehová

totonaco

Makglhtinankgolh Biblia kxtachuwinkan

Makglhtinankgolh Biblia kxtachuwinkan

Xtatayananin Jehová tlawakgo Traducción del Nuevo Mundo de las Santas Escrituras. Putum tiku nalikgalhtawakgaputun tlan nalikgalhtawakga.

Lhuwa tamakxtumit liskujkgonit xlakata natlawakgo Biblias klhuwa tachuwin, chu lhuwa millones makgpitsikgonit. Pero, lhuwa latamanin tuwa makgkatsikgo nakgalhikgo Biblia kxtachuwinkan. ¿Tuku xlakata? Xlakata makgapitsin ni kgalhikgo tumin nema tlan nalitamawakgo. Nachuna, makgapitsi takanajla ni maxkikgo Biblias tiku atanu takanajla makgtapakgsikgo. Wa xlakata, xtatayananin Jehová tlawakgonit Traducción del Nuevo Mundo de las Santas Escrituras kliwaka 115 tachuwin chu kamaxkikgo tiku lakaskinkgo.

Kaʼakxilhwi makgapitsi liʼakxilhtit:

  • Ruanda. Silvestre chu Venantie, akgtum tamakgaxtokgat tiku kgalhikgo kgalhtati xkamanankan, wankgo: «Xlakata ni kkgalhiyaw tumin, nila xaktamawayaw Biblia chu ni xakkgalhiyaw kinchatunukan. Pero la uku kkgalhiyaw Traducción del Nuevo Mundo de las Santas Escrituras kinkgalhchaxankan, ktachuwin kiniaruanda, chu chali chali akxtum klikgalhtawakgayaw».

    Chatum xpulalina takanajla anglicano kʼuma kachikin wa: «Uma Biblia tlan klikgalhtawakga chu kʼakgatekgsa. Asta tlakg tlan ni xtachuna Biblias nema klikgalhtawakgakgonit. Xtatayananin Jehová xlikana kalilakgaputsakgo latamanin».

  • República Democrática del Congo. Makgapitsi takanajla nema makgpitsikgo Biblias ktachuwin lingala, uma tachuwin wa tlakg tachuwinan kpaís, ni xkastamaxkikgo Biblias xtatayananin Jehová.

    Wa xlakata, xtatayananin Jehová xalak Congo lu paxuwakgolh akxni kamaxkika Traducción del Nuevo Mundo de las Santas Escrituras ktachuwin lingala kʼakgtum lanka tamakxtumit xaʼakgtutu kilhtamaku. Putum xpaxuwamakgolh, asta policías tiku xkuentajtlawanamakgolh kʼestadio makgtaʼakgstitumikgolh xlakata namakglhtinankgo maktum Biblia. Xtatayananin Jehová maklakaskinkgo uma Biblia chu lhuwa liskujkgonit xlakata namakgpitsikgo.

  • Fiyi. Biblia kFiyi lu laktapalaxla, uma tlawa pi lhuwa xtatayananin Jehová namaklakaskinkgo Traducción del Nuevo Mundo de las Santas Escrituras xaʼinglés. Pero lu paxuwakgolh kata 2009 akxni makglhtinankgolh Traducción del Nuevo Mundo de las Santas Escrituras (Nuevo Testamento) kxtachuwinkan.

    Chatum chixku nila xkanajla xlakata liwana xtakgatekgsa la xtsokgkanit, skilh maktum, pero xtatayananin Jehová wanikgolh pi xkgalhkgalhilh max akgtum papaʼ xlakata tlan xmaxkika. Xlakata lu xlakaskina, uma chixku alh max 35 kilómetros xlakata atanu xtatayana Jehová xmaxkilh maktum Biblia. Uma chixku wa: «Uma Biblia lu klakgati nixawa nema kmaklakaskin. Ni tuwa tachuwin maklakaskin chu ni tuwa akgatekgskan».

  • Malaui. Akxni Davide tsukulh katakgalhtawakga xtatayananin Jehová, makgapitsin xla takanajla bautista ankgolh kxchik chu makglhtikgolh Biblia nema xmaxkikgonit. Xlakata kMalaui lu laktapalaxla Biblias, Davide xlakpuwan komo xmilh kilhtamaku tlan xkgalhipa amaktum Biblia. Akxni tlawaka Traducción del Nuevo Mundo de las Santas Escrituras ktachuwin chichewa kgalhipa xBiblia kxtachuwin, xatapaxuwan wa: «¡La uku kkgalhi maktum Biblia chu tlakg tlan, ni xtachuna la xapulana!».

Tutumpuxam kata titaxtunit akxni mastaka kNueva York xapulana volumen xla Traducción del Nuevo Mundo de las Santas Escrituras kxaʼinglés, wa uma tuku wanka: «Putum kalikgalhtawakgatit. Liwana kalikgalhtawakgatit [...]. Kakamaxkitit amakgapitsi latamanin». Xlakata tlan xtamakgantaxtilh uma, tamakgpitsinita liwaka 175 millones xlilhuwa Traducción del Nuevo Mundo de las Santas Escrituras. Chu la uku na wi kʼInternet max ktipuxamakaw tanu tanu tachuwin.