Ankan kxpulakni

Ankan xlipulaktiy niku tsuku

Xtatayananin Jehová

totonaco

Taskujut xla traducción anta kMéxico chu kCentroamérica

Taskujut xla traducción anta kMéxico chu kCentroamérica

Anta kMéxico chu kʼakgkitsis países xla Centroamérica, wilakgo max 290 tiku makgtayanamakgo namatitaxtikan likgalhtawakga xalak Biblia xla xtatayananin Jehová kliwaka 60 tanu tanu tachuwin. ¿Tuku xlakata xlakaskinka uma taskujut? Xlakata akxni latamanin nalikgalhtawakgakgo uma likgalhtawakga kxtachuwinkan, ni tuwa akgatekgskgo chu tamakatsin lakgchan xnakujkan (1 Corintios 14:9).

Xlakata tlakg tlan natatlawa uma taskujut, makgapitsi traductores tiku skujkgo kʼoficinas xla xtatayananin Jehová anta kMéxico ankgonit kkachikin niku chuwinankan xtachuwinkan. La uku, traductores tlakg lakatsu katawilakgo tiku chuwinankgo uma tachuwin, chu uma kamakgtaya namatitaxtikgo likgalhtawakga kxtachuwinkan chuna la ni tuwa nataʼakgatekgsa.

¿Tuku lakpuwankgo traductores xlakata uma talakgpalit? Federico, tiku matitaxti likgalhtawakga ktachuwin náhuatl xalak Guerrero, wan: «Atsinu ni chan akgkaw kata nema xakwi kMéxico, kajwatiya akgtum familia ktekgsli tiku chuwinan kintachuwin. Pero kkachikinin nema lakatsu wilakgolh kxasasti oficina de traducción, atsinu ni putum latamanin chuwinankgo uma tachuwin».

Karin, tiku matitaxti likgalhtawakga ktachuwin bajo alemán chu alh kʼestado xla Chihuahua, wan: «Naklatama xlakgstipan menonitas kimakgtayanit tlakg naklakgapasa kintachuwin. Klamaw chu kskujaw kʼakgtum aktsu kachikin chu akxni ktalakaxtuyaw kventanas, kkaʼakxilhaw latamanin tiku nalitamakgtayakgo tuku ktlawayaw».

Neyfi, tiku matitaxti likgalhtawakga ktachuwin maya chu la uku lama kMérida (México), wan: «Akxni kmakgalhtawakgenanaw ktachuwin maya, liwana kakxilhaw tuku tachuwin ni taʼakgatekgsa. Wa xlakata tlan kputsayaw la tlakg tlan nakmatitaxtiyaw umakgolh tachuwin».

¿La litamakgtayakgo tiku likgalhtawakgakgo likgalhtawakga kʼumakgolh tachuwin? Kawiliw akgtum liʼakxilhtit. Max tipuxum kata, Elena, tiku chuwinan tlapaneco, akgatunu semana xʼan ktamakxtumit xaʼespañol xla xtatayananin Jehová. Pero ni xʼakgatekgsa tuku xmasiyakan. Xla wan: «Xakan ktamakxtumit xlakata xaklakpuwan pi anta kilitawilat xwanit». Pero akxni tsukulh likgalhtawakga Biblia chu limaklakaskilh makgapitsi folletos ktachuwin tlapaneco, tapaxkit nema xkgalhini Dios lu tatliwakgli, asta tamakamastanilh chu tamunulh kata 2013. Elena wan: «Kpaxtikatsini Jehová pi kimakgtayalh nakʼakgatekgsa xaxlikana».