Ankan kxpulakni

Ankan xlipulaktiy niku tsuku

Xtatayananin Jehová

totonaco

Xtamakatsin Biblia matitaxtikan ktachuwin xalak Irlanda chu Gran Bretaña

Xtamakatsin Biblia matitaxtikan ktachuwin xalak Irlanda chu Gran Bretaña

Xtatayananin Jehová lu kliskujaw xlakata tlan nakkatachuwinanaw latamanin tiku chuwinankgo tachuwin xalak Irlanda chu Gran Bretaña. * Anta unu, ni kaj inglés chuwinankan, na chuwinankan gaélico escocés, galés chu irlandés.

Septiembre kata 2012, ktlawaw xasasti kisitiojkan xla Internet kjw.org klhuwa tachuwin, nachuna kʼirlandés chu kʼgalés. Tachuwin gaélico escocés na wilika kpapaʼ agosto kata 2014. Nachuna, na kʼimprimirliyaw lhuwa likgalhtawakga kʼumakgolh tachuwin. ¿Tuku tlan kitaxtunit xlakata uma taskujut?

Tiku pulalin pusikulan makglhtinalh maktum tratado xalak Biblia ktachuwin gaélico escocés chu akxni likgalhtawakgalh tsukulh tasa. ¿Tuku xlakata tasalh? La liwana xmatitaxtikanit uma tratado chu wa: «¿Tiku tlawalh uma? ¡Lu stlan!».

Tiku tanukgolh ksitio jw.org 750 latamanin ktachuwin gaélico escocés xapulana papaʼ.

Chatum makgalhtawakgena xalak Universidad Nacional xalak Irlanda, kʼGalway, kawanilh xtatayananin Jehová pi ni xlakgati xlakata takanajla. Pero, akxni katsilh pi tlan xmakglhtinalh kʼirlandés folleto nema wanikan Biblia chu tuku lichuwinan, skilh maktum. Wa pi likgalhtawakga nema takilhtinit kBiblia putum latamanin tlan xmakglhtinankgolh kxtachuwinkan chu kawanilh xtatayananin Jehová pi lu tlan tuku xtlawamakgolh xlakata tlawakgolh likgalhtawakga kʼirlandés.

Chatum puskat tiku lina kata makgapaxuwalh pi xtatayananin Jehová maxkikgolh folleto kʼgalés. Xla wa: «Nakkawaniyan tuku xaxlikana, komo xaʼinglés xkintilamaxkiw, max ni xaktimakglhtinalh. Pero lu klakgati pi kkintachuwin tatsokgnit».

Agosto kata 2014, tlakg wiliparaka kjw.org likgalhtawakga kʼgalés. Uma papaʼ, tiku tanukgolh ksitio xlakata nalikgalhtawakgakgo kxtachuwinkan tlakg taliwakalh.

«Watiya tachuwin kchuwinanaw»

Makgtum, akxni Jesús makgas xkalitachuwinanita Tatsokgni chatiy xdiscípulos, xlakan wankgolh: «¿Ni xlakgpasatilha kinakujkan akxni xkinkatachuwinantilhaman ktiji, chu liwana xkinkawanitilhaman tuku kilhchanima xTachuwin Dios?» (Lucas 24:32, TNM). Akxni kamasiyanikan latamanin tuku xalak Biblia kxtachuwinkan, lhuwa makgkatsikgo pi liwana akgatekgskgo Tatsokgni chu uma kalakgpalini xlatamatkan.

Emyr, chatum chixku xalak Gales tiku tamakgaxtokga chatum xtatayana Jehová, nikxni xlakgatinit xtakanajla xpuskat. Pero akxni lu tlan tsukulh talalin chatum tala wanikan Russell, nialh chuna lakpuwa. ¿Tuku xlakata? Emyr wa: «Klikgalhtawakgaputulh Biblia akxni Russell kimaxkilh libro ¿Tuku xlikana masiyay Biblia? * chu kiwanilh: “Uma libro tatsokgni kʼgalés, chu la uku natsukuyaw likgalhtawakgayaw kinchatiykan”». ¿Tuku xlakata lakgatilh Emyr akxni chuna wanika? Xla wan: «Kinchatiykan watiya tachuwin kchuwinanaw, watiya talismanin kkgalhiyaw chu klaʼakgatekgsniyaw». Xnaku Emyr “xlakgpasa” akxni xlikgalhtawakga Biblia kʼgalés xlakata liwana xʼakgatekgsni.

Xtatayananin Jehová chuntiya kamakgtayamakgolh latamanin nakatsinikgo tuku xaxlikana masiya Biblia, kxtachuwinkan nema kalakgchan kxnakujkan.

^ párr. 2 Kʼuma artículo akxni nawiliyaw Gran Bretaña lichuwinamaw Escocia, Gales chu Inglaterra.

^ párr. 11 Maktum libro nema limakgalhtawakgenankgo xtatayananin Jehová.