Ankan kxpulakni

Ankan xlipulaktiy niku tsuku

Xtatayananin Jehová

totonaco

Maktum Biblia nema nitu lani

Maktum Biblia nema nitu lani

Xtatayananin Jehová ni anan atanu libro nema tlakg xlakaskinka akxilhkgo, kajwatiya Biblia. Putum kilhtamaku kmaklakaskinaw xlakata nakkgalhtawakgayaw chu nakkamasiyaniyaw amakgapitsin xalakwan tamakatsinin xla xTamapakgsin Dios (Mateo 24:14). Xlikana, talakgxtu akxni ankgalhin maklakaskinkan. Wa xlakata, lakputsaka xlakata xasasti Biblia Traducción del Nuevo Mundo xla kata 2013 kxaʼinglés makgas xmakgapalalh chu nachuna stlan xtasiyalh.

Xakmaklakaskinaw maktum Biblia nema nitu xlanilh. Chu wa uma tuku wanikgolh tiku kskujkgo kʼimprenta xalak Estados Unidos xla xtatayananin Jehová chatum gerente xla akgtum empresa niku xkawilinikan xmakni libros. Gerente liwana kawanilh: «Biblia nema wixin lakaskinatit nitu anan. Lu nitlan pero atsinu ni putum biblias katlawakanit xlakata kaj nalikaxtlawanankan kʼakgtum mesa o nawilikan klibrero, ni xlakata makgas natayani».

Xmakni Biblia Traducción del Nuevo Mundo nema pulana xkatlawakanit ni liwana xlachipa. Asta xlamakgxtakga niku lu lhkaknan chu lu kachitwa. Xlakata tlan xtlawakgolh maktum Biblia nema tlan xtamaklakaskilh chali chali chu kaniwa, tiku kskujkgo kʼimprenta liʼakxilhkgolh pulaklhuwa tuku tlan xmaklakaskinkgolh xlakata tlan xtlawakgolh xmakni Biblia, chu nachuna tanu tanu lislaman chu la xwilinikgolh xmakni. Akxni putsanankgolh, tlawakgolh makgapitsi nema wilinikgolh xmakni Biblia xlakata tlan xliʼakxilhkgolh. Alistalh kaskinikgolh chalhuwa xtatayananin Jehová xlakata xmaklakaskinkgolh makgapitsi papaʼ, makgapitsi xlamakgo niku lhkaknan chu amakgapitsi niku lu xlonkgnan, la kʼAlaska.

Akxni titaxtulh akgchaxan papaʼ, umakgolh xtatayananin Jehová maspitparakgolh biblias. Tiku kskujkgo kʼimprenta putsananikgolh chu tlakg tlan tlawaparakgolh xlakata xtlawaparakgolh makgapitsi biblias. Xliputum, tamaklakaskilh 1,697 biblias xlakata xkaliʼakxilhka. Makgapitsi liʼakxilhka maski ni chuna xtalakkaxwilinit. Akgtum liʼakxilhtit, maktum tamakgxtakgli kkasen tantaskaka chu atanu tsankgalh kchuchut akxni titaxtulh unisen. Putum uma, asta tuku nichuna xtalakkaxwilinit, lu makgtayanankgolh.

Kkata 2011, akxni chuna xkaliʼakxilhmaka biblias, katamawaka encuadernadoras nema lakapala katlawa xlakata xmaklakaskinka kʼimprentas xalak Ebina (Japón) chu Wallkill (Nueva York, EE. UU.). Ni kajwatiya xkatlawaputunkan biblias nema xtalakaskin, wata watiya biblias xtamakxtukgocha umakgolh imprentas.

Tuku nitlan xwanit xlakata xatsatata xmakni

Akxni xtsukuma kata 2012, akgtiy imprentas tsukukgolh tlawakgo Traducción del Nuevo Mundo xla kata 1984 xatsitsakga xwanit xmakni chu xagranate tuku xasasti tsukuka litlawakan, plástico nema litalakgapasa poliuretano. Pero, xmakni nitlan xtaslama akxni xkaslamawakanikan xapáginas. Lislaman chu forros nema xtamaklakaskin kxalaksasti encuadernadoras nina xtamaklakaskin kbiblias nema xkaliʼakxilhmaka. Maski xlakkaxtlawaputunkan uma taʼakglhuwit, machokgoka tuku xkatlawamaka.

Tiku xtlawakgonit tuku xmaklakaskimakgo, wankgolh pi chuna kitaxtu akxni katlawakan xmakni libros nema xatsatata chu lu tuwa lakkaxtlawakan. Maski chuna, tiku kskujkgo kʼimprenta ni wankgolh pi kajwatiya natlawakgo xmakni biblias nema xapalha. Liwana xlakpuwankgonit natlawakgo xmakni xatsatata nema tlan xtaxtucha. Akgtati papaʼ putsananikgolh lislaman chu forros, asta akxni lakkaxtlawakgolh uma taʼakglhuwit. Ama kilhtamaku, tsukuparakgolh imprimirlikgo.

Machokgoparaka impresión

Kseptiembre kata 2012, kawanika imprentas pi xmachokgokgolh impresión, pulana xmasputukgolh biblias nema xʼanan chu xkgalhkgalhikgolh asta akxni xtaxtulh xasasti Biblia Traducción del Nuevo Mundo. Uma Biblia xʼamaka mastakan 5 xla octubre kata 2013 ktamakxtumit xaʼakgatunu kata anta kWatch Tower Bible and Tract Society of Pennsylvania.

Kilhtamaku 9 xla agosto kata 2013, imprentas kamalakgachanika archivos electrónicos xla xasasti biblias chu lichali tsukuka imprimirlikan. Xapulana xatakgatsin Biblia tlawaka 15 xla agosto, nema xtaʼimprimirlinit chu xwilinikanit xmakni. Akgtujun semanas, imprentas xalak Estados Unidos chu xalak Japón tantaku chu tantaskaka skujkgolh. Chuna putum tiku kilakgolh ktamakxtumit xaʼakgatunu kata tlan xkamaxkika maktum.

Maski uma xasasti Biblia lu stlan tasiya chu makgapala, tuku tlakg xlakaskinka ni wa tuku litlawakanit, wata wa tuku lichuwinan: tamakatsin nema lakgmaxtunan. Lichali akxni makglhtinalh Biblia, chatum puskat xalak Estados Unidos tsokgnalh: «Xlakata uma xasasti Biblia, tlakg liwana kʼakgatekgsni».