«Klakaskin napina niku tlawakan grabación kColumbia, kNueva York, xlakata nakilhtliya akgtum takilhtlin xla kiʼhimnoskan chu natlawanikana akgtum xastlan grabación. Niti nawaniya.»

William Mockridge

Akxni xkgalhsputma kata 1913, William Mockridge makgantaxtilh uma tuku lu xlakaskinka xlakgayawanit Charles Taze Russell. * Ama tatlakgni, nema xwanikan «The Sweet By-and-By» («El día sin igual», nema min kxapulana tuku xlikilhtlikgo xaʼespañol xtatayananin Jehová), grabarlika xadisco xla 78 revoluciones akgatunu minuto. Alistalh, William katsilh pi xʼamaka maklakaskinkan xlakata xlimatsukika tatlakgni xla «Foto-Drama de la Creación», uma presentación niku xwilikan películas chu xtitaxtu imágenes xavidrio nema xkgalhi color chu lakxtum xtamatitaxtikan grabaciones xla taʼakgchuwin xalak Biblia chu tatlakgni. «Foto-Drama» xlimakgtumku matitaxtika kNueva York enero kata 1914.

Grabación nema tlawalh William xmin kliwaka 50 discos nema xwilikgo tiku xmatitaxtikgo kʼgramófonos akxni xwilikan «Foto-Drama» xaʼinglés. Lhuwa tatlakgni xla «Foto-Drama» xtlawakgonit tiku ni xLikgalhtawakgananin Biblia xwankgonit. Pero, magrabarlinankgolh makgapitsi tatlakgni, la xla William. Umakgolh tatlakgni nema xʼanankgoya, pero xaletra xkilhtikan kʼHimnario de la Aurora del Milenio xaʼinglés, akgtum xtatlakgni.

Kuentajtlawaka tuku xwan xaletra

Akglhuwa kata, xtatayananin Jehová xkilhtlikgo himnos nema xtsokgkgo atanu latamanin, pero akxni xaletra ni chuna xwan tuku wan Biblia, xlakgpalikgo.

Akgtum liʼakxilhtit, akgtum tatlakgni xla «Foto-Drama» xwanikan «Our King Is Marching On!» («¡Aquí está nuestro rey!», chuna min Himnario de la Aurora del Milenio xaʼespañol), chu xmaklakaskinkan xatatlakgni «The Battle Hymn of the Republic» (El himno de batalla de la República). Uma himno xaletra xlitsuku: «Kilakgastapu akxilhnit xlilanka akxni milh Malana». Pero xLikgalhtawakgananin Biblia lakgpalikgolh xaletra xlakata xwa: «Kilakgastapu akxilhma pi kinkatawilana Malana». Akxni chuna lakgpalikgolh xlimasiyaputunkgo pi akxni xʼama mapakgsinan Cristo ni kaj xlitsuku akxni xʼama min Jesús wata kilhtamaku nema xʼakgchipalh akxni xkinkatatawilan Cristo (Mateo 24:3).

Kata 1966 tlawaka «Cantando y acompañándose con música en su corazón». Uma xasasti tuku xlikilhtlikan tlawaka xlakata nialh xmaklakaskimputunkgo tatlakgni xla kakilhtamaku o xla atanu takanajla. Ama kata, xtatayananin Jehová lakkaxwilikgolh aktsu orquesta xlakata xgrabarlikgolh xatatlakgni 119 takilhtlin nema xʼanan. Congregaciones xmaklakaskinkgo umakgolh grabaciones xlakata xkilhtlikgolh kxtamakxtumitkan chu makgapitsi xtatayananin Jehová xkgaxmatkgo kxchikkan.

Kkata 2009, xtatayananin Jehová maxtukgolh atanu libro xla takilhtlin nema wanikan Kakilhtliniw Jehová. Na grabarlikgolh kcoro chu orquesta klhuwa tachuwin. Kkata 2013, tsukukgolh maxtukgo videos xla takilhtlin xla laktsu kamanan. Akgtum wanikan Niku kan ktlawa oración. Akgatunu papaʼ maktikan kjw.org lhuwa millón takilhtlin.

Lhuwa latamanin wankgonit pi paxtikatsinikgo uma takilhtlin,. Chatum puskat wanikan Julie, tsokgnalh xlakata libro Kakilhtliniw Jehová: «¡Lu lakstlan xalaksasti takilhtlin! Akxni kiʼakstu kwi, kwili tuku tlakg lichuwinan chuna la kmakgkatsi. Uma kimakgtaya nakkatsi la tlakg tlan ktalalin Jehová. Liwana klakpuwanit pi nakmaxki Jehová tuku tlakg tlan kkgalhi».

Heather, tiku kgalhi chatiy kamanan, chatum kgalhi akgtujun kata chu achatum akgnajatsa kata kgalhi, lichuwinan la video xla takilhtlin Niku kan ktlawa oración lakgchanit kxnakujkan xkamanan. Xla wan: «Kamakgtayanit xlakata natlawakgo oración, ni kajwatiya akxni takikgo o akxni kinkatawilakgon, wata kaniwa niku natachuwinamputunkgo Jehová».

^ párr. 3 Charles Taze Russell (1852-1916) xkapulalin xLikgalhtawakgananin Biblia, chuna la xkalilakgapaskan xtatayananin Jehová uma kilhtamaku.