Ankan kxpulakni

Ankan xlipulaktiy niku tsuku

Xtatayananin Jehová

totonaco

La imprimirlinankan xlikalanka katiyatni xlakata nakamakgtayakan latamanin nalakgapaskgo Dios

La imprimirlinankan xlikalanka katiyatni xlakata nakamakgtayakan latamanin nalakgapaskgo Dios

Xlikalanka katiyatni wilakgolh latamanin tiku likgalhtawakgakgo tuku takilhtinit kBiblia nema tlawakgo xtatayananin Jehová. Millones latamanin likgalhtawakgakgo tuku kwiliyaw kʼInternet, chuna la tlawapat wix. Max kaks nalilakawana akxni nakatsiya la xlilhuwa kʼimprimirliyaw likgalhtawakga. Kata 2013 ktlawa likgalhtawakga k700 tachuwin, nema tamaʼakgpitsilh k239 países chu territorios.

Akxni nina xchan kata 1920 xakskiniyaw atanu empresas xlakata xkinkaʼimprimirlinin kilikgalhtawakgakan. Pero watiya uma kata ktsukuw imprimirliyaw makgapitsi revistas chu folletos kʼakgtum aktsu edificio nema xakrentarliyaw kBrooklyn (Nueva York, Estados Unidos). Maski ni lu lhuwa tuku klimatsukiw, la uku kkgalhiyaw 15 imprentas lakalhuwa niku wilakgolh la kʼÁfrica, kʼAmérica, kʼAsia, kʼEuropa chu kʼOceanía.

Kilibrojkan nema tlakg xlakaskinka

Biblia, wa libro nema tlakg xlakaskinka kʼimprimirliyaw. Xapulana nema ktlawaw kinprensaskan wa King James Version (Versión del Rey Jacobo), kkata 1942. Lata 1961 kmaʼakgpitsinitaw kaj kʼakgtum volumen xla Traducción del Nuevo Mundo de las Santas Escrituras xaʼinglés. Kata 2013 xaktlawanitaw liwaka 184 millones copias xla Biblia k121 tachuwin.

Pero uma tuku lichuwinaw ni liwana kinkamasiyaniyan la tlawakan. Xatlan tuku litlawakan Biblia. Maklakaskinkan kapsnat tuku ni kgalhi ácido, wa xlakata ni lhmukuku wan xlimakgas. Nachuna liwana taslamanit makatunu xpáginas. Uma tlawa pi ni pala natalakgxtu akxni maklakaskinkan.

Atanu likgalhtawakga

Na kʼimprimirliyaw likgalhtawakga nema kamakgtaya latamanin naʼakgatekgskgo Biblia. Kaʼakxilhwi tuku tlawaka kkata 2013.

  • Makatsinina, wa kilikgalhtawakgakan nema ankgalhin taxtu. Tlawakan kliwaka 210 tachuwin wa revista nema tlakg maʼakgpitsikan xlikalanka katiyatni. Akgatunu número xla uma revista xla 16 páginas tlawakan 45 millones.

  • ¡Despertad!, revista nema tamastakan Makatsinina, wa xliʼakgtiy nema tlakg maʼakgpitsikan xlikalanka katiyatni. Tlawakan k99 tachuwin. Akgatunu número imprimirlikan max 44 millones.

  • ¿Tuku xlikana masiyay Biblia? uma libro xatsatata xmakni nema kgalhi 224 páginas tlawaka xlakata namakgtaya tiku nalikgalhtawakga tuku xapulana masiya Biblia. Lata kata 2005 imprimirlikanit k214 millones k240 tachuwin.

  • Kakgalhakgaxpatti Dios uma folleto kgalhi 32 páginas tlawaka xlakata nakalimakgtayakan tiku nila liwana kgalhtawakgakgo. Lichuwinan tuku pulana masiya Biblia maklakaskin lakstlan dibujos chu ni lhuwa letras. Tlawaka liwaka 42 millones k400 tachuwin.

Xtatayananin Jehová kʼimprimirliyaw lhuwa atanu libros, folletos chu tratados nema kamakgtaya latamanin natekgskgo kBiblia xtakgalhtin xtakgalhskininkan nema tlakg xlakaskinka, tlan natayanikgo taʼakglhuwit chu xatapaxuwan nakgalhikgo xfamiliajkan. Kiʼmprentajkan tlawaka kkata 2012 liwaka 1,300 millones revistas chu 80 millones libros chu Biblias.

Kkata 2012 xʼimprentaskan xtatayananin Jehová tlawakgolh liwaka 1,300 millones revistas chu 80 millones libros chu Biblias

Niku wilakgolh umakgolh imprentas kkawaniyaw Betel, wamputun «xChik Dios». Tiku ankgo lakgapaxialhnankgo kaks lilakawankgo akxni akxilhkgo la skujkgo tiku tlawakgo umakgolh likgalhtawakga: lakchixkuwin chu lakpuskatin tiku xatapaxuwan mastakgo xkilhtamakujkan chu xlitliwakgakan. Akxni chankgo kBetel, ni katsinikgo la imprimirlinankan. Pero xlakata anta kamasiyanikan chu anan tiku tlakg katsinikgoya, alistalh lu tlan kitaxtu. Akgtum liʼakxilhtit, naʼakxilha lakgkgawasan tiku max kgalhikgo akgpuxam kata maskujumakgo prensas nema lakapala skuja nema kʼakgtum hora tlawa 200, 000 revistas xla 16 páginas.

¿Niku tiyakan tumin nema tamaklaskin?

Tumin nema litaxokgo taskujut nema ktlawayaw wa tuku xatapaxuwan maskiwinankan. Número xla agosto kata 1879 La Atalaya, na xlilakgapaskan Zion’s Watch Tower (La Torre del Vigía de Sión), wa pi liwana katsiyaw pi wa Dios kinkamakgtayaman. Alistalh wa: «[Xkachikin Dios] nikxni katiskintapulilh tumin nipara xtamakgtay lakchixkuwin». La uku chuntiya klakpuwanaw.

¿Tuku xlakata limaxtuyaw lhuwa kilhtamaku, tumin chu litliwakga xlakata uma taskujut? Xlakata klakaskinaw pi umakgolh lhuwa millones Biblias o likgalhtawakga nema kʼimprimirliyaw o kwiliyaw kisitiojkan kʼInternet namakgtayayan wix tiku likgalhtawakgapat, natalakatsuwiniya Dios.