Ankan kxpulakni

Xtatayananin Jehová

Laksakkan tachuwin totonaco

Maktum folleto nema kgalhi lhuwa dibujos kamakgtaya latamanin xlikalanka Katiyatni

Maktum folleto nema kgalhi lhuwa dibujos kamakgtaya latamanin xlikalanka Katiyatni

Odval chatum puskat xalak Mongolia. Ni lu katsi la xlilhuwa kata kgalhi xlakata ni liwana katsi tukuya kata lakachilh. Xla lakpuwan pi lakachilh kkata 1921. Na ni katsini kgalhtawakga xlakata kaj akgtum kata kilalh k’escuela. Chu lata aktsujku xwanit kamakgtayalh xnatlatni nakuentajtlawakgo wakax. Maski chuna, nina makgas makglhtinalh maktum folleto nema limin lhuwa dibujos niku tlakg katsinilh xlakata Dios chu tuku tlan namakglhtinankgo tiku kgaxmatkgo chu kgalhakgaxmatkgo Dios. Lu lipaxuwalh akxni katsilh putum uma.

Uma folleto nema maxtukgolh xtatayananin Jehová kkata 2011, pulaktiy folleto wilakgolh. Kgalhikgo lu lakstlan dibujos, pero maktum tlakg ni lhuwa letras kgalhi.

Maktum nema tlakg kgalhi letras wanikan, Kakgalhakgaxpatti Dios chu nalatapaya putum kilhtamaku, chu amaktum wanikan Kakgalhakgaxpatti Dios, uma maktiy folletos tamatitaxtinit klhuwa tachuwin. Nialh makgas xapulana natawila 583 tachuwin, chu amaktum Kakgalhakgaxpatti Dios, 483 tachuwin. Uma folleto tamatitaxtinit ktlakg lhuwa tachuwin nixawa Declaración Universal de los Derechos Humanos, tatsokgni oficial xla Naciones Unidas nema tlawaka octubre xla kata 2013 nema xtamatitaxtinit k413 tachuwin. Nachuna, uma maktiy folletos tama’akgpitsinit max 80 millones.

Anta kBrasil, makgapitsi xtatayananin Jehová maxkikgolh folleto Kakgalhakgaxpatti Dios chatum puskat tiku lina kata. Xla xatapaxuwan makglhtinalh chu wa: «¡Lu tlan pi wilakgolh latamanin la wixin tiku lita’akgatsankgakgo latamanin la akit! Xlakata ni kkatsini kkgalhtawakga nikxni xakmakgamakglhtinan milikgalhtawakgakan. Pero uma nakmakglhtinan».

Brigitte, chatum puskat xalak Francia, tiku na ni katsini kgalhtawakga wan: «Chali chali kakxilha dibujos nema limin uma folleto».

Chatum xtatayana Jehová xalak Sudáfrica, wan: «Akit klakpuwan pi uma folleto tlakg tlan kalimasiyanikan xlakata Biblia latamanin tiku chuwinankgo chino. Kkalimakgtayanit latamanin tiku kgalhtawakgakgo k’universidad chu nachuna latamanin tiku ni katsinikgo kgalhtawakgakgo. Folleto Kakgalhakgaxpatti Dios chu nalatapaya putum kilhtamaku kimakgtaya nakmasiya tuku pulana masiya Biblia chu ni lhuwa kilhtamaku klimaklakaskin. Kaj itat hora tlan litsukukan tuku tlakg xlakaskinka».

Anta k’Alemania chatiy xtatayananin Jehová tiku lichuwinankgo Dios xliputum kilhtamaku makgalhtawakgakgo akgtum tamakgaxtokgat tiku talhman kgalhtawakgakgonit. Xachixku lu lakgatilh folleto chu kgalhskininalh: «¿Tuku xlakata ni xkilaliminimaw uma folleto? La uku tlakg liwana k’akgatekgsa tuku talichuwinan kBiblia chu makgapitsi tachuwin».

Chatum puskat tiku akgatapa xalak Australia wa: «Akglhuwa kata ktawi kconvento xla monjas. Chu tlan xakkatalalin tiku xpulalinkgo pusikulan. Pero maski chuna niti kimasiyanilh xlakata xTamapakgsin Dios. Xlakata dibujos xla uma folletos, ka’akgatekgsnit tuku wamputun tachuwin nema wi kMateo 6:10».

Sucursal xla xtatayananin Jehová xalak Canadá tsokgli: «Unu lamakgolh lhuwa latamanin xalak Sierra Leona. Akxni akxilhkgolh folleto kxtachuwin, krío, lhuwa wankgolh pi xtatayananin Jehová xlikana liskujmakgolh xlakata putum nakalinikgo tamakatsin xalak Biblia. Makgapitsi wankgonit: “Wixin lakaskinatit pi tlan kakinkakitaxtunin, maski lhuwa ni chuna tlawakgo” ».