Ankan kxpulakni

Ankan xlipulaktiy niku tsuku

Xtatayananin Jehová

totonaco

Xtatayananin Jehová namalakxijkgo niku pulalinkan xtaskujut Jehová

Xtatayananin Jehová namalakxijkgo niku pulalinkan xtaskujut Jehová

Papaʼ julio kata 2009, xtatayananin Jehová tamawakgolh akgtum putawilh nema kgalhi 102 hectáreas kNueva York xlakata anta nawilikan niku pulalinkan xtaskujutkan xtatayananin Jehová. Uma putawilh wi 80 kilómetros xlimakgat kxnoroeste niku la uku wi niku pulalinkan xtaskujut Jehová kBrooklyn nema wi lata kata 1909.

Max akgtsayan ciento xtatayananin Jehová tiku anta natawilakgo chu anta naskujkgo, na natlawakan niku natawilakgo oficinas, akgtum chiki niku natlawakan tuku namaklakaskinkgo chu akgtati chiki niku natamakgxtakgkgo. Na nawilikan akgtum museo nema lichuwinan xlakata xtatayananin Jehová xala uku.

Chiki nema nakatlawakan namaklakaskin 18 hectáreas, chu namakgxtakgkan putum tuku anan kʼuma putawilh. Kjardines ni katikatankamika putum kiwi; wata nakakaxwilikan chuna la wi uma kakiwin.

Arquitectos liwana lakkaxwilikgolh la natatlawa uma chiki xlakata ni lu nalakla luz chu tumin, uma natlawa pi ni lu nalaktlawa katiyatni chu ni lhuwa natalaktlawa tumin xlakata nakakaxtlawakan. Akgtum liʼakxilhtit, xakgstin nawalinikan laktsu tuwan nema tayanikgo chu ni tuwa kakuentajtlawakan chu uma natlawa pi anta natamakgxtakga chuchut akxni nasenan chu xlakata ni kakgawiwi o ni kachichi nawan. Oficinas liwana namaklakaskinkgo xtaxkgakget chichini. Nachuna, lu xlakaskinka akxilhkgo ni lu natalaktlawa chuchut.

Pero ¿tuku xlakata namalakxijkan niku pulalinkan xtaskujutkan xtatayananin Jehová? Xapulana xwi akgtum imprenta kBrooklyn, anta xkatlawakan Biblias chu likgalhtawakga xla xtatayananin Jehová xlikalanka katiyatni. La uku, lhuwa sucursales namakgtlawamakgolh uma taskujut. Kkata 2004, anta kWallkill (Nueva York) tsukuka tlawakan likgalhtawakga chu na anta xkamalakgachakan kEstados Unidos, max 145 kilómetros kxnoroeste Brooklyn.

Atanu tuku akxilhkanit wa la xlilhuwa talaktlawa tumin xlakata la naskuja chu la natakuentajtlawa putum tuku wi kBrooklyn. Talakpuwan pi xlakata natalakxijkan niku tlakg aktsu, tlakg tlan natamaklakaskin tumin xlakata chuntiya namakgtayanankan la masiyakan xlakata Biblia.

Akxni nina mastakan talakaskin natatlawa uma chiki talakaskin liwana natakatsi la nalaktlawa katiyatni. Komo putum tlan nakitaxtu, uma taskujut natsuku kata 2013 chu akgtati kata nalitlawakgokan.

Ni kajwatiya imprenta Wallkill, xtatayananin Jehová na kgalhikgo niku tawila escuelas anta kPatterson (Nueva York) chu sucursales klhuwa países. Xliputum, wi liwaka akgtujun millones aitat xtatayananin Jehová xlikalanka katiyatni.