Ankan kxpulakni

Ankan xlipulaktiy niku tsuku

Xtatayananin Jehová

totonaco

Lu skujkgo pero ni matajinankgo

Lu skujkgo pero ni matajinankgo

Puxamatsayan kata nema titaxtunit, liwaka 11,000 xtatayananin Jehová makgxtakgkgonit xchikkan xlakata namakgtlawakgo pukgalhtawakga k120 países. Putum xatapaxuwan mastakgonit xlitliwakgakan chu tuku katsinikgo tlawakgo chu nitu skinkgo chu kaj wa uma taskujut tlawakgo.

Lhuwa xakstukan xokgokgonit xpasajekan xlakata naʼankgo makgtayanankgo. Makgapitsi maklakaskinkgonit xvacacioneskan chu amakgapitsi skinkgonit permiso kxtaskujutkan, chu uma tlawalh pi nialh xtlajakgolh chuna la xapulana.

Putum xatapaxuwan chuna tlawakgolh; putum xatapaxuwan makgtayanamputunkgolh xlakata tlakg natalichuwinan xalakwan xalaksasti xla Tamapakgsin (Mateo 24:14). Xtatayananin Jehová tlawakgonit chiki niku tlawakan Biblias chu likgalhtawakga nema takilhtinit kBiblia, nachuna oficinas chu niku lhtatakan. Na katlawakgonit Salones de Asambleas nema kgalhi asta 10,000 laktawilh chu Pukgalhtawakga nema kgalhi asta 300.

Umakgolh chiki chuntiya tatlawama. Sucursal xla akgatunu país wa tiku akxilha tuku maklakaskinkgo chali chali tiku makgtayanankgo. Kamaxkikan niku natamakgxtakgkgo, tuku nawakgo, chu na kachakgenikan xlhakgatkan. Xtatayananin Jehová tiku anta xalanin na xatapaxuwan makgtayanankgo kʼuma taskujut.

Xlakata tlan nalakkaxwilikgo uma taskujut, kkata 1985 talakkaxwililh akgtum programa xlikalanka katiyatni xlakata tlan nakatlawakan. Xlakata wi tiku tlan namakgtapakgsi, xlikgalhit 19 asta 55 kata chu na xlikatsinit maski kaj pulaktum xlakata la tlawakan chiki. Atsinu ni putum, tiku makgtayanankgo tamakgxtakgkgo akgtiy semana asta akgtutu papaʼ, maski makgapitsi tamakgxtakgkgo akgtum kata o liwaka.

¿Chu komo tiku makgtayanan tamakgaxtokgnit chu xpuskat ni katsini la tlawakan chiki? Xla masiyanikan tuku tlan natlawa, la lakchikan varillas, nawili azulejo, nalijarlinan o namaninan. Na tlan namakgtlawa liwat nema kamaxkikan tiku skujkgo o nakaxaka niku tamakgxtakgkan.

Akxni taspitkgo kxchikkan, makgapitsi tiku makgtayanankgolh kamaxkikan cartas niku kapaxtikatsinikan. Akgtum tamakgaxtokgat tsokgnalh: «Kkapaxtikatsiniputunan xlakata kskujwi anta ksucursal xalak Budapest. Xtatayananin Jehová xalak Hungría lu tlan likatsikgolh chu lu paxtikatsinikgolh. Lu tuwa kmakgkatsiw kkamakgxtakgwi akxni takgatsilh akgtum papaʼ. Pero putum kilhtamaku chuna kinkaʼakgspulayan. Komo nakmatlaniyaw, chuntiya naktlawaparayaw kprimavera. Akgatunu papaʼ nema kmakgtayananaw, kakxilhaw pi wa tlakg xatlan papaʼ xliputum kilatamatkan».