Ankan kxpulakni

Ankan xlipulaktiy niku tsuku

Xtatayananin Jehová

totonaco

Kawanikan xtatayananin Jehová pi lu tlan xlakata makgtayanankgolh akxni masputunalh chuchut kʼHungría

Kawanikan xtatayananin Jehová pi lu tlan xlakata makgtayanankgolh akxni masputunalh chuchut kʼHungría

Akxni lu palha milh sen masputunalh chuchut anta kʼEuropa central kjunio kata 2013. Xlakata titaxtulh kputum Hungría, kgalhtuchokgo Danubio tlakg stakli nema nipara makgtum chuna xʼastaka.

Xlakata lu nitlan la tawilalh, Ministerio de Recursos Humanos xalak país skinikgolh sucursal xla xtatayananin Jehová xalak Hungría pi xkamakgtayakgolh mapakgsinanin xlakata tlan xtatlawalh tuku xkamakgtayalh kachikin. Chu sucursal, kaskinikgolh congregaciones xla xtatayananin Jehová nema xwilakgolh xliputum Danubio pi xmakgtayanankgolh tuku xʼamakgo tlawakgo mapakgsinanin xalak kachikin.

Lu tlan la makgtayanankgolh congregaciones. Akglhuwa kilhtamaku, liwaka 900 xtatayananin Jehová xalak 72 congregaciones makgtayanankgolh xlakata ni tlakg xmasputunalh kgalhtuchokgo. Kawanika pi xlinkgolh tarjeta nema xkalilakgapaska chu anta xkgalhilh xtukuwanikan, xkachikin chu tachuwin xTatayananin Jehová.

Kʼakgtum kachikin, chatum tiku xmakgskuja kCruz Roja xalak Hungría, kamalakgachanilh uma tamakatsin kʼakgtum congregación: «Kalakgchanan nakkamaxkiyan paxtikatsinit chu kakni. Ni kkaʼukxilhaw latamanin tiku makxtum lakgo chu lamakgtayaputunkgo chuna la wixin. Chu ankgalhin naklakapastakaw xlakata chalhuwa tiku lu makgat minkgocha. Lu klakgati kkawani xalak kachikin pi wixin kilawiliniw lu tlan liʼakxilhtit».

Nachuna, sucursal makgamakglhtinalh maktum xcarta tiku xpulalin akgtum tamakxtumit nema xkamakgtaya tiku xkaʼakgspulanit tuku nitlan, tiku makgtapakgsi kParlamento xalak Hungría, niku xpaxtikatsinikgo la lu tlan makgtayanankgolh xtatayananin Jehová.