Ankan kxpulakni

Ankan xlipulaktiy niku tsuku

Xtatayananin Jehová

totonaco

Kamakgtayakan kamanan xalak Tailandia xlakata nalitamakgtayakgo escuela

Kamakgtayakan kamanan xalak Tailandia xlakata nalitamakgtayakgo escuela

Diciembre kata 2012, xtatayananin Jehová xalak Tailandia tatlawalh akgtum campaña xlakata nakamakgtayakgo tiku ankgo kʼescuela. Kgalhapuxam xtatayananin Jehová kilakgolh kʼescuelas xalak Bangkok, katatamakxtumikgolh directores chu kamaxkikgolh makgalhtawakgananin chu tiku ankgo kʼescuela revista ¡Despertad! xla octubre kata 2012 nema wanikan «Cómo aprovechar al máximo la escuela».

Uma tuku tatlawalh lu tlan kitaxtulh, wa xlakata alistalh chuna tatlawalh akgtuminika país. Kʼakgtum kata aitat, xtatayananin Jehová kilakgolh 830 escuelas. Makgalhtawakgenanin chu tiku ankgo kʼescuela lakgatikgolh revistas wa xlakata asta makgtutu tlawaparaka xlakata lhuwa tiku xlakaskimakgolh. Lata xapulana tatlawalh kaj 30,000, pero alistalh tamakgpitsilh 650,000.

Directores chu makgalhtawakgenanin tunkun katsikgolh pi lu xlakaskinka tuku xlichuwinan ¡Despertad! Asta, chatum makgalhtawakgena wa: «Uma revista nakamakgtaya kamanan xlakata tlan nakatalalinkgo xnatlatnikan chu naliskujkgo xlakata natlawakgo tuku lakkaxwilikgonit». Makgapitsi escuelas tsukukgolh limaklakaskinkgo akxni xmasiyakgo, chu amakgapitsi limaklakaskinkgolh xlakata tlakg nakatsinikgo kgalhtawakgakgo tiku xkamasiyanimakgolh. Kʼakgtum escuela, tiku xʼankgo anta wi tuku kaskinika chu maklakaskinkgolh tuku limin revista, chu tiku tlakg tlan maxtukgocha xtaskujutkan wi tuku kamaxkika.

Chatum tiku xkgalhtawakgama paxtikatsinilh xlakata artículo «Cómo ganarle la batalla a la obesidad infantil y juvenil», nema na xlimin uma revista. Lichuwinalh pi tiku kgomakgolh litaxtuma akgtum taʼakglhuwit chu tiku xʼamigos lu tuwa makgkatsikgo nalitachuwinankgo xlakata uma. Chu xla wa: «Paxtikatsinilh xlakata kinkamaxkikanan tastakyaw nema ni laktuwa chu tlan tlawakan».

Xanatlatni na lu paxtikatsinikgolh xlakata uma likgalhtawakga. Chatum puskat kawanilh chatiy lakpuskatin tiku xtatayananin Jehová tiku lakgapaxialhnankgolh pi xtastakyaw nema revista limin makgtayalh xtsumat xlakata tlan nakitaxtuni kʼescuela.

Tiku kapalakachuwinan xtatayananin Jehová kTailandia, Pichai Petratyotin, wa: «Revista ¡Despertad! masiya pi Biblia kgalhi liskgalala nema chuntiya makgtayanan maski titaxtu kilhtamaku. Xtatayananin Jehová xlakaskinka kakxilhaw ankan kʼescuela, wa xlakata xatapaxuwan kmakgpitsiw uma likgalhtawakga».