Latamanin xlikalanka katiyatni litamakgtayamakgo sitio xla Internet jw.org. La uku nakkalitachuwinanan makgapitsi tachuwin xla tapaxtikatsinit nema malakgachaka mayo xla kata 2014 anta niku pulalinkan taskujut xla xtatayananin Jehová.

Tuku kamakgtaya laktsu kamanan

«Akxni xkitaspita kʼescuela, kinkgawasa xlimin lapices, likgaman chu lentes xla xcompañeros. Makglhuwa kmaʼakgatekgsniputuw pi xkgalhanama chu nitlan kgalhanankan, pero nila kmakgatekgsniw. Akgtum kilhtamaku kmaktiw video anta jw.org nema wanikan Kgalhanankan nitlan. ¡Lu tlan tamakgtay! Wa tuku xmaklakaskin kinkgawasakan. Akxni xakxilhnita, wa pi xmaspitputun putum tuku xlimit kchiki, xlakata la uku liwana xkatsi pi Dios ni lakgati pi latamanin kakgalhanankgolh. ¡Lu kinkamakgtayan uma sitio xla Internet!» (D. N., África.)

«Video xla jw.org nema wanikan Kgalhanankan nitlan [...] wa tuku xmaklakaskima kinkgawasakan.»

«Kinkamanan lu lakgatikgo uma sitio. Maktikgo videos xla caricaturas nema kamakgtaya nalilatamakgo tastakyaw xalak Biblia xlakata natlawakgo tuku xaʼakgstitum. Na katsinikgo lu xlakaskinka tastakyaw nema nakamakgtaya alistalh chu tlakg tlan latamanin nalitaxtukgo.» (O. W., las Antillas.)

Tuku kamakgtaya tiku ankgo kʼescuela

«Lu tuwa xakmakgkatsi nakan kʼescuela, chu xakmakgxtakgputun. Pero akgtum kilhtamaku klikgalhtawakgalh ksitio jw.org artículo nema wanikan “¿Debería dejar de estudiar?”. Lata uma kilhtamaku kakxilhli pi xlakaskinka xakalh kʼescuela. Uma artículo kimasiyanilh pi escuela kimakgtaya xlakata tuku naktitaxtu alistalh chu nakimakgtaya nakmakgantaxti tuku nakilakgayawakan.» (N. F., África.)

«Tastakyaw nema kamaxkikan kamanan kʼuma sitio kimakgtayanit tlakg tlan tayat nakkgalhi kʼescuela.»

«Tastakyaw nema kamaxkikan kamanan kʼuma sitio kimakgtayanit tlakg tlan tayat nakkgalhi kʼescuela. Kkatsininit tlakg kuenta naktlawa tuku kimasiyanikan chu nitu nakimalaktlawi.» (G., África.)

«Chatum puskat tiku ktaskuja kiwanilh pi chatum tsumat lu xmakglhuwi xtsumat kʼescuela. Xtsumat lu xpekuan chu uma asta tlawalh pi makgapitsi kilhtamaku ni xʼalh kʼescuela. Klitachuwinalh makgapitsi tuku lichuwinan video La natamakgtayaya maski ni nakgaxinana, sección xla jw.org niku wan “La pizarra animada”. Lu lakgatilh tastakyaw nema wan pi tlakg tlan kitaxtu komo ni sitsikan. Alistalh wanilh xtsumat tuku tlan xtlawalh xlakata nialh lu xmakglhuwika, chu aktsu tsumat ampa kʼescuela chu nialh lu xpekuan. Chuna la titaxtulh kilhtamaku tlakg tlan kitaxtunilh chu asta lu tlan latalalilh umakgolh laktsuman.» (V. K., Europa oriental.)

Tuku kamakgtaya lakgkgawasan chu laktsuman

«Lu kpaxtikatsini xlakata wilinitantit ksitio jw.org artículo nema wanikan “¿Por qué siento el impulso de cortarme?”. Akglhuwata kata kgalhi uma taʼakglhuwit. Klakpuwa pi ni xʼanan atanu tiku chuna tlawa chu komo wi tiku xaklitachuwinalh, ni xkiʼakgatekgsnilh. Tiku kalichuwinanka kʼartículo lu kimakgtayalh. ¡Ama kilhtamaku kmakgkatsilh pi wi tiku xkiʼakgatekgsni!» (Chatum tsumat xalak Australia.)

«Tuku kalichuwinanka kʼartículo lu kimakgtayalh. ¡Ama kilhtamaku kmakgkatsilh pi wi tiku xkiʼakgatekgsni!»

«Sitio jw.org kimakgtayanit naktegsa tuku kamakgtaya tuku titaxtukgo laktsuman chu lakgkgawasan. Akgtum xʼartículo kimakgtayanit nakkatsi tuku kilhchanima wi tiku nasawaniyan natatalakgxtupiya, kimakgtayalh nakkatsi pi chuna xaktitaxtunit chu tuku kilitlawat xlakata nialh chuna xkiʼakgspulalh.» (T. W., las Antillas.)

Tuku kamakgtaya natlatni

«Kinkgawasa tiku aku stakma lu ni kaks lakawan. Min kilhtamaku nikkatsi tuku naktlawa xlakata kaj lakapala tuku tlawa chu ni kaks tawila. Wa xlakata tuwa kmakgkatsi naktachuwinan. Akgtum kilhtamaku ktanulh ksitio jw.org, sección niku lichuwinan xlakata tamakgaxtokgat chu natlatni, chu ktekgsli lhuwa artículos nema xlichuwinan tuku xaktitaxtuma. Kimasiyanilh la tlakg tlan naktachuwinan kinkgawasa. Xla na litamakgtayanit uma sitio xla Internet. La uku kiwani tuku xaxlikana chu tuku lilakgaputsa chu tuku tlan kitaxtuni.» (C. B., África.)

«Akxni kinkamanankan titaxtumakgo pulaktum tuku tuwa, taxtu ksitio akgtum artículo nema lichuwinan xlakata uma.»

«Sitio jw.org kamasiyani natlatni la tlan nakamasiyanikgo xkamanankan chuna la xlakan nalakgatikgo. Akgtum liʼakxilhtit, video nema lichuwinan la katekgskan xaxlikana amigos xla sección “La pizarra animada” kamakgtayalh kinkamanankan nakatsikgo tuku wamputun xaxlikana amigos chu la tlan nalaksakkgo amigos tiku nakamakgtayakgo. Akxni kinkamanankan titaxtumakgo pulaktum tuku tuwa, taxtu ksitio akgtum artículo nema lichuwinan xlakata uma. Lhuwa lakwan tastakyaw limin.» (E. L., Europa.)

Tuku kamakgtaya tiku tamakgaxtokgkgonita

«Kimpuskat chu akit akgchaxan kata lata kmakgaxtokgaw. Chuna la putum tamakgaxtokgat, talakaskin naklismaniyaw la likatsi, la lakapastaka chu la chuwinan achatum. Wa xlakata artículo xla jw.org nema wanikan “Aprenda a escuchar” klakgatilh. Xlimin lakwan tastakyaw xlakata la tlakg tlan kgaxmatkan. Klikgalhtawakgalh putuminika chu alistalh kmaxkilh kimpuskat. Kliskujnitaw xlakata nakmakgantaxtiyaw lakwan tastakyaw nema xlimin.» (B. B., las Antillas.)

«Uma sitio xla Internet lakgmaxtunit kintamakgaxtokgat.»

«Titaxtunita akgtum kata lata kkatachuwinan xtatayananin Jehová, chu kpaxtikatsiniputun xlakata sitio jw.org. Lhuwa tuku kkatsininit... asta kkatsinit la nakmalakgachokgo kintasitsi chu tlakg tlan chixku chu tlat naklitaxtu. Xlikana tlan nakwan pi uma sitio xla Internet lakgmaxtunit kintamakgaxtokgat.» (L. G., las Antillas.)

Tuku kamakgtaya tiku ni kgaxmatkgo

«Xlakata página jw.org, kmakgkatsi pi klamapa. Videos xla señas americano kimakgtayakgonit tlakg tlan nakkatachuwinan amakgapitsin. Nachuna, xapulana xakmakgkatsi pi nila xaklakaxwili tuku xlakaskinka xaktlawalh kkilatamat pero video Ahora veo la Biblia en mi idioma lakgchalh kinaku chu kimakgtayalh naklakapastaka tuku xatlan.» (J. N., África.)

«Xlakata página jw.org, kmakgkatsi pi klamapa.»

«Uma sitio lu lanka xtapalh. Xatapaxuwan kmakgtayanan kʼakgtum programa nema kamakgtaya tiku ni kgaxmatkgo, liwaka tiku kajku stakmakgo chu nila kgaxmatkgo. Xlakata lhuwa anan tamakatsin xla tachuwin xla señas kimakgtayanit tlakg nakkatsini uma tachuwin. Nachuna, tlawanit pi nakkamakgtaya amakgapitsi xlakata tlakg tlan natalalinkgo xʼamigoskan chu xfamiliajkan.» (K. J., las Antillas.)

Tuku kamakgtaya tiku ni akxilhnankgo

«Akit nila kakxilha chu lhuwa klitamakgtayanit sitio jw.org. Takatsin tuku anta kkatsininit, xtalakaskilh akglhuwa papaʼ xtitaxtulh xlakata xkilakgchilh kcorreo. Tuku kkatsininit kʼuma sitio makgtayanit kifamilia chu tlakg kmakgtayanan kkinkachikin. Nachuna, klakgati kakilakgchilh takatsin watiya kilhtamaku akxni kalakgchin kiʼamigos tiku tlan akxilhnankgo.» (C. A., Sudamérica.)

«Tuku kkatsininit kʼuma sitio makgtayanit kifamilia chu tlakg kmakgtayanan kkinkachikin.»

«Xlakata tiku nila likgalhtawakganankgo kbraille o nila tamawakgo libros kbraille, jw.org kamakgtaya. Grabaciones nema lhuwa tuku limin kamakgtaya tiku nila akxilhkgo nakatsinikgo xlakata pulaklhuwa temas. Uma sitio lu xlikana tlawakanit xlakata nalitamakgtayakgo kaxatikawa latamanin, chu niti laksakpaxkikan. Kamaxki kakni tiku nila akxilhnankgo chu kinkamakgtayayan nakmakgkatsiyaw pi na xlakaskinka akinin.» (R. D., África.)

Tuku kamakgtaya tiku katsiputunkgo xlakata Dios

«Tuku litalakgpali misitiojkan xla Internet xla amakgapitsi takanajla, wa pi ni litsama tachuwin nema kajwatiya tlan akgatekgskgo tiku makgtapakgsikgo kʼakgtum takanajla. Na ni limin lu lhuwa tamakatsin. Akgtum página nema ni tuwa chu lakatitum nawaniyan. Ni limin tachuwin nema ni lu xlakaskinka chu tuku kaj xtalakpuwankan lakchixkuwin. Ni lichuwinan takanajla la tuku tuwa o nila nakgalhikan. Wata wan pi tlan nakgalhikgo takanajla kaxatikawa latamanin.» (A. G., Asia.)

«Akgtum página nema ni tuwa chu lakatitum nawaniyan. [...] Ni lichuwinan takanajla la tuku tuwa o nila nakgalhikan. Wata wan pi tlan nakgalhikgo takanajla kaxatikawa latamanin.»

«¡Nitu klitaxtu! Chuna xakmakgkatsi akxni nitu xakkgalhi sitio jw.org. Makgatunu ktanu ksitio, kmakgkatsi la komo xakmapasilh akgtum makgskgot kkakilhtamaku niku kxakapukswa tatakgskgo xlakata ni lakgapaskgo Dios. Tlan lakapala klikgalhtawakga chu kkgaxmata artículos nema lichuwinan tuku lakpuwan Dios xlakata makgapitsi tuku kkatsiputun chu takgalhti kintakgalhskinin xlakata latamat.» (J. C., las Antillas.)

«Lu kpaxtikatsini tamakgtay nema kmakglhtinan xpalakata kintakanajla unu kSudamérica, kxlakgstipan selva. Komo ni xʼanalh uma sitio, xatsankgan xakmakgkatsilh.» (M. F., Sudamérica.)