Ankan kxpulakni

Ankan xlipulaktiy niku tsuku

Xtatayananin Jehová

totonaco

Lakgmaxtunalh kSky Tower

Lakgmaxtunalh kSky Tower

Sky Tower, akgtum torre nema kgalhi 328 metros chu wi kʼAuckland (Nueva Zelanda), anta lalh tuku nitlan. Graham Browne, chatum xtatayana Jehová tiku kgalhi 80 kata, makgtayalh policía xlakata chatum tiku nitlan xwi xtalakapastakni ni xmokgosli kʼuma torre. Graham wan: «Uma chixku wa pi xtachuwinamputun chatum xtatayana Jehová, wa xlakata policía kintachuwinankgolh».

«Tiku kskujkgo kSky Tower kinchikgolh xlakata ni xakmokgosli chu kilichinikgolh Biblia kgantum xalhman tasiw. Policía kililh niku xwi mirador, 192 metros xlitalhman. Uma kilhtamaku un lu kgawiwi xwanit. Lakatsu xwi chixku tiku xniputun, xwi xkilhpan uma xatitsu mirador chu xlakni kaj xlawaka.

»Kwanilh pi akit xtatayana Jehová chu pi xakmakgtayaputun. Akxni xatsekg ktlawalh oración, kmalakkilh Biblia chu kmakgatekgsaputulh.

»Klitachuwinalh la xlilakaskinka latamat, nema nina makgas wa xlichuwinan taʼakgchuwin nema xakmastanit kPukgalhtawakga niku ktamakxtumi.

»Kwanilh: Wix lu xlakaskinka akxilhan Dios, chu maxkinitan tuku lu lanka xtapalh: latamat. ¿Ni limasiyaniputuna pi lu xlakaskinka akxilha uma tamaskiwin? Katat, chu kalakgmaxtu mi latamat.

Na kwanilh: Dios lu paxkiyan chu lakaskin pi kalatapa.

»Xapulana xtasiya pi ni kuenta xkintlawanima. Wa xlakata chuntiya kskinilh Jehová pi xkimakgtayalh pi tuku xakwanima xlakgchalh kxnaku. Uma chixku tsukulh talakxija, tayalh chu tsukulh kilakgtalakatsuwi, maski ni xkatsi tuku xtlawa.

Xla wa: Makgasa, kilakgolh kkinchik xtatayananin Jehová pero akit kkatlakgalilh. Lu nitlan klimakgkatsi. ¿Kintapatiya?

Kkgalhtilh: Nitu kapuwanti, makgapitsi akinin nachuna ktlawaw akxni nina xtatayananin Jehová xakwanitaw. Liwana kakatsi pi Jehová natapatiyan.

Kiwanilh: Paxtikatsinilh. Uma tlakg tlan kimamakgkatsini.

Kwanipa: Wi tuku kwaniputunan. Kpekuan, pero ni kimpalakata. Akit ktachinit xlakata ni nakmokgosa, pero komo wix natantumokgosa, namakgatsankgaya mi latamat nema lu lanka xtapalh. Uma lu nitlan namamakgkatsini Jehová. Tlakg tlan xwa pi unu xtaya.

»Uma chixku tiku tlakg tlan xmakgkatsi, kiwanilh: “Tlan”.

»Akxni chalh niku nialh kalipekua xwililh xlatamat, linkgolh policía niku nialhtu xlanilh. Xliputum max akgtum hora kchuwinaw.»

Xtatayananin Jehová kapaxkikgo latamanin, tlakg kapaxkikgo tiku titaxtumakgo tuku nitlan. Xlikalanka katiyatni lichuwinankgo xtamakatsin xTachuwin Dios xlakata latamanin nakgalhikgo takgalhkgalhin chu nakamasiyanikgo pi Dios xlikana kinkapaxkiyan kinchatunukan.