Ankan kxpulakni

Ankan xlipulaktiy niku tsuku

Xtatayananin Jehová

totonaco

Kamanan makgtayakgo xcompañeroskan nialhtu nakatlawanikan kʼescuela

Kamanan makgtayakgo xcompañeroskan nialhtu nakatlawanikan kʼescuela

Nina makgas akgtum organización nema makgtayanan xalak Inglaterra maxkilh premio Diana chatum kgawasa tiku kgalhi 10 kata wanikan Hugo xlakata kamakgtayalh amakgapitsi xcompañeros nialhtu nakatlawanikan kʼescuela.

Hugo wa: «Kpaxtikatsini video La natamakgtayaya maski ni nakgaxinana xlakata uma premio. Xlakata tuku kkatsinilh kʼuma video, nema wi ksitio jw.org, kalimakgtayanit amakgapitsin nialhtu nakatlawanikan kʼescuela».

Katlawanikan tuku nitlan kʼescuela «akgtum taʼakglhuwit nema chali chali titaxtukgo kamanan xlikalanka katiyatni. [...] Pero wi tuku tlan natlawaya». (Tuku wan video La natamakgtayaya maski ni nakgaxinana)

Akxni Hugo xkamasiyaninita video xmakgalhtawakgenanin, lakkaxwilika xlakata putum tiku ankgo kʼescuela tlan xtanukgolh ksitio xla xtatayananin Jehová. La uku, lhuwa xcompañeros Hugo tiku kgalhikgo 8 chu 10 kata xliʼankgalhin tanukgo ksitio. Xlakan wankgo pi ni kajwatiya kamakgtaya nialhtu nakatlawanikan kʼescuela, kamakgtaya natekgskgo xtakgalhtin lu xlakaskinka xtakgalhskininkan. Akgtum liʼakxilhtit, la natekgskgo xaxlikana amigos.

Tuku litamakgtayakgo kamanan xlakata nialhtu nakatlawanikan kʼescuela

Kʼatanu escuela xalak Inglaterra, aktsu kgawasa tiku kgalhi 8 kata wanikan Elijah na wi tuku xtlawanikan kʼescuela. Wa xlakata, kataʼakxilhli xfamilia video La natamakgtayaya maski ni nakgaxinana, alistalh makgatawakgakgolh tuku tlan xwa chu xtlawalh akxni wi tuku xtlawaniputunka. Uma makgtayalh xlakata natayani. Alistalh, ama semana, xmakgalhtawakgena kamasiyanilh video putum xʼalumnos.

Pero uma taʼakglhuwit ni kaj kʼInglaterra chuna la; xlikalanka kakilhtamaku chuna la. Chu video La natamakgtayaya maski ni nakgaxinana, kamakgtayama kamanan xlikalanka katiyatni.

Anta kʼEstados Unidos, aktsu tsumat tiku kgalhi 10 kata waninkan Ivie xpekuani xcompañera nema xtlawani tuku nitlan. Akxni xʼakxilhkgonita video La natamakgtayaya maski ni nakgaxinana, Ivie katsilh la natlawa. Na tachuwinalh xmakgalhtawakgena, tiku makgtayalh la nalakkaxtlawa xtaʼakglhuwit. Xcompañera wanilh pi xtapatilh, la uku tlan latalalin.

Xtatayananin Jehová lu kkamakgtayaputunaw kamanan. Wa xlakata, chuntiya naktlawayaw likgalhtawakga nema nakamakgtaya nialhtu nakatlawanikan kʼescuela.