Ankan kxpulakni

Ankan xlipulaktiy niku tsuku

Xtatayananin Jehová

totonaco

Kalakgmaxtulh chatum bombero nema nitu kskujma

Kalakgmaxtulh chatum bombero nema nitu kskujma

Domingo 5 xla enero kata 2014, Serge Gerardin xʼama kʼautobús xlakata xkgalhi lanka tamakxtumit xla xtatayananin Jehová lakatsu kParís (Francia) chu ama kilhtamaku akxilhli pi lalh tuku nitlan. Xla wan: «Putlaw tawakacha kxkilhpan akgtum puente chu makgat kgosli. Alistalh tawilanilh puente, lakgpasalh chu lakayawa tamacha».

Serge, tiku kapulalin putum bomberos chu liskujnit uma taskujut liwaka tipuxum kata, lakapala wi tuku tlawalh. Xla wan: «Maski ni anta xaklakamaw, kwanilh tiku xmatlawanima putlaw pi xtachokgolh, ktaxtulh kʼautobús chu lakapala kalh niku xlakgpasama putlaw». Serge kgaxmatli pi wi tiku pixlanka xkilhwama: «¡Kakilamakgtayaw!». Serge wampara: «Xaklin kintraje chu corbata chu ni xakkgalhi tuku maklakaskinkgo bomberos. Pero xlakata pixlanka kskimaka tamakgtay, kimalakpuwanilh pi tlanku wi tiku naklakgmaxtu».

Akxni putsalh kputlaw, Serge tekgsli chatum tiku ni xkatsi tuku natlawa chu lakgmaxtulh. Serge wan: «Kiwanilh pi xtanumaparakgolhku achatiy anta kputlaw. Lhuwata latamanin xtachokgokgonit, pero xlakata lu kachichi xwanit chu lhkuyat ni xkamaxki talakaskin xmakgtayanankgolh».

Chatum tiku xmatlawani camiones limilh tuku limamixikan lhkuyat chu akxni Serge kawanilh tuku xtlawakgolh, makanikgolh lhkuyat chu kaj tsinu mamixikgolh. Tiku xmatlawani putlaw anta xwi kxtampin putlaw chu nila xtaxtu, wa xlakata Serge chu amakgapitsi latamanin chaxkgolh putlaw chu xwataxtukgolh chixku asta niku nialhtu xlanilh.

Serge wan: «Ama kilhtamaku, lakgpasapa». Pero atanu tiku na anta xʼan, xlitachinit cinturón anta kputlaw. Chatum tiku xlin xmotocicleta nema xaxuwa xkgalhi klhakgat chu na bombero xwanit na tsukulh makgtayanan. Serge wanilh pi putlaw xʼama lakgpankga chu pakgachipakgolh chixku chu maxtukgolh. Akxni nina xtitaxtu akgtum minuto la xtamakxtukanit, putlaw lakgpankgli.

Akxni chinkgolh bomberos chu tiku xkamakgtayakgo akxni wi tuku lanikgo, kamakgtayakgolh tiku xtasipanikgonit chu mamixikgolh lhkuyat. Serge na makgtayaka, xlakata xtachukunit chu xmakachichinit. Akxni tawakapa kʼautobús, makgapitsi lakchixkuwin ankgolh maxkikgo paxtikatsinit xlakata makgtayanalh.

Serge lu paxuwa xlakata tlawalh tuku matlanilh. Xla wan: «Xakmakgkatsi pi lu xlakaskinka tuku xaklakgaya kxlakatin kiDios, Jehová. Lu kpaxuwa pi kmakgtayanalh xlakata xlakgtaxtukgolh umakgolh latamanin».