Ankan kxpulakni

Ankan xlipulaktiy niku tsuku

Xtatayananin Jehová

totonaco

Kalakgmaxtuka kxmakan linin

Kalakgmaxtuka kxmakan linin

AKXNI xlichuwinamakgo Dios kʼakgatunu chiki, chatiy xtatayananin Jehová chuwinankgolh kchiki chu kamakgamakglhtinalh chatum chixku tiku lu xlipuwama. Kxpulakni xchik, kʼescaleras, xtasiya kgantum tasiw nema xʼama litapixchitawaka.

Ama chixku kawanilh pi xtanukgolh, chu kgalhskinkgolh tuku xlakata xmawakanit tasiw. Xla kawanilh pi xʼama tapixchitawaka, pero akxni kgaxmatli pi tlakgka timbre, wata malakkilh. Xtatayananin Jehová tachuwinankgolh chu taʼankgolh kdoctor, tiku tlan makgtayalh.

Uma tuku lalh, talichuwinalh kmaktum periódico xalak Bélgica, ni kajwatiya uma chixku makgtayakgolh xtatayananin Jehová xlakata ni xakstu xmakgnika. Kakxilhwi makgapitsi tuku lanit xlikalanka katiyatni.

Chatum puskat xalak Grecia tsokgli: «Akxni kiakgskgawilh tiku xaktawi, lu klipuwa. Lu ni xakkatsi tuku naktlawa wa xlakata klakpuwa kiʼakstu nakimakgnikan. Akxni xaklakpuwan pi nialh naklatama lu tlan xkimamakgkatsini: xakmasputuputun kintalipuwan».

Pero nichuna tlawalh, wata alh kdoctor. Ni makgas kilhtamaku, kaputsalh xtatayananin Jehová chu tsukulh katakgalhtawakga chu tsukulh an ktamakxtumit. Xla wan: «Kcongregación kakxilhnit pi xlikana kimpaxkikgo, wa uma tapaxkit nema xakputsama lata makgasata». Chu wampara: «Kkatekgsnit xaxlikana kiʼamigos tiku tlan kkalipawan. Nachuna ktekgsnit takaksni chu tapaxuwan; nialh klilakgaputsa tuku aku namin».

Chatum xtatayana Jehová xalak Inglaterra wan: «Akgtum kilhtamaku kintachuwinalh tiku xaklakgapasa, chu lu xlipuwan, kiwanilh pi ama katsisni xakstu xʼamaka makgnikan. Klimaklakaskilh tuku xwan ¡Despertad! xla mayo kata 2008 nema xlichuwinan tiku xakstu makgnikan, klakputsalh xlakata nakmakgatekgsni chu klikgalhtawakganilh makgapitsi textos nema tlan xmamakgkatsinilh. Chu maski la uku kgalhi taʼakglhuwit ni lakpuwan xakstu namakgnikan xlakata nalakkaxtlawa xtaʼakglhuwit».

Anta kʼGhana, chatum xtatayana Jehová wanikan Michael tsukulh tachuwinan chatum tsumat tiku xlakgan kxputaskujut xlakata wi tuku xʼan sta. Michael akxilhli pi lu xlipuwama chu kgalhskilh komo wi tuku xʼakgspulama.

Xla wanilh pi xakstu xmakgniputunkan xlakata xchixku xmakgxtakgnit chu xtatawilanit atanu puskat. Michael matliwakglhli chu maskiwilh maktiy libro nema takilhtinit kBiblia. Tuku likgalhtawakgalh makgtayalh xlakata nichuna xlakpuwa, tsukulh likgalhtawakga Biblia chu xtatayana Jehová wa.

Anta kʼEstados Unidos, maktum periódico wa chuna la chatum kgawasa tiku xtatayana Jehová akxilhli akxni xlichuwinama Dios. Akxni xʼama ktiji, akxilhli pi xya akgtum putlaw chu xpasanit. Kgawasa wan:

«Kakxilhli pi niku xtaxtu xajin putlaw xkgalhi akgtum tubo nema limaskakakan lhakgat chu xchan asta kventana, chu liwana xlitaslamanit cinta.

»Lakapala kalh kputlaw, ktalakanulh kventana chu kxitat jin, xwi chatum puskat tiku xtasama. Chu kwanilh: “¡Pero tuku tlawapat!”.

»Akxni xakama malakki malakcha, kkaʼakxilhli kgalhtutu laktsu kamanan. Chu akxni kmalakkilh, puskat kiwanilh: “¡Kakimakgxtakgti! ¡Kakimaxki talakaskin nakan! ¡Nila kiʼakstu nakan, nakkalin kinkamanan!”.

»Kwanilh pi ni chuna xtlawalh, pi nila chuna xlakkaxlalh xtaʼakglhuwit. Chu xla kinkgalhtilh pi xliʼanat kʼakgapun chu xʼama kalin xkamanan.

»Akxni uma puskat xtasama, akit ktatsokgostalh chu ktsukulh tasa chu ktasaskinilh: “¡Katlawa litlan, nichuna katlawa!”. Alistalh kʼakgpixtiyalh chu lakatsuku ktamakxtulh kxputlaw.

»Alistalh wa: “¡Kinkamanan! ¡Kakatamakxtu kinkamanan!”.

»Xlakan chaxkgolh xmakankan xlakata xkatamakxtuka. Chatiy laktsuman xtanumakgo, chatum xkgalhi akgtati kata chu achatum akgkitsis kata xkgalhi, chu chatum aktsu kgawasa tiku xkgalhi akgtiy kata. Anta xwilakgo chu ni xchuwinankgo, chu ni xkatsi pi atsinu xtsankga xlakata xnikgolh.

»Akxni kkatamakxtulh, kmamixilh putlaw, kkatatawi kxpaxtun akgtum aktsu patsaps chu kwanilh puskat: “Kakiwani”.»

Xtatayananin Jehová, lu xlakaskinka tamaskiwin akxilhkgo latamat nema kinkamaxkinitan kiMalakatsukinakan. Nachuna, kamakgtayaputunaw chu tlan kamamakgkatsiniputunaw tiku xakstukan kamakgniputunkan chu tiku ninit chatum tiku lu xpaxkikgo.