Lhuwata kata, nitlan kalichuwinankanit xtatayananin Jehová xlakata ni mastakgo talakaskin nakawilinikan kgalhni. Ni mastakgo talakaskin nakawilinikan kgalhni xlakata chuna wan Biblia (Hechos 15:29). Min kilhtamaku, ni tlawakgo chuna la lakpuwankgo makuchinanin, xlakata lakpuwankan pi tiku ni wilinikan kgalhni tuwa kitaxtu.

Pero, tlakg lhuwa anankgo makuchinanin tiku tlakg katsikgo xlakata la namakuchinankgo chu tuku tlan kitaxtu akxni ni maklakaskinkan kgalhni.

Revista nema taxtulh kprimavera xla kata 2013 Stanford Medicine Magazine, nema maxtulh Escuela de Medicina xla Universidad xalak Stanford (Estados Unidos), xlimin akgtum tema nema xlichuwinan kgalhni. Akgtum artículo xlimin tema «Against the Flow—What’s Behind the Decline in Blood Transfusions» (Ni katatayakan amakgapitsin. Tuku xlakata nialh lu lhuwa tiku kawilinikan kgalhni). Tsokgna, Sarah C. P. Williams, wa: «Umakgolh akgkaw kata nema titaxtunit, lhuwa tuku lakputsanankanit limasiya pi klhuwa hospitales xlikalanka katiyatni wilikan kgalhni nema lhuwa mastakanit chu tlakg maklakaskinkan nixawa la talakaskin, akxni wilakgo kquirófano chu maski ni kquirófano».

Artículo lichuwinan doctora Patricia Ford, tiku matsukilh chu tiku pulalin Centro de Medicina y Cirugía sin Sangre del Hospital xalak Pensilvania (Estados Unidos). Xla wa: «Akxni wankan pi tiku makuchimaka nani xlakata tsankgani kgalhni, pi kgalhni wa tuku nalakgmaxtu, putum makuchinanin chuna lakpuwankgo. [...] Chu maski min kilhtamaku chuna kitaxtu, ni putum kilhtamaku chuna la». *

Doctora Ford, tiku akgatunu kata max akgtujun ciento xtatayananin Jehová kamakuchi, na wa: «Atsinu ni putum makuchinanin tiku kkatachuwinalh xapulana xlakpuwankgo pi komo ni nawilikgo kgalhni, lhuwa tiku kamakuchikgo nanikgo. Akit nachuna xaklakpuwan. Pero alistalh kkatsilh pi maski kaj tsinu nalimaklakaskinkan tuku ni laktuwa kpumakuchin tlan nakamakuchikan tiku ni lakaskinkgo nakawilinikan kgalhni».

Agosto xla kata 2012, revista Archives of Internal Medicine lichuwinalh tuku kitaxtulh tuku tatlawalh kʼakgtum hospital puxamatsayan kata xlakata xkachukukan kxnakujkan. Xtatayananin Jehová tlakg lakapala pakskgolh ni xawa tiku kawilinika kgalhni. Nachuna, tlakg ni tuwa kakitaxtunilh akxni xwilakgo khospital. Tlakg tlan xʼamakgo latamakgo akxni xkachukukanita, chu akxni xtitaxtunita akgpuxam kata xlatamatkan xtachuna xwanit chuna la tiku kawilinika kgalhni.

Akgtum artículo xla The Wall Street Journal nema taxtulh 8 xla abril kata 2013 wa: «Akxni chukunankan chu ni maklakaskinkan kgalhni, wamputun kgalhni nema wi tiku masta, akglhuwata kata kamakgtayanit tiku kamakuchikan chu ni mastakgo talakaskin nakawilinikan xlakata xtakanajlakan. Pero uma tlakg tamaklakaskin khospitales. [...] Tiku chukunankgo wan pi ni kajwatiya tlakg ni lhuwa tumin talaktlawa akxni tamawakan, makikan, lakkaxtlawakan, akxilhkan la wi chu akxni kawilinikan, wata na makgtayanan xlakata ni napasa tajatat xlakata wilinika kgalhni, chu nachuna tuku tuwa kitaxtu akxni tawila khospital».

Wa xlakata Joaquín Casanova, director quirúrgico del Hospital de Manises (Valencia, España), nina makgas wa: «Lu liwana tasiya tuku tlan kitaxtu akxni ni lichukunankan kgalhni. Nachuna, tlakg lakapala paksa xlakata maklakaskinkan tuku ni nalaktlawa chu tlan lakapala napaksa, ni makgas katitawi khospital chu nachuna ni lu tuwa katikitaxtunilh nema limin akxni wi tiku wilinikan kgalhni». Nachuna, Robert Lorenz, director médico xalak Clínica de Cleveland (Estados Unidos), wa: «Xlikana pi akxni wi tiku kwiliniyaw kgalhni, klakpuwanaw pi kaj kmakgtayamaw [...]. Pero chuna la putsanankanit tasiya pi kaj ktlawanimaw tuku nitlan».

^ párr. 5 Xlakata tlakg naʼakgatekgsa tuku lakpuwankgo xtatayananin Jehová xlakata kgalhni, kalikgalhtawakga artículo: «¿Tuku xlakata ni mastakgo talakaskin nakawilinikan kgalhni?».