Ankan kxpulakni

Ankan xlipulaktiy niku tsuku

Xtatayananin Jehová

totonaco

Escuela de Galaad makgatsilh tutupuxamakaw kata

Escuela de Galaad makgatsilh tutupuxamakaw kata

Kata 1943 1 xla febrero tatlawalh kNueva York xapulana clase xla akgtum escuela nema nitu xtachuna. Ama kilhtamaku litsukulh nema la uku lilakgapaskan Escuela Bíblica de Galaad xla Watchtower, kamasiyanikanit liwaka akgtsayan mil lakchixkuwin chu lakpuskatin xlikalanka kkatiyatni.

Pakxtu: Niku laktanukan kʼEscuela de Galaad kSouth Lansing (Nueva York). Pakgalhu: Makgalhtawakgana xla Galaad katachuwinama tiku ankgonit kʼescuela xla clase 31 kʼanfiteatro

Jonathan, tiku nina makgas makgalhsputulh curso wan: «Xlakata putum tuku kkatsininitaw anta takilhtinit kxTachuwin Dios, tlan naklimaklakaskinaw niku nakkanaw, maski talakgpali xtalismaninkan latamanin». Chu xpuskat wanikan Marnie wan: «La uku tlakg kkamakgtayaputun latamanin, xlakata nakatsikgo pi nitu tuku xtachuna tlawakan xtalakaskin kiMalakatsukinakan. Liwana kkatsi pi akxni nalakgapaskgo Jehová, tlakg tlan natawilakgo kxlatamatkan».

Xlakata natatlawa curso xla Escuela de Galaad, nema akgkitsis papaʼ makgapala, ni nataxokgo akxni tatsokgtanukan. Tuku tlakg talichuwinan wa Biblia chu la xlilakaskinka natalichuwinan xtamakatsinin. Tuku kamasiyanikan kcurso kamakgtayakgo xlakata wa pulana nawilikgo xtalakaskin Dios chu kamasiyanikan la nakamakgtayakgo xkachikin Dios chu nakatsikgo tlawakgo akxni wi tuku tuwa natitaxtukgo kxlatamatkan. Uma curso kamakgtayakgo xlakata naʼakxilhkgo tastakyaw xalak Biblia nema natlawa pi tlakg tlan natalalinkgo Dios.

Pakxtu: Albert Schroeder maklakaskima akgtum liʼakxilhtit xla tabernáculo xlakata nakamasiyani tiku ankgonit kʼescuela (1958). Pakgalhu: Ulysses Glass kamasiyanima clase 46 (1968)

Tiku kgalhtawakgamakgolh kʼEscuela de Galaad tamakgaxtokgkgonit chu putum kilhtamaku skujnanikgo Dios. Akxni makgalhsputukgo uma escuela, taspitparakgo niku xlichuwinankgo Dios o kʼatanu país kamalakgachakan. Makgapitsin kamalakgachakan naskujkgo ksucursales xla xtatayananin Jehová nema max 90 wilakgolh xlikalanka katiyatni. Chu lhuwa kamalakgachakan niku lamakgolh lhuwa latamanin, xlakata anta tlakg tlan nalichuwinankgo Dios.

Escuela de Galaad putum kilhtamaku anta tatlawanit kʼestado de Nueva York. Pulana anta xwi kʼHacienda del Reino, xla xtatayananin Jehová kSouth Lansing. Kata 1961 linka kʼBrooklyn, niku pulalinkan taskujut xla xtatayananin Jehová. Kata 1988 asta 1995 xwi kWallkill, Haciendas Watchtower. Pero kata 1995 wilika kPatterson, anta wi asta la uku: Centro Educativo de la Watchtower. Clase 134 kgalhsputli marzo kata 2013.

Pakxtu: Tiku ankgonit kʼGalaad xla clase 116 niku kgalhtawakgakan (2003). Pakgalhu: Tiku kgalhtawakgamakgo kbiblioteca xla Galaad (2011)

Tutumpuxamakaw kata lata tsukunit uma escuela Bíblica de Galaad xla Watchtower, tiku kilakgonit makgtayanankgonit xlakata liwana natamakatsininan xpalakata kiDioskan, Jehová.