Ankan kxpulakni

Ankan xlipulaktiy niku tsuku

Xtatayananin Jehová

totonaco

Kgalhiyawa liwaka 165,000 niku kawilikan likgalhtawakga nema ni tuwa namatsuwikgo

Kgalhiyawa liwaka 165,000 niku kawilikan likgalhtawakga nema ni tuwa namatsuwikgo

Xtatayananin Jehová putum kilhtamaku kaʼakxilhkan lichuwinankgo Dios kʼakgatunu chiki. Pero, la uku kaʼakxilhkan niku wilikgo likgalhtawakga nema ni tuwa matsuwikgo niku lhuwa lamakgolh latamanin.

Nina makgas tamatsukilh la uma talichuwinama Dios. Uma tsukuka lilakan noviembre kata 2011 kkachikin Nueva York. Ni lhuwa xtatayananin Jehová limaklakaskinkgolh niku kawilikan likgalhtawakga xlakata nakamasiyanikgo latamanin tamakatsinin xalak Biblia. Uma lu tlan kitaxtulh wa xlakata tamaklakaskima atanu kachikinin.

Lata marzo kata 2015 xkamaxkikanita congregaciones xla xtatayananin Jehová xlikalanka katiyatni 165,390 niku kawilikan likgalhtawakga o carritos. Nachuna kgalhikgo mesas chu niku kawilikan likgalhtawakga.

Lichuwinankan Dios akgatunu chiki wa tuku tlakg xlakaskinka limaklakaskinkgonit xtatayananin Jehová xlakata nakamasiyanikgo latamanin tuku wan Biblia. Wa xlakata niku kawilikan likgalhtawakga nema ni tuwa matsuwikan tlan kitaxtunit. Kaʼakxilhwi makgapitsi liʼakxilhtit.

Anta kPerú chatum chixku tiku wanikan Raúl kalakgtalakatsuwilh xtatayananin Jehová tiku xyakgolh niku wilikan likgalhtawakga chu kawanilh: «¿Niku xwilatit? Akgtutu kata la kkaputsaman. Akxni kakxilhli uma carrito kpaxtikatsinilh Dios».

Xtatayananin Jehová xlichuwinankgoya Dios niku xwi Raúl, pero xla nikxni xtawila xchik kakuwani chu nipara sábado chu domingo. Raúl kawanilh pi xkatalikgalhtawakganita Biblia xtatayananin Jehová chu xkgalhtawakgaputumpara. Wa xlakata lakaxwilikgolh.

Anta kBulgaria akgtum tamakgaxtokgat tachokgolh xlakatin niku kawilikan likgalhtawakga chu lilh libro Tuku makgtayanan naʼanan tapaxuwan kfamilia. Titaxtulh akgtum semana taspitkgolh chu linkgolh Ki libro xla takgalhtawakga xalak Biblia chu Aprendamos del Gran Maestro. Xtatayana Jehová tiku xlakgaya carrito kakgalhskilh niku kgalhit xkaman xkgalhikgo. Tamakgaxtokgat wankgolh: «Nina kgalhiyaw, pero komo namin kilhtamaku nakgalhiyaw, klakaskinaw pi na kalakgapasli Dios. Chu umakgolh libros wa uma tuku nakinkamakgtayayan».

Anta kʼUcrania, chatum chixku tiku soldado kalakgtalakatsuwilh xtatayananin Jehová tiku xlakgayakgolh niku xkawilikanit likgalhtawakga chu kawanilh: «Laktsuman, kakilawaniw niku akxni namin Armagedón». Uma chixku aku xmakgtlawanit guerra kʼUcrania. Tuku xlama xlikalanka katiyatni liwana xlitasiya pi Armagedón lakatsuwa xwi, chu xkgalhskinkan tuku xlakata Dios nitu xʼatlawa. Xtatayananin Jehová limasiyanikgolh Biblia pi wi tuku xlakata Dios mastama talakaskin, pero nialh makgas namasputu tuku nitlan. Ama chixku makglhtinalh revistas Makatsinina chu ¡Despertad!, chu libro ¿Existe un Creador que se interese por nosotros?

Anta kMacedonia, akxni xtatayananin Jehová xlimaklakaskimakgolh carritos xlakata nalichuwinankgo Dios, chatum kgawasa kawanilh pi xkalikgalhtawakganita revistas chu xlakaskin libro ¿Tuku xlikana masiyay Biblia? Akxni maxkika, kawanilh pi xʼama an kbiblioteca xlakata nalikgalhtawakga. Alistalh titaxtulh akgtiy hora chu xlikgalhtawakganita 79 páginas, taspitli chu wa: «Uma libro lakgpali latamat. Katsilh pi lhuwa tuku nichuna xakkatsi. Lu xlikana tuku wan uma libro. Chu uku tanu la kakxilha latamat».