Ankan kxpulakni

Ankan xlipulaktiy niku tsuku

Xtatayananin Jehová

totonaco

Kkalakgchanaw putum latamanin tiku atanu tachuwin kgalhikgo kCanadá

Kkalakgchanaw putum latamanin tiku atanu tachuwin kgalhikgo kCanadá

Liwaka 60 tanu tanu xtachuwinkan tiku lamakgolh kCanadá, chu max 213,000 tiku anta lamakgolh wankgo pi wa uma tachuwin nema kalimakgastakka.

Xlakata nachankgo kxnakujkan, lhuwa xtatayananin Jehová katsinikgonit makgapitsi umakgolh tachuwin. Akxni ksputma kata 2015, liwaka 250 latamanin xmakgalhsputukgonit curso xlakata nakatsinikgo tanu tachuwin nema lakkaxwilikgolh xtatayananin Jehová.

Nachuna, xtatayananin Jehová tlawakgolh likgalhtawakga nema takilhtikgonit kBiblia kxtachuwinkan, nachuna laktsu videos kʼakgtsayan tachuwin xalak Canadá: algonquino, cree de las llanuras, cree de los pantanos occidental, inuktitut mohaqués, odawa, oyibua septentrional (norteño) chu piesnegros. *

Tiku katsinikgo makgapitsi umakgolh tachuwin wankgo pi lu tuwa. Carma wan: «Akxni ktsukulh kamakgtaya tiku xmatitaxtikgo kxtachuwinkan piesnegros, xakmakgkatsi xtachuna la xaktalakgpichinit. Ni liwana xaklakgapasa tachuwin, chu ni xakkatsini likgalhtawakga chu la xtakgaxmata ama tachuwin».

Terence tiku kamakgtaya tiku matitaxtikgo ktachuwin cree de los pantanos occidental, wan pi «lhuwa tachuwin lu laklhman chu tuwa kawankan». Daniel chatum tiku lichuwinan Dios putum kilhtamaku xalak isla de Manitoulin (Ontario), wan: «Ni kkgalhiyaw lhuwa libros nema tlakg nakinkamakgtayayan. Xlakata tlan nakatsiniya odawa talakaskin naskiniya namasiyaniyan chatum tiku tlakg lina kata xalak kachikin».

¿Tlan kitaxtunit uma tuku tatlawanit? Chatum puskat oyibua wa pi taskujut nema tlawakgo amakgapitsi takanajla ni tatalakxtumi tuku tlawakgo xtatayananin Jehová. Wan pi latamanin tlakg ni tuwa katachuwinankgo xtatayananin Jehová xlakata Biblia akxni kalakgapaxiʼalhnankgo chu kalikgalhtawakganikgo akgtum texto xalak Biblia ktachuwin oyibua.

Bert, chatum traductor tiku stakli ktribu blood (Alberta), wan: «Kakxilhnit chalhuwa piesnegros akgpixtikgo kilikgahtawakgakan chu wankgo: “¡Uma kintachuwin, uma kila!”. Makglhuwa kakxilhnit la tasakgo akxni akxilhkgo videos kxtachuwinkan».

Chatum puskat tiku chuwinan cree paxtikatsininalh xlakata video nema tatlawalh kxtachuwin ¿Tuku xlakata nalikgalhtawakgaya Biblia? Wa pi xmakgkatsi la komo xtse tiku xtachuwinama.

Xatapaxuwan ankgo maski makgat

Lhuwa xtatayananin Jehová lu liskujkgonit xlakata nakalinikgo xtachuwin Dios nema tlan nakamamakgkatsini tiku atanu xtachuwinkan. Terence chu xpuskat, Orlean, lakapastakkgo tuku lalh akxni makgtayanankgolh. Wankgo: «Akxni kkilaw kilhuwakan xakkanaw, lu xlonkgnan, max akgkutiy hora klichaw kaj xlakata xakkalitachuwinamputunaw Dios tiku xlamakgolh kLittle Grand Rapids. Latamanin lu lakgatikgolh».

Makgapitsi makgxtakgkgonit lakwan xchikkan kaj xlakata lakatsu natawilakgo kʼamakgolh laktsu kachikinin. Daniel chu xpuskat, LeeAnn, pulana ankgolh lichuwinankgo Dios akgtutu papaʼ chu alistalh lakapastakkgolh anta naʼankgo latamakgo. Daniel wan pi lu xlakaskinka akxilha tlakg nakgalhi kilhtamaku xlakata tlakg tlan nakatalalin latamanin chu nakamakgtaya tlakg nakatsiputunkgo.

«Xlakata xlikana kkapaxki»

¿Tuku xlakata xtatayananin Jehová putum tlawakgo xlakata nakalitachuwinankgo Dios amakgolh indígenas? Rose, xpuskat Bert, wan: «Kkamakgtayaputun umakgolh latamanin xlakata akit na indígena chu xlakata tuku ktitaxtunit liwana kkatsi pi lu makgtayanan nalilatamakan xtastakyaw Biblia».

Orlean wan: «Klakaskin pi kachikin cree na tlan wa kiMalakatsukinakan nakapulalin. Lu klipaxuwa nakkamakgtaya umakgolh latamanin na xʼamigos Jehová nalitaxtukgo chu natayanikgo taʼakglhuwit nema kgalhikgo».

Marc matitaxti likgalhtawakga ktachuwin piesnegros. ¿Tuku xlakata lu liskuja nakamasiyani xlakata Biblia tiku lamakgolh kxkachikin? Xla wan: «Xlakata xlikana kkapaxki».

^ párr. 4 Wilakgolh makgapitsi laktsu kachikinin kʼEstados Unidos nema na chuwinankgo makgapitsi umakgolh tachuwin.