Ankan kxpulakni

Ankan xlipulaktiy niku tsuku

Xtatayananin Jehová

totonaco

Akgtum campaña nema tatlawalh xlikalanka katiyatni masiyalh jw.org

Akgtum campaña nema tatlawalh xlikalanka katiyatni masiyalh jw.org

Agosto kata 2014, xtatayananin Jehová lakgatum katiyatni maʼakgpitsikgolh maktum tratado nema masiyalh xlakata jw.org. Tuku tlan kitaxtulh, ama papaʼ tiku tanukgolh ksitio atsinu ni chan 65millones, 20% taliwakalh lata tanukan. Xlikalanka katiyatni 10,000 latamanin people skinkgolh takgalhtawakga xalak Biblia kʼInternet, taliwakalh 67% nixawa julio. Uma campaña kamakgtayanit katiwa latamanin.

Tiku putsakgo xtakgalhtin xtakgalhskinin

Chatum xtatayana Jehová xalak Canadá xakgatlilh chatum puskat wanikan Madeline akxni xtanumakgolh kʼelevador chu masiyani tratado nema xtamaʼakgpitsima, wanikan ¿Niku natekgsa xtakgalhtin xalaktuwa takgalhskinin xla latamat? Madeline wa pi xlikgotana katsisni skininit Dios pi xmakgtayalh natekgsa xtakgalhtin umakgolh takgalhskinin. Xchuwinanit kteléfono klhuwa pusikulan xlakata xmaxkika takgalhtawakga xalak Biblia, pero niti kgalhtilh. Tunkun tsukulh katakgalhtawakga Biblia xtatayananin Jehová.

Tiku ni lakgapaskgo Biblia

Anta Filipinas, Rowena tachuwinalh chatum chixku xalak china xkilhtin restaurante, maxkilh tratado chu wanilh pi xtatayananin Jehová kaj chunta mastakgo takgalhtawakga xalak Biblia.

Chixku wa pi nikxni xʼakxilhnit Biblia. Tuku litachuwinalh tlawalh pi xʼamputulh xalanka tamakxtumit xla xtatayananin Jehová. Nachuna wa pi tlakg xkatsiputun tuku masiya Biblia chu anta xʼama makti kkisitiojkan kʼInternet.

Tiku akgatapa

Guillermo, chatum xtatayana Jehová akgatapa, tatanokglhi Jorge, tiku xtaʼan kʼescuela na akgatapa xwanit. Jorge wanilh pi aku xninit xtse chu lhuwa tuku ni xʼakgatekgsa chu xkgalhi lhuwa takgalhskinin. Wa xlakata, Guillermo maxkilh tratado chu wanilh pi kjw.org xʼama tekgsa ktachuwin xla señas nema xkgalhtilh xtakgalhskinin. Na wanilh pi tlan xʼalh ktamakxtumit kPukgalhtawakga xla xtatayananin Jehová. Jorge alh, chu lata ama kilhtamaku ni makgatsankga tamakxtumit, maski 60 kilómetros xlimakgat la wi Pukgalhtawakga.

Tiku lu lakgamakgat wilakgolh

Akgtiy tamakgaxtokgat xtatayananin Jehová xatapaxuwan ankgolh maski tapalaxla chu akgchaxan hora lichankan kbarco niku 280 latamanin anan kʼGroenlandia. Anta litachuwinankgolh Dios latamanin, kamaxkikgolh tratado chu masiyakgolh video xla jw.org ktachuwin groenlandés. Tsukukgolh makgalhtawakgekgo akgtum tamakgaxtokgat, la uku makgtiy akgatunu semana kgalhtawakgo kteléfono.

Pero, ni kaj watiya uma tuku tlawaka. Xtatayananin Jehová xalak Nicaragua na lakkaxwilikgolh namaʼakgpitsikgo tratado kselvas kCaribe tiku chuwinankgo mayangna. Maski ni xatlan autobús, lichankgolh 20 horas kcarretera nema ni kawan, atantun tlawankgolh 11 horas kkaputlunin xlakata nachankgo klaktsu kachikinin. Lakgatum kachikin, maʼakgpitsikgolh tratados chu masiyakgolh videos kmayangna, nema kaks kamalakawanilh chu lu lakgatikgolh latamanin xala anta.

Anta kBrasil, Estela maxkilh tratado chatum chixku tiku xtitaxtuma kselva amazonas. Chixku makglhtinalh, pero ni tlakg katsiputulh chu makilh kxbolsa. Akxni xtaspitma xchik, xbote uma chixku laklalh chu anta tamakgxtakgli kkgalhtuchokgo. Akxni xkgalhima xminka makgtayakan, likgalhtawakga tratado. Maklakaskilh xteléfono tanulh kjw.org, likgalhtawakgalh lhuwa artículos chu maktilh makgapitsi videos. Ni makgas kilhtamaku, lakgapasli xchixku Estela chu wanilh pi xpaxtikatsinilh xlakata xmaxkinit tratado. Xla wa: «Artículos nema klikgalhtawakgalh akxni xakkgalhkgalhima xminka kimakgtayakan lu tlan kimamakgkatsinilh. Kinkamanan lu lakgatikgo videos xla Caleb. Chuntiya naktanu kjw.org».