Ankan kxpulakni

Ankan xlipulaktiy niku tsuku

Xtatayananin Jehová

totonaco

¿Akgtum granja nema kamawi lhuwa millones latamanin?

¿Akgtum granja nema kamawi lhuwa millones latamanin?

Imprenta nema wi kHacienda Watchtower (Wallkill, Nueva York) liwakaya tipuxum kata lata tsukulh tamaklakaskin: 2 xla febrero kata 1973. Uma kilhtamaku tatlawalh revistas Makatsinina chu ¡Despertad! nema kaj liʼakxilhka komo tlan nataxtu.

Akxni xtsankga akgkaw kata, xtatayananin Jehová xtamawakgonit pukuxtu anta xlakata xchankgolh tuku nawakgo tiku kskujkgo kBrooklyn (Nueva York). Pero lata 1973, kʼuma hacienda ni kajwatiya xʼama tamakgala tuku wakan, wata na xʼama tatlawa liwat xla takanajla (Mateo 24:45-47).

Hacienda Watchtower akxni xtsukuma década 1970 (Wallkill, Nueva York)

Philip Wilcox, tiku xpulalin imprenta, lakapastaka tuku lalh uma kilhtamaku: «Akgtum papaʼ xtitaxtunit xlakata xakwilimaw rotativas de bobina. Chu akxni kwilikgow, ktsukuw liʼakxilhaw komo tlan xwanit. Kaj lakapala akglhuwa mil revistas taxtulh chu kmalakgachayaw kʼimprenta xalak Brooklyn, anta niku xkamalakgachakan kcongregaciones. Nipara maktum revista paxkat wa».

Akxni xtsukuma década 1970, lu lhuwa kskinkan likgalhtawakgaka asta imprenta xalak Brooklyn ni xʼakchan. Tantaku chu tantaskaka xlitaskujat xwanit xlakata tlan xakmalakgachaw likgalhtawakga nema kskinkan. Xlakata xʼakchalh, xtatayananin Jehová tlawakgolh xasasti imprenta xalak Wallkill.

Pakxtu: Wilimaka rotativa M. A. N. xalak Wallkill (enero kata 1973). Pakgalhu: Wilimaka xasasti bobina xla kapsnat krotativa M. A. N.

Xapulana edificio xla imprenta xalak Wallkill xkgalhi akgtati prensas, akgtum niku xmakikan likgalhtawakga chu akgtum Pukgalhtawakga. Pero tlakg kstakma la kskinkan likgalhtawakga. Wa xlakata, akxni xapulana imprenta nina xtamaklakaskin chuna la xmakakchan, tsukuka tlawakan atanu edificio, nema tlakg lanka xʼama wan nixawa xapulana. Chu akxni nina xtlawakgokan uma edificio, tsukulh tamaklakaskin akgchaxan prensas nema kawilika anta xlakata naʼimprimirlikan.

Xlakata tlakg lhuwa kskintilhamaka likgalhtawakga chu tlakg takatsilh la naʼimprimirlikan tlawalh pi makglhuwa xmastakaka chu xkaxtlawaka imprenta xalak Wallkill. Década xla 1980, rotativas offset wa tawi xlakgxokgo rotativas tipográficas.

Kkata 2004, nialh tamaklakaskilh imprenta xalak Brooklyn chu imprenta xalak Wallkill xlimakgtumku tsukulh imprimirli libros. Chu kkata 2010, anta ksucursal xalak Canadá tsukulh tatlawa revistas. Imprenta nema wilika anta tlan tlawa 200,000 revistas akgatunu hora.

Pakxtu: Kaxwilimaka pliegos kʼencuadernación xalak Wallkill (2005). Pakgalhu: Hacienda Watchtower kata 2003 (Wallkill, Nueva York)

La uku, kʼimprenta xalak Wallkill putum máquinas tlawakgo, xlakata tamaklakaskin tuku xalaksasti taxtuma. Anta skujkgo max 280 nema ni kaxokgonikan. Katata imprimirlika liwaka 17 millones libros chu biblias. Ni kajwatiya wi imprenta kWallkill, kCanadá chu kMéxico, wilakgolh akgkutiy imprentas xlikalanka katiyatni, África, Asia, Australia, Europa chu k’América del Sur, tlawa pi nakgalhikgo likgalhtawakga millones latamanin tiku maklakaskinkgo tuku xla Dios (Mateo 5:3).