Ankan kxpulakni

Ankan xlipulaktiy niku tsuku

Xtatayananin Jehová

totonaco

Tuku putum kilhtamaku naklakapastaka

Tuku putum kilhtamaku naklakapastaka

Akgatunu kata, lhuwa mil latamanin lakgapaxialhnankgo niku pulalinkan xtaskujutkan xtatayananin Jehová chu sucursal xalak Estados Unidos, nema wi kʼestado xla Nueva York. Umakgolh chiki na kkawaniyaw Betel, tachuwin nema minacha kxaʼhebreo chu kilhchani «xChik Dios». Makgapitsi tiku lakgapaxialhnankgo lakatsu wilakgolh, pero amakgapitsi lu makgat minkgoyacha. Akxilhputunkgo la katlawakan likgalhtawakga chu la lakkaxwilikan kintaskujutkan, o kalakgapaxialhnamputunkgo xʼamigoskan tiku skujkgo anta. Nina makgas alh kBetel chatum tiku liwana xlakpuwanit nakalakgapasa.

Marcellus, chatum xtatayana Jehová tiku lama kʼAnchorage (Alaska, Estados Unidos) chu kaj pulaktiy tachuwin tlan wan xlakata kgalhilh parálisis cerebral nina akglhuwa kata chu silla de ruedas tsukulh limaklakaskin xliputum kxlatamat. * Wa xlakata, xtalakaskin pi xmakgtayaka tuku xtlawalh chali chali. Maski nila tuku xtlawa, lu xʼamputun lakgapaxialhnan Betel. Chu kgantaxtulh tuku xlakaskin.

Corey, xʼamigo Marcellus tiku makgtayalh xlakata xtalakkaxwililh niku xʼama an wan: «Ni chuntiya xtamakgxtakga. Ankgalhin xkintachuwinan xlakata xakwanilh la kitaxtuma tuku xaklakkaxwilinitaw. Xlakata Marcellus kajwatiya tlan xwan “tlan” chu “ni”, xtalakaskin pi xaktlawanilh takgalhskinin xlakata xakkatsilh tuku xlakaskin». Chuna xaktakgalhchuwinan:

—¿Lakaskina nakan kminchik?

—Ni.

—¿Lakaskina nakxakgatli makuchina?

—Ni.

—¿Katsiputuna la kitaxtuma tuku lakkaxwilinita xlakata napina kBetel?

—Tlan.

Corey wan: «Chu xakwani la xkitaxtuma tuku xlakkaxwilinit. Akxni xakakxilha pi xmakgantaxtima tuku xlakaskin lu kimakgapaxuwalh».

Marcellus lhuwa tuku tuwa titaxtulh. Xlakata ni lu xkgalhi tumin, akgtiy kata limastokgli tuku tlan xlixokgolh xpasaje asta kNueva York nema 5,400 kilómetros xlimakgat. Xlakata xtatatla, putsalh tiku tlan xtaʼalh chu xmakgtayalh. Xaʼawatiya, xtalakaskin pi makuchina xmaxkilh talakaskin xlakata tlan xʼalh, chu maxkika talakaskin akxni nialh lhuwa kilhtamaku xtsankga xlakata xʼalh.

Akxni xwilachaja kNueva York, Marcellus lu lipaxuwalh xlakata malakgapasnika sucursal nema wi kBrooklyn, Patterson chu Wallkill. Akxilhli la xkaʼimprimirlikan Biblias chu likgalhtawakga klaklanka máquinas chu katsinilh la talakkaxwilinit taskujut nema ktlawayaw. Nachuna malakgapasnika niku wilakgolh «Biblia chu xtukuwani Dios» chu «Akgtum kachikin xlakata xtukuwani Jehová». Na kalakgapasli lhuwa latamanin chu kgalhilh xalaksasti amigos. Xlikana, putum kilhtamaku nalakapastaka niku kilalh.

Lhuwa tiku lakgapaxialhnankgo Betel ni katsikgo la nawankgo tuku makgkatsikgo. Pero akxni kgalhskinka Marcellus la makgkatsilh xlakata lakgapaxialhnalh Betel, lu xatapaxuwan kgalhtinalh chuna la matlanilh. Wa: «¡Tlan, tlan, tlan!».

Lu namatliwakglhan wix chu mifamilia komo nalakgapaxialhnana Betel, chuna la kitaxtunilh Marcellus. Xtatayananin Jehová kkgalhiyaw sucursales kputum katiyatni chu xatapaxuwan kkamakgamakglhtinanaw tiku amputunkgo lakgapasnankgo. Na tlan xwa komo na xpit lakgapasnana.

^ párr. 3 Marcellus nilh 19 xla mayo kata 2014, akxni xmasputumaka uma artículo.