Ankan kxpulakni

Ankan xlipulaktiy niku tsuku

Xtatayananin Jehová

totonaco

Kkawaniyan pi kalakgapaxialhnanti sucursal xalak Estados Unidos xla xtatayananin Jehová

Kkawaniyan pi kalakgapaxialhnanti sucursal xalak Estados Unidos xla xtatayananin Jehová

«¡Lu stlan tuku klakapastakaw xlakata akxni kkilaw kBetel! ¡Ankgalhin naklakapastakaw!» Wa uma tuku wankgolh akgtum tamakgaxtokgat xalak Vanuatu, akxni xkilakgapaxialhnankgonita sucursal xalak Estados Unidos xla xtatayananin Jehová. Nachuna makgkatsikgo liwaka 70,000 latamanin tiku lakgapaxialhnankgo kata kata.

¿Kalakgapaxialhnanita umakgolh edificios nema wilakgo kʼEstados Unidos? Komo nina pina, kkawaniyan pi kapit.

¿Tuku naʼakxilha kpulakatunu edificios nema tlakg xlakaskinka?

Niku pulalinkan xtaskujutkan xtatayananin Jehová kBrooklyn, (Nueva York). Akxni namalakgapasnikana tlakg nakatsiya tuku tatlawa anta xlakata la napulalinkan chu makgtayanankan xlakata natalichuwinan xalakwan xalaksasti xlikalanka katiyatni. Na tlan naʼakxilha pulaktiy tuku lakkaxwilikanit. Pulaktum wanikan «Akgtum kachikin nema lin xtukuwani Jehová», chu xliʼakgtiy «Biblia chu xtukuwani Dios». Kxapulana lichuwinan tuku titaxtukgonit xlakskujni Jehová lata kxapulana siglo asta kkinkilhtamakujkan. Chu xlipulaktiy tlan naʼakxilha tanu tanu Biblia nema kamatitaxtikanit kʼatanu tachuwin chu limin tukuwani nema kajwatiya Dios lakgchan: Jehová.

Niku masiyakan kPatterson, (Nueva York). Kalakgapasti tanu tanu escuelas nema tatlawa unu, Escuela Bíblica de Galaad xla Watchtower chu Escuela niku ankgo comité de sucursal chu xlakpuskatinkan. Na naʼakxilha videos chu atanu tuku lichuwinan taskujut nema tatlawa kʼatanu departamento, la Departamento de Arte, Departamento de Asuntos Legales, Departamento de Servicio chu Servicios de Audio chu Video.

Niku tlawakan likgalhtawakga chu Departamento de Envíos xla Wallkill (Nueva York). Kaskinti pi kamalakgapasnika xlakata naʼakxilha la tlawakan, malakgnukan chu kamalakgachakan Biblia chu likgalhtawakga kcongregaciones xalak Estados Unidos, kCaribe chu kʼalakatanu kachikinin xalak katiyatni.

¿La xlilhuwa hora nakalilakgapasa umakgolh edificios?

Max akgtum hora nalimalakgapasnikana kBrooklyn; chu kPatterson, max akgtiy hora, chu kWallkill, max akgtiy hora a itat.

¿Tiku malakgapasninankgo?

Watiya tiku xatapaxuwan skumajkgo kBetel malakgapasninankgo. Xlakan akxilhkgo pi na limakgtayanankgo uma taskujut xlakata namasiyakgo tuku wan Biblia nema ktlawayaw xtatayananin Jehová. Mayo kata 2014, liwaka 5,000 tiku skujmakgolh kʼumakgolh akgtutu edificios, chu liwaka 3,600 kamasiyanikanit la tlan namalakgapasninankgo. Tlan malakgapasninankan max 40 tanu tanu tachuwin.

¿La xlilhuwa taxokgo namalakgapasnikana?

Ni taxokgo namalakgapasnikana.

¿Talakaskin xtatayana Jehová nalitaxtuya xlakata tlan namalakgapasnikana?

Ni. Lhuwa tiku kilakgo ni xtatayananin Jehová litaxtukgo. Maski xtatayana Jehová wix o ni, akxni namalakgapasnikana tlakg naʼakgatekgsa taskujut nema tatlawa unu xlakata namakgtayanan ktaskujut nema tlawakgo xtatayananin Jehová xlikalanka katiyatni.

Chatum puskat musulmana xalak India kilalh kPatterson, uma tuku wa akxni malakgapasnikgoka: «Lu kmakgtapakgsiputun unu. Lu kpaxtikatsini xlakata lu tlan kilikatsinitit».

¿Tlan naʼankgo kamanan?

¡Chuna! Komo kamanan nalakgapaxialhnankgo umakgolh edificios lu nakamakgtaya. John, chatum tiku kilalh kBetel xalak Estados Unidos, tsokgli: «Lata ktaspitwi kchiki, kamanan tiku kinkakitalakgon, chuntiya lichuwinankgo tuku akxilhkgolh. Akxni nina xakanaw kBetel, kaj xlakpuwankgo tuku max xtatlawa kBetel. Pero la uku skujputunkgo kBetel akxni laklanka nawankgo».

¿Tlan kalakgapaxialhnankan makgapitsi sucursales xla xtatayananin Jehová xalak atanu países?

Chuna. Tlan kalakgapaskan sucursales xalak lhuwa países. Xlakata nakatsiya niku anan sucursales kapit ksección «Niku wi sucursales chu namalakgapasnikana». Kkawaniyan pi kakalakgapaxialhnanti nema wix lakaskina.