Ankan kxpulakni

Ankan xlipulaktiy niku tsuku

Xtatayananin Jehová

totonaco

Lavanderías niku chakgekan tuku likaxakakan kcocina chu asta corbatas xla seda

Lavanderías niku chakgekan tuku likaxakakan kcocina chu asta corbatas xla seda

Lakchixkuwin chu lakpuskatin tiku nina linkgo kata ksucursal xalak Estados Unidos xla xtatayananin Jehová liwana chu palha skujkgo akxni chakgekgo max akgtum mil akgtsayan ciento toneladas lhakgat akgatunu kata kBrooklyn, kPatterson chu kWallkill (Nueva York). Pero tuku tanu tlawa uma taskujut ni wa la lilhuwa lhakgat kachakgekan, wata la xlitipalhuwa tuku kachakgekan.

Akgatunu kilhtamaku, tiku wilakgolh ksucursal xalak Estados Unidos malakgachakgo liwaka 11,000 lhakgat klavanderías, 2,300 camisas, 650 pantalones chu lhuwa camisetas, calcetines chu xalaktsu lhakgat. Nachuna, kamalakgachakan 900 lhakgat anta ktintorería.

Na chan lhuwa sábanas, toallas chu mantas, nachuna tuku wilikgo meseros chu tuku likaxakakan kcocina. Chu putum uma xlitachakget, xlitamaskakat chu namaspitparakan. Makgapitsi lhakgat, la tuku likaxakakan makxtum kachakgekan, pero atanu tuku tlakg kuenta xlitatlawat, la blusas chu corbatas xla seda, pulakatunu kachakgekan.

Tiku skujkgo klavandería akxilhkgo makatunu lhakgat xlakata naʼakxilhkgo komo ni taxtitnit o komo tsankgani botones. Komo tsankgani akgtum botón, liwilinikan akgtum máquina o amakan wilikan. Chu komo xlitakaxtlawat maktum lhakgat, wa tlawa tiku katsini.

Xlakata natakatsi putum lhakgat nema tachakge, akgtum máquina wilini makatunu lhakgat akgtum etiqueta niku kgalhi código xlakata natakatsi tiku xla. Uma código makgtayanan xlakata natakatsi tiku xla akxni tachakgekgonita chu kaplancharlikanit, chu chuna tlan nakalinikan kxcuartojkan.

Tiku aku tsukukgo skujkgo anta, wa kamasiyanikgo tiku tlakg katsinikgo. Max tiku aku katsinima namasiyanikan akgpuxam taskujut nema tatlawa anta. Uma ni tuwa tasiya pero lin kilhtamaku nakatsinikan nachakganankan, xlakata talakaskin nalakgapaskan tukuya lhakgat chu nakatsinikan tuku katlawani akxni wi tuku lichakgekan chu la tlawakan.

Tajh, tiku akgtum kata a itat lata skujma klanvandería, lichuwinan xlakata la tamakgkatsi anta: «Lu tlan latalalin; lu tlan tamakgkatsi kataskujkan tiku tanu tuku titaxtukgonit». Shelly, atanu tiku skuja anta wa: «Lu lanka talakgalhaman nakmakgtayananaw xlakata familia Betel tlan natasiyakgo xlhakgatkan».