Akinin ktlawayaw chuna la wan Biblia xlakata la xlitatlawat akxni natalakapastaka akxni tinilh Cristo, nema nawanikan «xtaway Malana» o xaʼawatiya taway (1 Corintios 11:20). Pero, tuku kanajlakgo chu tuku lismanikgonit tlawakgo amakgapitsi takanajla xlakata uma talakapastakni ni takilhtinit kBiblia.

¿Tuku xlakata tatlawa?

Ktlawayaw xTaway Malana xlakata naklilakapastakaw xtamakamastan Jesús nema tlawalh kimpalakatakan chu klimasiyaniyaw la kpaxtikatsiniyaw (Mateo 20:28; 1 Corintios 11:24). Uma tuku tatlawa ni akgtum sacramento, chu nipara akgtum talismanin xlakata takanajla nema natlawa pi nakatapatikan xtalakgalhinkan. * Biblia masiya pi Dios tlan nakinkatapatiyan kintalakgalhinkan komo kanajlaniyaw Jesús, chu ni kaj xlakata akgtum talismanin xla takanajla (Romanos 3:25; 1 Juan 2:1, 2).

¿La makglit tatlawa?

Jesús kawanilh kstalaninanin pi xtlawakgolh Taway xla Malana, pero ni wa la xlimakglit (Lucas 22:19). Makgapitsi latamanin lakpuwankgo pi xlitatlawat akgatunu papaʼ; makgapitsi, akgatunu semana, chali chali, makglhuwa tantaku o la xlimakglhuwa natlawaputun chatum lataman. Pero, wi apulaktu tuku kilikuentajtlawatkan.

Jesús lakkaxwililh Taway xla Malana watiya kilhtamaku akxni xtatlawa Pascua xla judíos; chu ni lhuwa hora titaxtulh nilh (Mateo 26:1, 2). Uma ni kaj akglakgwa nachuna kilhtamaku lakgchalh. Xtachuwin Dios tamalakxtumi xtamakamastan Jesús, borrego xla Pascua (1 Corintios 5:7, 8). Uma Pascua tatlawa makgtum akgtum kata (Éxodo 12:1-6; Levítico 23:5). Xapulana kstalaninanin Cristo na xtlawakgo akxni talakapastaka akxni tinilh Cristo makgtum akgtum kata, chu xtatayananin Jehová nachuna ktlawayaw, xlakata ktlawayaw chuna la wan Biblia. *

Kilhtamaku chu hora

Liʼakxilhtit nema lakkaxwililh Jesús ni kajwatiya kinkamakgtayayan nakatsiyaw la xlimakglit natatlawa, nachuna tuku kilhtamaku chu hora. Xla lakkaxwililh 14 xla nisán kata 33 akxni xtsankganita Chichini, chuna la kstalanitilhakan papaʼ xalamakgasa (Mateo 26:18-20, 26). Xtatayananin Jehová nachuna klakapastakaw akxni tinilh Cristo akgatunu kata na akxnitiya ama kilhtamaku, ktlawayaw chuna la xapulana kstalaninanin Cristo. *

Kilhtamaku 14 xla nisán kata 33 lakgchalh viernes, pero akgatunu kata talakgpali kilhtamaku. Xlakata nakatsikan tuku kilhtamaku lakgchan 14 xla nisán, xtatayananin Jehová klimaklakaskinaw tuku xtamaklakaskin kxkilhtamaku Jesús, chu ni wa tuku maklakaskikgo la uku judíos. *

Kaxtalanchu chu vino

Uma xasasti tuku talakapastaka, Jesús limaklakaskilh kaxtalanchu nema ni xkgalhi limaxkutin chu nituku xkgalhi atanu, chu vino tinto nema nina xaʼakatlan, nipara vino nema lakgmakankanit limasakgsin, kuchu, tuwan o tuku limakgamikan.

Lhuwa takanajla maklakaskinkgo kaxtalanchu nema kgalhi limaxkutin. Pero, Biblia makglhuwa limaxtu limaxkutin la talakgalhin chu tuku nitlan (Lucas 12:1; 1 Corintios 5:6-8; Gálatas 5:7-9). Wa xlakata, kaxtalanchu nema ni kgalhi limaxkutin chu ni kgalhi xlimakgamikan lu tlan kilhchani xmakni Cristo nema ni kgalhi talakgalhin (1 Pedro 2:22). Amakgapitsi takanajla maklakaskinkgo xchuchut uva, chu ni wa tuku wan Biblia. Chuna tlawakgo xlakata wankgo pi nitlan wakan kuchu maski Biblia ni kinkawaniyan pi nitlan (1 Timoteo 5:23).

Kaj xlimasiyakan, ni wa xmakni o xkgalhni Jesús

Kaxtalanchu nema ni kgalhi limaxkutin chu vino tinto nema tamaklakaskin akxni talakapastaka akxni tinilh Cristo, kaj limasiyakan nema kilhchanima xmakni chu xkgalhni Cristo. Ni kaj xalan xmakni o xkgalhni Jesús wankgo chuna la lakpuwankgo makgapitsin. Na ni talakgla xmakni chu xkgalhni. Kaʼakxilhwi tuku wan Biblia xlakata uma tamasiy.

  • Komo Jesús xkawanilh kstalaninanin pi xwakgolh xkgalhni, tuku xkaskinilh wa pi ni xkgalhakgaxmatkgolh xlimapakgsin Dios niku wan pi ni nawakgo kgalhni (Génesis 9:4; Hechos 15:28, 29). Pero nichuna, xlakata Jesús nikxni xkamatlawilh tuku xlakatsalalh xlimapakgsin Dios xlakata la xlilakaskinka kgalhni (Juan 8:28, 29).

  • Xʼapóstoles ni wakgolh xkgalhni Jesús, xlakata ama katsisni Jesús wa pi xkgalhni xʼama stajtamakgan, xlimasiyama pi nina xtamakamasta (Mateo 26:28).

  • Jesús mastalh xtamakamastan «wampi wa nchu man makgtum» (Hebreos 9:25, 26). Komo kaxtalanchu chu vino xmakni chu xkgalhni xwa makgatunu akxni tatlawa xTaway Malana, chuntiya xtlawatilhakgolh uma tamakamastan.

  • Jesús wa: «Na ankgalhin natlawayatit yuma nakililakapastakatit», ni wa: «Na ankgalhin natlawayatit yuma xlakata naktamakamastapara» (1 Corintios 11:24).

Latamanin tiku kanajlanikgo transubstanciación, wamputun, pi kaxtalanchu chu vino xmakni chu xkgalhni Jesús wankgo, anta takilhtiy kmakgapitsi texto xalak Biblia chuna la kamatitaxtikanit. Akgtum liʼakxilhtit, chuna la matitaxtikgo lhuwa biblias, Jesús wa xlakata vino: «Wa yuma nkinkgalhni» (Mateo 26:28). Pero, xtachuwin Jesús tlan matitaxtikan: «Uma wamputun kinkgalhni» o «uma kilhchanima kinkgalhni». * Chuna la tlawalh akxni xmasiya, uma kilhtamaku Jesús xmaklakaskima metáfora (Mateo 13:34, 35).

¿Tiku wakgo kaxtalanchu chu vino?

Akxni xtatayananin Jehová tlawakgo xTaway Malana, ni lhuwa tiku wakgo kaxtalanchu chu vino. ¿Tuku xlakata?

Kgalhni nema stajmakgalh Jesús, lilakkaxwilika «xasasti talakkaxlan» nema tawi xlakgxokgo tuku Jehová xkatatlawanit xamakgan kachikin Israel (Hebreos 8:10-13). Tiku makgtanumakgo kʼuma xasasti talakkaxlan wa tiku wakgo kaxtalanchu chu vino akxni talakapastaka akxni tinilh Cristo. Nila chuna tlawakgo putum kstalaninanin Cristo, kaj wa “wanti katasaninit” Dios (Hebreos 9:15; Lucas 22:20). Umakgolh kstalaninanin Cristo natamapakgsinankgo Cristo kʼakgapun. Biblia wan pi kaj 144,000 latamanin tiku nakgalhikgo uma talakgalhaman (Lucas 22:28-30; Apocalipsis [Revelación] 5:9, 10; 14:1, 3).

Nixtachuna la «ni xalhuwa borregos» tiku natamapakgsinankgo Cristo, «lhuwa tachixkuwitat», o latamanin, nakgalhiyaw talakgalhaman xlakata nalatamayaw putum kilhtamaku kKatiyatni (Lucas 12:32; Apocalipsis 7:9, 10). Maski tiku kgalhkgalhimaw nalatamayaw kKatiyatni ni wayaw kaxtalanchu chu vino, anaw akxni talakapastaka akxni tinilh Cristo xlakata nalimasiyayaw pi paxtikatsiniyaw xtamakamastan Jesús nema mastalh kimpalakatakan (1 Juan 2:2).

^ párr. 4 Libro El Espíritu Santo, la Iglesia y los sacramentos wan kxpágina 12: «Tatsokgni ni maklakaskin tachuwin “sacramento”: lichuwinan “tuku ni takatsi”. [...] Pero Nuevo Testamento ni maklakaskin tachuwin tuku ni takatsi xlakata nalichuwinan tamunut chu Eucaristía [tlawakan xTaway Malana]».

^ párr. 7 Kaʼakxilhti The New Schaff-Herzog Encyclopedia of Religious Knowledge, volume IV, páginas 43-44, chu McClintock and Strong’s Cyclopedia, volume VIII, página 836.

^ párr. 9 Kaʼakxilhti The New Cambridge History of the Bible, volumen 1, página 841.

^ párr. 10 Maski xcalendariojkan judíos xala uku wan pi xliʼakgtum kilhtamaku xla papaʼ nisán akxni skgatan papaʼ chuna la wan astronomía, uma ni wa tuku kstalanikan kxapulana siglo. Judíos xala makgasa xkatsikgo pi papaʼ nisán xtsuku akxni kskgatan papaʼ xtsuku tasiya kJerusalén, komo nastalaniyaw astronomía max natitaxtu akgtum o akglhuwa kilhtamaku xlakata chuna nala. Wa xlakata kilhtamaku akxni xtatayananin Jehová lakapastakkgo akxni tinilh Cristo ni putum kilhtamaku tatalakxtumi Pascua nema tlawakgo judíos xala uku.

^ párr. 20 Kaʼakxilhti Biblias: A New Translation of the Bible, xla James Moffatt; The New Testament —A Translation in the Language of the People, xla Charles B. Williams; chu The Original New Testament, xla Hugh J. Schonfield.