Ankan kxpulakni

Ankan xlipulaktiy niku tsuku

Xtatayananin Jehová

totonaco

¿Tuku xlakata ni mastakgo talakaskin nakawilinikan kgalhni?

¿Tuku xlakata ni mastakgo talakaskin nakawilinikan kgalhni?

Tuku ni xaxlikana chu tuku xaxlikana

Tuku ni xaxlikana: Xtatayananin Jehová ni ankgo kpumakuchin xlakata ni kanajlakgo klikuchun.

Tuku xaxlikana: Xtatayananin Jehová kputsayaw tuku tlakg xatlan naklikuchunaw. Akxni ktatatlayaw o chatum xalak kkifamiliajkan tatatla o talakaskin nachukukan, kkalakganaw makuchinanin chu cirujanos tiku katsinikgo chukunankgo chu ni limaklakaskinkgo kgalhni. Chu lu kpaxtikatsiniyaw xlakata lhuwa tuku tatlawanit xlakata uma. Nachuna, tuku limaklakaskinkan xlakata nakalimakuchikan xtatayananin Jehová chu ni limaklakaskinkan kgalhni klhuwa países na kalimakuchikan atanu latamanin. La uku katiwa tlan nalaksaka tuku nalimakuchikan chu ni nakgalhikgo taʼakglhuwit kaj xlakata wilinikan kgalhni, nakapasa tajatat, xmakni ni namakgamakglhtinan, o wi tuku nitlan natlawakgo makuchinanin.

Tuku ni xaxlikana: Xtatayananin Jehová wankgo pi xtakanajlakan kamapaksa.

Tuku xaxlikana: Akinin nikxni klikuchunaw takanajla.

Tuku ni xaxlikana: Komo ni nawilinikana kgalhni lu tapalaxla kitaxtu.

Tuku xaxlikana: Xlakata ni lu talaktlawa tumin lu tlan kitaxtu ni nawilinikana kgalhni. *

Tuku ni xaxlikana: Lhuwa xtatayananin Jehová, asta kamanan nikgo akgatunu kata xlakata ni mastakgo talakaskin nakawilinikan kgalhni.

Tuku xaxlikana: Uma tuku wankan ni xlikana. La uku cirujanos tlawakgo laktuwa operaciones la xla lukut, xla naku o akxni kalakgpalinikan tuku nialh tlan wi kxpulaknikan, la lhwakaka, chu ni maklakaskinkgo kgalhni. * Tiku ni makgamakglhtinankgo kgalhni na lakapala pakskgo o asta tlakg lakapala nixawa tiku makglhtinankgo, asta laktsu kamanan. * Nachuna niti la nawan pi tiku tatatla naniy komo ni nawilinikan kgalhni o nalakgtaxtu komo nawilinikan.

¿Tuku xlakata xtatayananin Jehová ni mastakgo talakaskin nakawilinikan kgalhni?

Xlakata xtakanajlakan chu ni xlakata tuku wankgo makuchinanin. Antiguo chu Nuevo Testamento wan pi ni nawayaw kgalhni (Génesis 9:4; Levítico 17:10; Deuteronomio 12:23; Hechos 15:28, 29). Nachuna Dios liʼakxilha kgalhni la latamat (Levítico 17:14). Wa xlakata xtatayananin Jehová kkgalhakgaxmataw limapakgsin niku wan pi ni nawayaw kgalhni, xlakata maxkiyaw kakni Dios, tiku kinkamaxkin latamat.

Talakapastakni nema talakgpalinit

La uku tlan tlawakan xalaktuwa operaciones chu ni limaklakaskinkan kgalhni

Milh kilhtamaku akxni makuchinanin xlakpuwankgo pi akxni ni xmaklakaskinkan kgalhni xlakata nalimakuchinankan lu kalipekua xtawila latamat chu tiku kskinkgo pi ni xkawilinika kgalhni xkaliʼakxilhkan pi kaj xakstu xkamakgniputunkan. Uma xaʼawatiya kata talakgpalinit uma talakapastakni. Akgtum liʼakxilhtit, kkata 2004 taxtulh maktum revista xla likuchun nema xwan: «Lhuwa tuku lakkaxwilikanit xlakata nalimakuchikan xtatayananin Jehová wa tuku natamaklakaskin kkata nema aku mima». * Chu kkata 2010, libro Medicina transfusional wa pi xlakata uma tuku talakkaxwilinit «natlawayaw pi akxni “chukunankan chu ni limaklakaskinkan kgalhni” lu natatlawa xtachuna la akxni chukunankan chu kaniwa tlan tlawakan».

Lhuwa makuchinanin xlikalanka katiyatni maklakaskimakgolh uma xlakata ni nalilaktlawakgo lhuwa kgalhni akxni tlawakgo lu laktuwa operaciones. Uma tuku talimaklakaskin tlan tatlawa asta kpaíses niku ni lu anan tumin, chu lhuwa tiku ni xtatayananin Jehová na skinkgo.

^ par. 8 Medicina transfusional, página 14; Transfusion and Apheresis Science, volumen 33, número 3, página 349.

^ par. 10 Revista Española de Cardiología, volumen 59, número 5, páginas 507 asta 509; Acta Médica Colombiana, volumen 26, número 5, página 261; The Journal of Thoracic and Cardiovascular Surgery, volumen 134, número 2, páginas 287 chu 288; Texas Heart Institute Journal, volumen 38, número 5, página 563; Basics of Blood Management, página 2; Continuing Education in Anaesthesia, Critical Care & Pain, volumen 4, número 2, página 39.

^ par. 10 Revista de la Federación Argentina de Cardiología, volumen 34, número 3, páginas 407 chu 408; Revista Española de Cardiología, volumen 60, número 7, páginas 727 asta 731.

^ par. 14 Continuing Education in Anaesthesia, Critical Care & Pain, volumen 4, número 2, página 39.