Ankan kxpulakni

Xtatayananin Jehová

Laksakkan tachuwin totonaco

¿Akgtum secta xtatayananin Jehová?

¿Akgtum secta xtatayananin Jehová?

Ni, xtatayananin Jehová ni akgtum secta. Akinin kstalaninanin Cristo tiku tlawaputunaw la tlawalh Jesús chu lilatamaputunaw chuna la xla masiyalh.

¿Tuku akgtum secta?

Lhuwa tuku tawan xlakata akgtum secta. Kaʼakxilhwi pulaktiy chu tuku xlakata nila nawanaw pi xtatayananin Jehová akgtum secta.

  • Makgapitsi lakpuwankgo pi akgtum secta kilhchani akgtum xasasti takanajla chu ni stalani tuku talakkaxwilinit. Xtatayananin Jehová ni kmatsukiw xasasti takanajla. Kaj kstalaniyaw tuku xtlawakgo xapulana kstalaninanin Cristo chu ktlawayaw tuku masiyakgolh nema liwana tatsokgnit kBiblia (2 Timoteo 3:16, 17). Kkanajlayaw pi kBiblia wan la nakkakninaniyaw Dios.

  • Makgapitsi lakpuwankgo pi akgtum secta nitlan likatsikgo chu stalanikgo tuku wan xpulalinakan. Pulana, xtatayananin Jehová ni kstalaniyaw chatum chixku o puskat, xlakata kmakgantaxtiyaw uma tachuwin nema Jesús kawanilh kstalaninanin: «Xman nchatum wa nti mimpuxkukan, wa nCristo» (Mateo 23:10).

Ni xlikana pi nitlan, takanajla nema kkgalhiyaw kinkamakgtayayan chu na kamakgtaya amakgapitsi. Akgtum liʼakxilhtit, tamakatsin xalak Biblia nema klichuwinanaw kamakgtayanit lhuwa latamanin xlakata namakgxtakgkgo kuchu chu drogas. Nachuna akxni klichuwinanaw Dios na kmasiyayaw la tsokgnankan chu kgalhtawakgakan xlikalanka katiyatni, chu wa xlakata lhuwa millones latamanin katsinikgonit tsokgnankgo chu kgalhtawakgakgo. Na kkamakgtayayaw latamanin niku wi tuku masputunan. Kliskujaw xlakata nakkamakgtayayaw kintalatamankan chuna la masiyalh Jesús (Mateo 5:13-16).