Ankan kxpulakni

Xtatayananin Jehová

Laksakkan tachuwin totonaco

¿Tuku Watch Tower Bible and Tract Society?

¿Tuku Watch Tower Bible and Tract Society?

Watch Tower Bible and Tract Society of Pennsylvania akgtum corporación nema lakkaxwilikanit lata kata 1884 chuna la wan limapakgsin xalak Pensilvania (Estados Unidos), chu ni kaj litlajakan tumin. Xtatayananin Jehová limaklakaskinkgo uma xlakata nalitlawakgo xtaskujutkan xlikalanka katiyatni, chu uma na anta makgtanu akxni katlawakan biblias chu likgalhtawakga nema takilhti kBiblia.

Chuna la talakkaxwilinit, Watch Tower tlawaka xlakata naliskuja tuku xla «takanajla, namasiya chu namakgtayanan». Tuku tlakg xlakaskinka akxilha wa pi «natalichuwinan chu natamasiya xlakata xTamapakgsin Dios nema wa mapakgsi Jesucristo». Tiku makgtapakgsi anta, wa xlakata wanikanit pi tlan namakgtapakgsi chu ni wa xlakata komo lhuwa tumin xatapaxuwan mastalh. Tiku tapakgsikgo anta chu tiku pulalinkgo tlawakgo taskujut nema kamakgtaya Lakgkgolotsin tiku Pulalinkgo xTatayananin Jehová.

Atanu tuku klitalakgapasaw

Tukuwani Watch Tower Bible and Tract Society of Pennsylvania ni kajwatiya tuku kinkalilakgapaskanan, xtatayananin Jehová na kgalhikgo lhuwa atanu tuku litalakgapaskgo klakalhuwa países. Makgapitsi umakgolh tuku na kinkalilakgapaskanan na wilinikan tukuwani «Watch Tower», «Watchtower» o matitaxtikan kʼatanu tachuwin tuku kilhchanima.

Lata kalakkaxwilikgoka uma, kinkamakgtayanitan lhuwa tuku naktlawayaw. Wa uma makgpitsi:

  • Tuku tsokgkan chu likgalhtawakga. Ktlawanitaw max 220 millones Biblia chu max 40 mil millones likgalhtawakga nema takilhtinit kBiblia kliwaka 700 tachuwin. Xlakata sitio xla Internet jw.org, latamanin tlan likgalhtawakgakgo Biblia kʼInternet kliwaka 120 tachuwin chu ni xokgokgo chu tlan tekgskgo xtakgalhtin xtakgalhskininkan la «¿Tuku xTamapakgsin Dios?».

  • Tamasiy. Kmasiyayaw tuku Biblia wan. Akgtum liʼakxilhtit, lata kata 1943, tuku masiyakan kʼEscuela Bíblica de Galaad de la Watchtower makgtayananit pi liwaka 8,000 xtatayananin Jehová misioneros kalitaxtukgolh o tlan kamakgtayanankgolh natatlawa taskujut xlikalanka katiyatni chu makgtayanankgo pi tlan kakitaxtulh. Nachuna, lhuwa millón latamanin, lhuwa tiku ni xtatayananin Jehová, kamasiyanikan ktamakxtumit nema tatlawa kcongregación putum semanas. Nachuna klakaxwilinitaw pi nakamasiyanikan latamanin tiku nila kgalhtawakgakgo chu ktlawanitaw maktum likgalhtawakga k110 tachuwin xlakata latamanin nakatsinikgo nakgalhtawakgakgo chu natsokgnankgo.

  • Makgtayanankan. Kkamaxkiyaw tuku maklakaskinkgo tiku titaxtumakgo tuku tuwa xlakata wi tuku katlawanikgolh latamanin o wi tuku masputunalh. Akgtum liʼakxilhtit, kkamakgtayaw tiku xpatinamakgolh kRuanda akxni makxtum lhuwa kamakgnika latamanin kkata 1994 chu akxni tachikilh tiyat kʼHaíti kkata 2010.

Maski lhuwa tuku tatlawanit xpalakata uma corporaciones, uma ni wa tlawa pi namakgantaxtikan taskujut nema ktlawayaw. Chatunu kstalaninanin Cristo lakgaya nalichuwinan chu namasiya tamakatsin xalak Biblia (Mateo 24:14; 28:19, 20). Liwana kkatsiyaw pi Dios makgtayama taskujut nema ktlawayaw chu chuntiya natlawa pi kastakli (1 Corintios 3:6, 7).