Ankan kxpulakni

Ankan xlipulaktiy niku tsuku

Xtatayananin Jehová

totonaco

¿Tuku kanajlakgo xtatayananin Jehová?

¿Tuku kanajlakgo xtatayananin Jehová?

Xtatayananin Jehová, kliskujaw xlakata naklilatamayaw tuku Jesús masiyalh chu tuku xʼapóstoles na tlawakgolh. Kʼuma artículo litachuwinan tsinu makgapitsi tuku kkanajlayaw nema tlakg xlakaskinka.

  1. Dios. Kkakninaniyaw kajwatiya xaxlikana Dios, tiku lanka xlakatsukut chu xMalakatsukina putum tuku anan. Xtukuwani Jehová (Salmo 83:18; Apocalipsis [Revelación] 4:11). Wa xDios Abrahán, Moisés chu Jesús (Éxodo 3:6; 32:11; Juan 20:17).

  2. Biblia. Kkanajlayaw pi wa xtamakatsinin Dios nema kamaxki latamanin (Juan 17:17; 2 Timoteo 3:16). Tuku kkanajlayaw anta takilhtinit 66 libros nema limin, uma wamputun, tuku litalakgapasa Antiguo chu Nuevo Testamento. Makgalhtawakgena Jason BeDuhn lichuwinalh uma akxni tsokgli pi xtatayananin Jehová «kilhtikgo tuku kanajlakgo chu tuku tlawakgo kBiblia, ni lakgpalikgo tuku wan chu ni lakpuwankgo pi wi tuku ni chuna xlilat la wan Biblia». *

    Maski kmakgamakglhtinanaw putum tuku wan Biblia, ni klakpuwanaw pi makgapitsi ni kaj wi tuku kilhchanima. Anan tuku masiya pi makgapitsi tuku tatsokgnit kBiblia kaj wi tuku kilhchanima o wi tuku tatalakxtumi, wa xlakata, ni klakpuwanaw pi putum chuna latilha la wan (Apocalipsis 1:1).

  3. Jesús. Kstalaniyaw tuku Jesús masiyalh chu tlawalh, chu kmalankiyaw xlakata wa kilakgmaxtunakan chu wa xKgawasa Dios (Mateo 20:28; Hechos 5:31). Uma limasiya pi akinin kstalaninanin Cristo (Hechos 11:26). Pero, Biblia ni masiya pi Jesús wa Dios tiku kgalhi xliputum litliwakga chu na ni tataya takanajla xlakata Trinidad (Juan 14:28).

  4. Wa xTamapakgsin Dios. Akgtum tamapakgsin xalak akgapun; ni wa tuku wi kxnakujkan kstalaninanin Cristo. Natawila xlakgxokgo mapakgsinanin xalak katiyatni chu namakgantaxti tuku Dios putum kilhtamaku lakpuwanit xpalakata Katiyatni (Daniel 2:44; Mateo 6:9, 10). Uma nialh makgas chuna nala, xlakata tuku Biblia lichuwinan pi nala limasiya pi lamaw «kxaʼawatiya kilhtamaku» (2 Timoteo 3:1-5, TNM; Mateo 24:3-14).

    Jesús wa mapakgsina xla xTamapakgsin Dios xalak akgapun. Tsukulh mapakgsinan kkata 1914 (Apocalipsis 11:15).

  5. Lakgtaxtut. Xlakata xtamakamastan Jesús, latamanin tlan lakgtaxtunikgo talakgalhin chu linin (Mateo 20:28; Hechos 4:12). Xlakata nalitamakgtayakgo uma tamakamastan, talakaskin nakanajlanikgo Jesús, nalakgpalikgo xlatamatkan chu natamunukgo (Mateo 28:19, 20; Juan 3:16; Hechos 3:19, 20). Tuku tlawa chatum lataman limasiya komo xlikana kanajla (Santiago 2:24, 26). Pero, lakgtaxtut ni wa pulaktum tuku kinkalakgchanan; kajwatiya tlan nakgalhiyaw xpalakata «litlan xlipaxkatsinit Dios» (Gálatas 2:16, 21).

  6. Akgapun. Jehová, Jesucristo chu ángeles tiku ni makgatsankgananikgo anta lamakgo kʼakgapun * (Salmo 103:19-21; Hechos 7:55). Kaj ni lhuwa latamanin, 144,000, nalakastakwanankgo kʼakgapun xlakata natamapakgsinankgo Jesús kxTamapakgsin (Daniel 7:27; 2 Timoteo 2:12; Apocalipsis 5:9, 10; 14:1, 3).

  7. Katiyatni. Dios malakatsukilh xlakata latamanin anta xlatamakgolh putum kilhtamaku (Salmo 104:5; 115:16; Eclesiastés 1:4). Dios nakasikulunatlawa latamanin tiku kgalhakgaxmatkgo chu nialh katitatatlakgolh chu natlawa pi tlan nalatamakgo kparaíso unu kKatiyatni (Salmo 37:11, 34).

  8. Tuku nitlan chu tapatin. Biblia lichuwinan pi chatum ángel lakatakilh Dios. Chuna tsukulh tuku nitlan chu tapatin (Juan 8:44). Uma ángel, tiku alistalh litalakgapasli Akgskgawini chu Satanás, tlawalh pi xapulana latamanin na katatayakgolh. Lu nitlan tuku kakitaxtunilh xkamanankan (Génesis 3:1-6; Romanos 5:12). Xlakata tlan xlakkaxlalh tuku Satanás limawakanalh, Dios mastanit talakaskin kaʼanalh tuku nitlan chu tapatin kaj ni lhuwa kilhtamaku, pero ni katimastalh talakaskin pi putum kilhtamaku chuntiya naʼanan.

  9. Linin. Akxni chatum lataman niy, nialhtu katsi (Salmo 146:4; Eclesiastés 9:5, 10). Tiku nikgonita nitu patinamakgo kʼakgtum pupatin niku anan lhkuyat.

    Lhuwa millón latamanin tiku nikgonita nalatamaparakgo akxni Dios nakamalakastakwani (Hechos 24:15). Pero, tiku nakamalakastakwanikan chu ni nakgalhakgaxmatputunkgo xlimapakgsin Dios, nakamalakgsputukan putum kilhtamaku chu nikxni la katilatamaparakgolh (Apocalipsis 20:14, 15).

  10. Familia. Chuna la Dios lakkaxwililh lata xapulana, akinin kkatsiyaw pi tamakgaxtokgat, wamputun akxni chixku chu puskat latatamakgaxtokga, chu kajwatiya tlan lakxtlawakgo xtamakgaxtokgatkan komo tiku tawi natatalakgxtumi atanu (Mateo 19:4-9). Liwana kkatsiyaw pi xtastakyaw Biblia lu laktlan chu kamakgtaya familias napaxuwakgo (Efesios 5:22–6:1).

  11. Kintakakninkan. Ni kkakninaniyaw cruz chu imágenes (Deuteronomio 4:15-19; 1 Juan 5:21). Makgapitsi tuku litalakgapasa kintakakninkan wa uma:

    • Ktlawaniyaw oración Dios (Filipenses 4:6).

    • Klikgalhtawakgayaw chu klakputsananiyaw Biblia (Salmo 1:1-3).

    • Klilakpuwanaw tuku kkatsiniyaw kBiblia (Salmo 77:12).

    • Ktamakxtumiyaw xlakata naktlawayaw oración, naklikgalhtawakgayaw Biblia, akxtum kkilhtliyaw, kwanaw tuku kkanajlayaw chu kkamakgpuwantiniyaw amakgapitsin (Colosenses 3:16; Hebreos 10:23-25).

    • Klichuwinanaw «xalakwan tamakatsinin xla Tamapakgsin» (Mateo 24:14, TNM).

    • Kkamakgtayayaw tiku maklakaskinkgo (Santiago 2:14-17).

    • Ktlawayaw chu kuenta ktlawayaw Pukgalhtawakga chu amakgapitsi chiki nema limaklakaskinkan xlakata chuntiya natlawakan taskujut nema ktlawayaw xlikalanka katiyatni xlakata nakmasiyayaw tuku wan Biblia (Salmo 127:1).

    • Kmakgtayaninanaw akxni wi tuku nitlan la (Hechos 11:27-30).

  12. Chuna la kkatalaxtawilanitaw. Ktalakaxtawilanitaw kʼakgatunu congregaciones. Akgatunu congregación pulalinkgo xtatayananin Jehová tiku kawanikan lakgkgolotsin, umakgolh ni tlakg xlakaskinka litaxtukgo chu na ni tlajakgo tumin (Mateo 10:8; 23:8). Ni kmastayaw diezmo chu ni kpukinanaw (2 Corintios 9:7). Taskujut nema ktlawayaw, litaxokgo tumin nema xatapaxuwan mastakan chu ni takatsi tiku mastalh.

    Kaj ni lhuwa kstalaninanin Cristo tiku lhuwa tuku katsikgo, kalilakgapaskan Lakgkgolotsin tiku Pulalinkgo xTatayananin Jehová, pulalinkgo taskujut nema tlawakgo putum xtatayananin Jehová niku pulalinankan xlikalanka katiyatni (Mateo 24:45).

  13. Makxtum kwilaw. Maski tanu tanu kinkachikinkan, kimputumkan watiya tuku kkanajlayaw (1 Corintios 1:10). Kliskujaw xlakata ni nakinkamapitsiyan xlakata wi tiku tlakg kgalhi tumin o wi tiku ni, xlakata wi tiku xalak alakatanu, tanu xcolor o tanu la tasiya (Hechos 10:34, 35; Santiago 2:4). Pero maski makxtum kwilaw, uma ni tlawa pi chatunu xtatayana Jehová ni xakstu nalaksaka tuku natlawa chuna la nawani xtalakapastakni nema listakyawanit Biblia (Romanos 14:1-4; Hebreos 5:14).

  14. Kintayatkan. KIiskujaw xlakata naklimasiyayaw xaxlikana tapaxkit xliputum tuku ktlawayaw (Juan 13:34, 35). Lu kliskujaw xlakata ni naktlawayaw tuku Dios ni lakgati. Wa xlakata kuenta ktlawayaw ni nakmaklakaskinaw kgalhni. Uma wamputun pi ni kmastayaw talakaskin nakinkawilinikanan kgalhni (Hechos 15:28, 29; Gálatas 5:19-21).Ni ktaʼakglhuwiyaw chu ni kmakgtanuyaw kʼguerra (Mateo 5:9; Isaías 2:4). Kkamaxkiyaw kakni mapakgsinanin tiku wilakgolh niku klamaw chu kkgalhakgaxmataw limapakgsin nema ni lakataya xlimapakgsin Dios (Mateo 22:21; Hechos 5:29).

  15. Chuna la kkatalalinaw amakgapitsin. Jesús wa: «Milipaxkit mintalataman chuna la miʼakstu paxkikana». Nachuna, wa pi kstalaninanin Cristo «ni katuxawat [o kkakilhtamaku] ntapakgsikgoy» (Mateo 22:39; Juan 17:16). Wa xlakata, tlan kkalikatsiniyaw putum latamanin, maski nipara tsinu kmakgtanuyaw kpolítica chu ni kmakgtapakgsiyaw kʼatanu takanajla (Gálatas 6:10; 2 Corintios 6:14). Pero, klakgachixkuwiliyaw tuku laksakkgo natlawakgo amakgapitsin xlakata uma (Romanos 14:12).

Komo tlakg kgalhiya takgalhskinin xlakata tuku kkanajlayaw xtatayananin Jehová, tlakg nakatsiya kimpalakatakan anta kkisitiojkan xla Internet. Na tlan natsokgnana ksucursales, napina kʼakgtum kintamakxtumitkan anta kPukgalhtawakga xla xTatayananin Jehová niku lakatsu wila, o nakgalhskina chatum xtatayana Jehová niku wix wila.

^ párr. 4 Kaʼakxilhti libro Truth in Translation (Xaxlikana akxni matitaxtikan kʼatanu tachuwin), página 165.

^ párr. 10 Maski ángeles tiku nitlan likatsikgo katamakxtuka kʼakgapun, chuntiya lamakgo chu nila kaʼakxilhaw (Apocalipsis 12:7-9).