Ankan kxpulakni

Ankan xlipulaktiy niku tsuku

Xtatayananin Jehová

totonaco

Xtatayananin Jehová, ¿xafuerza tlawakgo pi latamanin nalakgpalikgo xtakanajlakan?

Xtatayananin Jehová, ¿xafuerza tlawakgo pi latamanin nalakgpalikgo xtakanajlakan?

Ni, ni tiku xafuerza kmalakgpaliniyaw xtakanajla. Revista Makatsinina, likgalhtawakga nema tlakg tamaʼakgpitsi, wa: «Nitlan komo xafuerza nakamalakgpalinikan xtakanajlakan latamanin». * Chu ni chuna ktlawayaw xlakata uma:

  • Jesús nikxni kamafuerzajlinilh latamanin namakglhtinankgo tuku xla xmasiya. Xla xkatsi pi ni lhuwa tiku xʼamakgo kgaxmatnikgo xtamakatsin (Mateo 7:13, 14). Akgtum kilhtamaku, makgapitsi xlimakgalhtawakgat makgxtakgkgolh xlakata ni makgamakglhtinankgolh pulaktum tuku xla xmasiya, Jesús ni kamachokgolh, ni xafuerza kawanilh pi xtamakgxtakgkgolh (Juan 6:60-62, 66-68).

  • Jesús kamasiyanilh kstalaninanin pi ni xkamafuerzajlinikgolh latamanin nalakgpalikgo tuku kanajlakgo. Wata, xliskujatkan xwanit xlakata xkatekgskgolh tiku xkgaxmatputunkgo (Mateo 10:7, 11-14).

  • Xafuerza nalakgpalikan takanajla nitu litaxtu. Dios lakaskin pi latamanin kakakninanikgolh xliputum xnakujkan, chu ni kaj xafuerza (Deuteronomio 6:4, 5; Mateo 22:37, 38).

¿Xafuerza lakaskinkgo xtatayananin Jehová pi amakgapitsin limakgalhtawakgat kawankgolh?

Xlikana pi linaw tamakatsin xalak Biblia «asta awatiya kxtankgana tiyat» chu chuna tlawayaw “kxlakatin lilhuwa xawa kʼakgatunu chiki”, chuna la tatsokgnit (Hechos 1:8; 10:42; Hechos 20:20, Hua Xasasti Talaccaxlan, 1999). Chuna la xapulana kstalaninanin Cristo, min kilhtamaku kinkalimawakakanan pi xafuerza kkamalakgpaliniputunaw xtakanajlakan amakgapitsin (Hechos 18:12, 13). Pero uma ni xlikana. Kmaxkiyaw kakni tuku kanajlaputun chatunu chatunu. Tuku klakaskinaw wa pi latamanin kakatsikgolh tuku wan Biblia xlakata tlan nalaksakkgo tuku takanajla nastalanikgo.

Ni xafuerza ktlawayaw pi nakanajlakgo amakgapitsin tuku akinin kkanajlayaw. Na ni klimaklakaskinaw takanajla xlakata nakmasiyayaw tuku xla política, ni kmalaknuyaw tumin o akgtum tamakgtay xlakata latamanin xtatayananin Jehová nawankgo. Akinin ni chuna la amakgapitsin tiku wankgo pi kstalaninanin Cristo pero ni wa tlawakgo tuku masiyalh Cristo. *

¿Lakgchan pi chatum lataman nalakgpali xtakanajla?

Palakachuwina Abrahán makgxtakgli xtakanajla xnatlatni

Biblia masiya pi chuna, xlakata lichuwinan lhuwa liʼakxilhtit xlakata tiku laksakkgolh nakakninanikgo xaxlikana Dios chu ni stalanikgolh xtakanajla xnatlatnikan. Chuna tlawalh Abrahán, Rut, makgapitsi latamanin xalak Atenas chu apóstol Pablo (Josué 24:2; Rut 1:14-16; Hechos 17:22, 30-34; Gálatas 1:14, 23). Nachuna, Biblia lichuwinan pi chatunu lakgchan nalaksaka komo nalakgmakgan takanajla nema tlan akxilha Dios (1 Juan 2:19).

Declaración Universal de Derechos Humanos, nema ONU wan pi anta «takilhti limapakgsin xlakata tuku tlan natlawakgo latamanin xlikalanka katiyatni» wan pi putum «tlan nalakgpaliyaw kintakanajlakan o tuku kanajlayaw». Nachuna wan pi putum latamanin tlan naputsanankgo, namakglhtinankgo chu namalakgatumikgo tuku katsikgo chu tuku lakpuwankgo. Nachuna, uma na kilhchanima tuku kanajlakan. * Pero, uma na kilhchanima pi amakgapitsin na tlan napalakachuwinankgo tuku kanajlakgo chu ni namakgamakglhtinankgo tuku akinin kanajlayaw.

¿Mamaxani familia akxni lakgpalikan takanajla?

Ni chuna. Biblia kinkamakgpuwantiniyan nakamaxkiyaw kakni putum latamanin maski tanu xtakanajlakan (1 Pedro 2:17). Nachuna, xtatayananin Jehová kgalhakgaxmatkgo xlimapakgsin Biblia nema wan pi nakamaxkikan kakni natlatni maski tanu takanajla kgalhikgo (Efesios 6:2, 3).

Pero ni putum tlan akxilhkgo tuku wan Biblia. akgtum liʼakxilhtit, chatum puskat tiku stakli kZambia, wan: «Latamanin xalak kinkachikin lakpuwankgo pi lakgpalikan takanajla wamputun [...] pi lakgmakgampat mifamilia chu minkachikin». Maski chuna, akxni aku kstakma tsukulh katakgalhtawakga xtatayananin Jehová xla laksakli nalakgpali xtakanajla. «Kinatlatni makglhuwa kiwanikgolh pi lu xakkalimakgasitsinit chu xakkalimakgalipuwama. Chu uma lu tuwa kmakgkatsilh xlakata xlakaskinka xlitaxtu tlan xkiʼakxilhkgolh. [...] Ni namakgxtakga Jehová nixawa tuku tlawakgo atanu takanajla ni wamputun pi lakgmakgampat mifamilia». *

^ párr. 2 Kaʼakxilhtit La Atalaya 1 xla enero kata 2002, página 12, párrafo 15.

^ párr. 8 Akgtum liʼakxilhtit, max kata 785, mapakgsina Carlomagno lakkaxwililh limapakgsin niku xwan pi xlinit xwanit tiku xalak kkachikin Sajonia nema ni xtamunulh la chatum católico. Atanu liʼakxilhtit wa Paz de Augsburgo, talakkaxlat nema tatlawalh kata 1555 pulaktiy tiku xtlawamakgolh guerra nema lakatsukulh kSacro Imperio Romano. Kʼuma talakkaxlan kawanika príncipes xalak akgatunu kachikinin wi tuku xlilaksakatkan: católico nawankgo o luterano nalitaxtukgo. Chu tiku xkamapakgsi xlilat na wa nakanajlakgo tuku xla xlaksakli. Komo nichuna xtlawakgolh, xtalakaskin xmakgxtakgolh kachikin.

^ párr. 11 Tuku na tlan natlawa chatum lataman talichuwinan kCarta Africana de Derechos Humanos y de los Pueblos, la Declaración Americana de los Derechos y Deberes del Hombre, Carta Árabe de Derechos Humanos kata 2004, Declaración de Derechos Humanos de la Asociación de Naciones del Sudeste Asiático, Convenio Europeo de Derechos Humanos chu Pacto Internacional de Derechos Civiles y Políticos. Pero ni putum países lakxtum makgantaxtikgo uma tuku talakkaxwilinit.

^ párr. 14 Biblia masiya pi xtukuwani xaxlikana Dios wa Jehová.