Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Diciembre kata 2015

 TUKU WI KXMAKNI | PUTUM TLAN AKGATEKGSAW BIBLIA

Tamakgtay xlakata naʼakgatekgskan Biblia

Tamakgtay xlakata naʼakgatekgskan Biblia

Kalakpuwanti pi paxialhnampat kʼakgtum kachikin niku kajku xlimakgtum pinita. Katatanokglha latamanin, la likatsikgo, liwat chu tumin chu akxilha pi lu talakgpali. Max lu ni tlan limakgkatsiya.

Max chuna namakgkatsiya akxni xapulana nalikgalhtawakgaya Biblia. Natekgsa akgtum kakilhtamaku xala makgasa nema tanu tasiya. Nakalakgapasa lhuwa kachikinin, la filisteos, chu nakatsiniya tanu xtalismaninkan, akgtum liʼakxilhtit, lakxtitkgo klhakgatkan. Xlakata liwat nema wanikan maná chu tumin nema lilakgapaskan dracma (Éxodo 16:31; Josué 13:2; 2 Samuel 3:31; Lucas 15:9). Max putum uma ni liwana katiʼakgatekgsti. Komo lapat niku ni kminkachikin, max napaxtikatsininana wi tiku namakgtayayan. ¿Ni xlakgati pi wi tiku xwanin tuku ni akgatekgsa xlakata Biblia?

TAMAKGTAY XALA MAKGASA

Lata tsokgkanit Biblia, ksiglo 16 akxni nina xmin Jesús, mastakanit tamakgtay xlakata tlan naʼakgatekgskan. Akgtum liʼakxilhtit, Moisés, xapulana tiku kapulalilh kachikin Israel, liskujli xlakata «namakgatekgsninan» tuku xtsokgnit kʼuma kilhtamaku (Deuteronomio 1:5).

Max titaxtulh akgkaw siglos, chuntiya xwilakgolh makgalhtawakgenanin tiku xmasiyakgo xla Biblia. Kata 455 akxni nina xmin Jesús, lhuwa judíos, chu laktsukamanan tamakxtumikgolh kplaza xalak Jerusalén. Makgalhtawakgenanin tiku xmasiyakgo xla Biblia «xlikgalhtawakgamakgo libro, xla xlimapakgsin xaxlikana Dios, xlichuwinankgo, chu xwankgo tuku xkilhchanima; chu chuntiya tsukukgolh wankgo tuku xwamputun tuku xlikgalhtawakgamakgolh» (Nehemías 8:1-8).

Titaxtulh akgkitsis ciento kata, Jesucristo na tlawalh uma taskujut nema lu makgtayanalh. Tuku tlakg xlilakgapaskgo wa pi makgalhtawakgena xwanit (Juan 13:13). Kamasiyanilh chatunu chatunu chu niku lhuwa xwilakgolh latamanin. Akgtum kilhtamaku, kamaxkilh akgtum taʼakgchuwin lhuwa latamanin, wa Taʼakgchuwin xalak Sipi. Chu «chixkuwin kaks lakawankgolh kaj xpalakata xtakgalhchiwin» (Mateo 5:1, 2; 7:28, Hua Xasasti Talaccaxlan, 1999). Kata 33, Jesús kawanilh chatiy kstalaninanin akxni xtlawamakgolh chu xʼamakgolh kachikinin lakatsu kJerusalén, «liwana xkinkawanitilhaman tuku kilhchanima xTachuwin Dios» (Lucas 24:13-15, 27, 32TNM).

Kstalaninanin Cristo na xmasiyakgo xTachuwin Dios. Makgtum, chatum mapakgsina xalak Etiopía xlikgalhtawakgama Biblia. Chatum kstalanina tiku wanikan Felipe talakatsuwinilh chu kgalhskilh: «¿Xlikana katsiya tuku likgalhtawakgapat?». Xla kgalhtinalh: «¿La tlan nakkatsi komo niti nakimasiyani?». Felipe wanilh tuku xkilhchanima tuku xlikgalhtawakgama (Hechos 8:27-35TNM).

TAMAKGTAY NEMA ANAN UKU

La xalamakgasa tiku xmasiyakgo xalak Biblia, la uku xtatayananin Jehová nachuna masiyamakgolh xlakata Biblia k239 kachikinin kxlikalanka katiyatni (Mateo 28:19, 20). Akgatunu semana, kamakgtayakgo liwaka 9 millones latamanin xlakata naʼakgatekgskgo tuku masiya Biblia. Lhuwa tiku kgalhtawakgakgo tanu takanajla kgalhikgo. Uma takgalhtawakga ni taxokgo chu tlan namakgalhtawakgekana kminchik o alakatanu niku wix lakaskina, na tlan nalimakgalhtawakgekana kteléfono o videoconferencia.

Komo lakaskina namakgalhtawakgekana katachuwinanti chatum xtatayana Jehová. Chu naʼakxilha pi Biblia ni maktum libro nema nila taʼakgatekgsa. Wata naʼakxilha pi «makgtayanan xlakata namasiyakan, xlakata nastakyawanankan, xlakata nalilakgpalikan tuku nitlan tatlawama, xlakata xa’akgstitum nalistakyawanankan, xlakata xlakskujni Dios tlan natlawa xtaskujut chu nakgalhi tuku nalitlawa xatlan taskujut» (2 Timoteo 3:16, 17TNM).