Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Noviembre kata 2015

 TUKU WI KXMAKNI | ¿TUKU LAKPUWAN DIOS XLAKATA GUERRAS?

Dios chu guerras makgasa

Dios chu guerras makgasa

Kachikin lu xkamakgapatinamaka. Makglhuwata kskinikgonit Dios pi xkamakgtayalh; pero ni tunkun kamakgtayaka. Uma kachikin xwanikan Israel, akgtum kachikin nema Dios makgasa xkalaksaknit. Chu wa Egipto tiku nitlan xkalikatsini (Éxodo 1:13, 14). Israelitas lhuwa kata kgalhkgalhikgolh xlakata Dios xkalakgmaxtulh kxmakankan egipcios. Pero chalh kilhtamaku akxni Dios kalakgmaxtulh (Éxodo 3:7-10). Biblia wan pi Dios tatlawalh guerra Egipto. Kamalakgachanilh 10 plagas nema lu nitlan chu makgnilh faraón nachuna xsoldados anta kxaSpinini pupunu (Salmo 136:15). Jehová limasiyalh pi xla «chatum tliwakga soldado» xlakata nakamakgtaya xkachikin (Éxodo 15:3, 4).

Xlakata Dios katatlawalh guerra egipcios limasiya pi makgapitsi guerras tlan akxilha. Nachuna milh kilhtamaku kamaxkilh talakaskin kachikin Israel pi xkatalachipakgolh amakgapitsi kachikinin. Akgtum liʼakxilhtit, kawanilh pi katalachipakgolh cananeos, nema lu nitlan xlikatsikgo (Deuteronomio 9:5; 20:17, 18). Mapakgsina David wanika pi xkatalachipalh filisteos asta wanika la xlitlawat xlakata tlan xtlajanalh (2 Samuel 5:17-25).

Tuku lichuwinankan kBiblia limasiya pi akxni nitlan xkalikatsinikan o xkatlawanikan tuku nitlan israelitas, Dios xkamaxki talakaskin pi xkatalachipakgolh xlakata chuntiya nakakuentajtlawa chu ni xmasputuka xaxlikana takanajla. Pero wi pulaktutu tuku kilikatsitkan xlakata guerras nema Dios xmasta talakaskin. ¿Tuku uma?

  1. KAJWATIYA DIOS XWAN TIKU XʼAMA AN KʼGUERRA. Makgtum, Dios kawanilh israelitas: «Wixin ni katitlawatit guerra la uku». Xlakata Dios xʼama tlawa guerra xpalakatakan (2 Crónicas 20:17; 32:7, 8). Makglhuwa chuna tlawalh, la akxni katalachipalh egipcios. Pero, milh kilhtamaku, Dios kalimapakgsilh xkachikin xtlawakgolh guerra xlakata tlan xʼakgchipakgolh Tiyat nema xKawanikanit pi Nakamaxkikan chu xkuentajtlawakgolh (Deuteronomio 7:1, 2; Josué 10:40).

  2. KAJWATIYA DIOS XWAN TUKU KILHTAMAKU XTSUKULH GUERRA. Kskujnanin Dios xtalakaskin xkgalhkgalhinankgolh asta akxni Dios xkawanilh xkatalachipalh kachikinin nema xwilakgolh lakatsu.  Asta akxni xkawanika, tlan xʼankgolh kʼguerra. Komo ni chuna xtlawakgolh, Dios nialh xʼama kakuentajtlawa. Asta kBiblia kinkawaniyan pi akxni ni xkgalhakgaxmatnankgo chu xʼankgo tlawakgo guerra lu nitlan xkakitaxtuni. *

  3. Maski Dios katatlawalh guerra kachikinin xalak Canaán, ni kamakgnilh makgapitsi latamanin, la Rahab chu xfamilia

    DIOS NI LAKGATI AKXNI WI TIKU NIY. Jehová Dios “makilhtsukinit latamat” chu xMalakatsukina latamanin (Salmo 36:9). Paxki latamat chu ni lakaskin pi kanikgolh latamanin. Pero lu nitlan xlakata wilakgolh latamanin tiku lakkaxwilikgo nakatlawanikgo tuku nitlan chu asta nakamakgnikgo amakgapitsin (Salmo 37:12, 14). Minit kilhtamaku, Dios mastanit talakaskin katlawaka makgapitsi guerras xlakata namasputukan tuku nitlan. Pero, putum uma kilhtamaku akxni kalimapakgsilh israelitas pi xtlawakgolh guerra, xla xkalakgalhaman chu xkakgalhkgalhi xtalamakgasitsin Israel (Salmo 86:15). Pulaktum tuku chuna xlimasiya, wa akxni Israel nina xtatlawa guerra akgtum kachikin xtalakaskin xliwanit “tuku xlitlawat xlakata ni natalachipa” xlakata latamanin xlakgpalikgolh xtayatkan chu ni xkatatlawaka guerra (Deuteronomio 20:10-13). Uma tachuwin chuna limasiya: «Ni klipaxuwa akxni niy tiku nitlan likatsi, wata akxni tiku nitlan likatsi makgxtakga xtiji chu chuntiya nalatama» (Ezequiel 33:11, 14-16). *

Uma kinkamasiyaniyan, pi makgasa Dios xʼakxilha guerras la tuku xlimasputu tuku nitlan chu tiku nitlan xlikatsikgo. Pero wa Jehová Dios, chu ni wa latamanin, tiku xwan tuku kilhtamaku naʼankgo kʼguerra chu tiku xʼama tlawa. Nachuna, akxni xtlawa guerra ni xkamapatini; xlakata ni kaʼakxilhputun tiku nitlan likatsikgo (Salmo 11:5). Pero ¿lakgpalilh la akxilha guerra akxni xKgawasa, Jesucristo, tsukulh lichuwinan Dios xapulana siglo?

^ párr. 7 Akgtum liʼakxilhtit, akgtum kilhtamaku Dios kawanilh pi ni xʼankgolh katalachipakgo amalequitas chu cananeos, pero israelitas ni kgalhakgaxmatninankgolh chu katlajaka (Números 14:41-45). Titaxtulh akglhuwa kata, mapakgsina Josías alh kʼguerra maski Dios ni xmaxkinit talakaskin chu xlakata ni kgalhakgaxmatnalh makgatsankgalh xlatamat (2 Crónicas 35:20-24).

^ párr. 8 Israelitas ni xkawanikgo tuku xlitlawatkan cananeos akxni xkatalachipa. Cananeos kamaxkika akgtati ciento kata xlakata xlakgpalikgolh xtayatkan. Akxni chalh kilhtamaku pi nakatatlawakan guerra, xtasiya pi ni xmakgxtakgkgonit nitlan xtayatkan (Génesis 15:13-16). Wa xlakata xtalakaskin xkamasputuka. Pero makgapitsi cananeos lakgpalikgolh xtayatkan chu ni kamakgnika (Josué 6:25; 9:3-27).