Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Noviembre kata 2015

 TUKU WI KXMAKNI | ¿TUKU LAKPUWAN DIOS XLAKATA GUERRAS?

Dios chu guerras kxapulana siglo

Dios chu guerras kxapulana siglo

Kachikin nema xkamakgapatinamaka. Chuna la xnatlatni xala makgasa, judíos xalak xapulana siglo max makglhuwa skinikgolh Dios pi xkalakgmaxtulh kxmakankan romanos. Uma kilhtamaku lakgapaskgolh Jesús, makgapitsi tsukukgolh lakpuwankgo komo wa Mesías nema xwankanit pi namin. Wa xlakata lhuwa xlakpuwankgo pi «wa nti xliminat xwanit nalakgmaxtuy [...] Israel» kxmakankan romanos (Lucas 24:21). Ni kaj ni kgantaxtulh tuku xlakaskinkgo, wata kkata 70, soldados romanos malakgsputukgolh Jerusalén chu xtemplo.

¿Tuku xlakata Dios ni kalakgmaxtulh judíos chuna la xtlawanit makgasa? ¿O tuku xlakata ni kamaxkilh talakaskin xtalachipanankgolh xlakata xtamakgtayakgolh? ¿Xlakgpalinit Dios chuna la xʼakxilha guerras? Ni. Tuku xtalakgpalinit wa la xtalalinkgo Dios judíos, xlakata ni xmakgamakglhtinankgonit Jesús la Mesías (Hechos 2:36). Wa xlakata Dios kalakgmakgalh chu nialh xkachikin litaxtukgolh (Mateo 23:37, 38).

Nialh xkakuentajtlawa Dios judíos chu Tiyat nema xKawanikanit pi Nakamaxkikan. Wa xlakata, judíos nialh la xtlawakgolh guerra chu xwankgolh pi Dios xkamakgtayama. Chuna la xlichuwinanit Jesús, Israel makgatsankgalh xtalakgalhaman Dios chu nialh makglhtinankgolh xtasikulunalin. La uku tlan xʼama kaʼakxilha akgtum kachikin xaʼespiritual, Biblia limapakuwi «xʼIsrael Dios» (Gálatas 6:16; Mateo 21:43). Makgapitsi kstalaninanin Cristo tiku Dios kalaksakli litaxtukgolh xʼIsrael Dios. Wa xlakata kxapulana siglo kawanika: «La uku xkachikin Dios litaxtuyatit» (1 Pedro 2:9, 10TNM).

Komo kstalaninanin Cristo litaxtukgolh xkachikin Dios, ¿wi tuku tlawalh xlakata xkalakgmaxtulh kxmakankan romanos chu katalachipanalh xpalakatakan? ¿Kamaxkilh talakaskin xtalachipanankgolh xlakata xtamakgtayakgolh? Nichuna tlawalh. ¿Tuku xlakata? Chuna la akxilhwi artículo nema titaxtulh, niku lichuwinalh guerras nema tlawa Dios, xla laksaka tuku kilhtamaku natlawakan guerra. Kxapulana siglo, Dios ni tlawalh guerra xpalakata kstalaninanin Cristo chu na ni kawanilh xtlawakgolh nipara akgtum guerra. Liwana xtasiya pi nina xchan kilhtamaku xlakata xmasputuka tuku nitlan chu taʼakgchipat.

Xapulana kstalaninanin Cristo xtalakaskin xkgalhkgalhikgolh asta akxni xchalh kilhtamaku akxni Dios wi tuku xtlawalh, chuna la kgalhkgalhinankgolh xlakskujnin xala makgasa. Asta akxni xchalh uma kilhtamaku nila xkatatlawakgolh guerra xtalamakgasitsinkan kaj xlakata xlakan chuna xlakaskinkgolh. Jesús lakatanks lichuwinalh xlakata uma; ni kawanilh kstalaninanin pi xmakgtanukgolh kʼguerra, wata kawanilh pi ni xtlawakgolh. Kawanilh: «Kapaxkitit [mintalamakgasitsinkan], [...] chu na kapalakatlawakgotit oración wa nti xalikgaman katlawakgoyan» (Mateo 5:44). Akxni Jesús wa pi soldados romanos xʼamakgolh akgchipakgo Jerusalén, kawanilh pi ni xchipanankgolh wata xtsalakgolh, chu chuna tlawakgolh (Lucas 21:20, 21).

Nachuna apóstol Pablo tsokgli: «Ni titamakgapuspitnikgoyatit wa nti ni tlan ntu ntlawanikgoyan, [...] sampi chuna ntatsokgnit: “Kila  ntamakgapuspitni, kit nakxokgoy, wan nkinTlatikan”» (Romanos 12:19). Pablo xlichuwinama tuku akglhuwata siglos Dios xwanita, nema tatsokgtawilakgonit kLevítico 19:18 chu kDeuteronomio 32:35. Akxilhwa pi Dios xkamakgtaya xkachikin xala makgasa kʼguerras nema xkatatlawakgo xtalamakgasitsin. Xlakata amakgtum lichuwinalh, uma limasiya pi Dios watiya tuku xlakpuwan xlakata guerras, xkaʼakxilha la tuku nakalimakgtaya xlakskujnin chu nalimasputu tuku nitlan chu tiku kaʼakgchipa amakgapitsin. Chuna la xlanit makgasa, Jehová xʼama laksaka tuku kilhtamaku xtlawalh guerra chu tiku xmakgtayanankgolh.

Uma limasiya pi Dios ni kamaxkilh talakaskin kstalaninanin Cristo kxapulana siglo xlatalachipakgolh. Chu la uku, ¿wilakgolh makgapitsi unu kKatiyatni tiku kgalhikgo xtasikulunalin Dios xlakata natlawakgo guerra? ¿Chinita kilhtamaku xlakata Dios nakamakgtaya xlakskujnin? ¿Tuku lakpuwan Dios xlakata guerras nema anan uku? Artículo nema aku naʼakxilhaw namasta xtakgalhtin umakgolh takgalhskinin.