Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 BIOGRAFÍA

Tlakg tlan ni xawa tlakg nalakgapaskana

Tlakg tlan ni xawa tlakg nalakgapaskana

Kata 1984 lata nitu xa klitaxtu, lakapala talakgpalilh kilatamat, klitaxtulh Miss Hong Kong. Kifoto xtasiya kxmaknikan revistas chu periódicos. Xaktli, xaktantli, xakmasta taʼakgchuwin, xakmakgmatitaxtu ktelevisión, tapalaxtla xaklhakganan chu xakkatalalin tiku lu xlakaskinka xlitaxtukgo asta mapakgsina xalak Hong Kong.

Akgtum kata titaxtulh, ktsukulh makgtitaxtu películas chu makglhuwa akit lu xlakaskinka xaklitaxtu kpelícula. Reporteros xkinkgalhskinkgo xlakata kilatamat, xlakaskinkgo kifotos, akxni wi tuku xmalakikan, nachuna xakkatawayalh. Akit tiku tlakg xkiʼakxilhputunkgo.

Kʼakgtum película niku lhuwa lamakgnikan

Pero, titaxtulh kilhtamaku katsilh xlakata uma latamat ni lu xlakaskinka la xaklakpuwan. Atsinu ni putum películas niku xaktaxtu lu lipekua xtasiya wa xlakata katuwa xwili kilatamat. Tiku xtlawakgo películas anta kʼHong Kong ni xlismanikgo pi atanu tiku nakapalakatlawa chuna la Hollywood; wa xlakata akit xakmatitaxti niku xtasiya pi lu katuwa xtawi kxlatamat akgtum liʼakxilhtit, xakmalakaskin akgtum motocicleta xlakata naktitaxtu xʼakgspun kputlaw. Lhuwa películas nema ktlawalh nitlan tuku xlimin, talakgxtumit xalimaxana, xlatlawanikan tuku nitlan chu amakgapitsi tuku tlawakgo demonios.

Kata 1995 ktatamakgaxtokgli chatum tiku xpulalin taskujut. Maski xtasiya pi lu lipaxuw xakwilaw, xlakata lu xkinkalakgapaskanan, tumin chu tlan xlikatsi tiku xaktamakgaxtokga, putum kilhtamaku xaklipuwan chu xaklilakgaputsa. Kmakgxtakgli tuku xakliskuja.

TLAKG TLAN NI XAWA TLAKG NALAKGAPASKANA

Xatalipuwan ktsukulh klakapastaka akxni ama kilhtamaku sábado kintala chu akit xkinkalimakgalhtawakgekanan Biblia akgtum familia tiku lu tlan xlikatsikgo chu xtatayananin Jehová xlitaxtukgo. Xatlat Joe McGrath, tiku xakwaniyaw «kuku Joe», xkatakgalhtawakga kgalhatutu xlaktsuman chu akinin. Lu tlan xlikatsini xpuskat chu xlaktsuman. Akit xaklakgati kataʼan ktamakxtumit, chu makgapitsi kataʼalh klaklanka kxtamakxtumitkan. Umakgolh kilhtamaku lu xakpaxuwa chu ni xakpekuan.

Kkinchik lu tanu la xwanit, lu katuwa. Xlakata la xlima xlatamat kintlat lhuwa talakgaputsit xlimini kintse  chu lu xlilipuwan. Akxni xakkgalhi 10 kata kintse nialh kakatatamakxtumilh xtatayananin Jehová. Akit chuntiya xakan maski ni lu xaklakgati chu ktamunulh akxni xakkgalhi 17 kata. Pero ni lhuwa kilhtamaku titaxtulh nialh chuna klikatsilh la xlikatsikgo xtatayananin Jehová, nialh anta kmakgtapakgsilh.

LAKSAKLI NAKTASPITPARA

Ni lhuwa kilhtamaku xtitaxtunit lata xaktamakgaxtokgnit, chatiy tiku xpulalinkgo akgtum tamakxtumit xla xtatayananin Jehová kilakgapaxialhnankgolh. Kiwanikgolh la tlan naktalalimpara Jehová Dios chu skinika chatum misionera tiku wanikan Cindy, xlakata xkimakgtayalh. Uma kilhtamaku atsinu nialhtu xakkanajla. Wa xlakata kskinilh pi xkilimasiyanilh Biblia pi xlikana xTachuwin Dios. Cindy kimasiyanilh makgapitsi tuku wan Biblia chu xkgantaxtunita. Tsinu tsinu, lu tlan klatalaliw, chu kmakgamakglhtinalh takgalhtawakga xalak Biblia. Asta la uma kilhtamaku katsilh xlakata Jehová chatum Dios xapaxkina chu lakaskin pi xatapaxuwan xtawi kilatamat.

Akxni amakgtum ktsukupa tamakxtumi ktsukulh tlakg lipaxuwa akxni akxtum xakkatatawila xtatayananin Jehová nixawa latamanin tiku malakgastananinankgo uma kakilhtamaku. Pero la xaklin kilatamat akxni aktsujku xakwanit uma tlawa pi xaklipuwa chu niti xaklipawa. Chatum tiku xalak congregación kimasiyanilh Biblia la tlan natayaniyaw akxni kgalhiyaw taʼakglhuwit. Na katsinilh la nakgalhi amigos.

WA TUKU TLAKG TLAN NI XAWA TLAKG NALAKGAPASKANA

Kata 1997, kinchixku chu akit kaw kʼHollywood (California, Estados Unidos). Ktsukulh klimaxtu kilhtamaku xlakata nakamakgtaya amakgapitsin la tlan nalitamakgtayakgo xtastakyaw xTachuwin Dios. Xlakata kkamasiyani amakgapitsin xlakata Biblia lu kimakgapaxuwa ni xawa tlakg nalakgapaskana. Kata 2002 ktatanokgli Cheri, tiku makgasa xaklakgapasa Hong Kong. Kilatamatkan pulaklhuwa la lakxtum xwanit. Xla xlitaxtunit Miss Hong Kong, akxni akit ktlajanalh xla xlina akgtum kata lata xtlajananit. Akxni akit ktlajanalh xla kiwilinilh corona. Nachuna xlitaxtunit la akit, kataskujli tiku xpulalinkgo taskujut chu tlakg xkalakgapaskan. Nachuna la akit, xlama Hollywood.

Lu klakglipuwa Cheri akxni kkatsilh pi tiku xʼama tatawila nilh xlakata nialh tachokgolh kxnaku. Xla ni xtekgsa takgoxamixat kxtakanajla, kbudismo. Nachuna xtitaxtuma la akit: maski lu xlakgapaskan chuna la lakpuwankgo latamanin, xlipuwan chu niti xkalipawan. Tsukulh kmasiyani tuku xakkatsininit kBiblia, pero xtakanajla xtlawa pi ni akxilhli tuku xaxlikana.

Kiʼamiga Cheri tlawama akgtum película

Kata 2003, akgtum kilhtamaku Cheri kintachuwinalh kteléfono niku xlama kachikin Vancouver (Canadá), niku xmakgtlawama akgtum película. Kiwanilh pi lu xpaxuwama xlakata akxni xmatlawanima xputlaw ktiji chu xʼakxilhma tuku xwi niku xtitaxtuma, tlawanilh oración Dios: «¿Tiku wix? ¿La wanikana?». Akxni chuna xwanima titaxtulh kxlakatin akgtum Pukgalhtawakga xla xTatayananin Jehová chu akxilhli tukuwani Jehová. Lakpuwa pi uma xtakgalhtin xwanit xʼoración chu lakapala tachuwinamputulh chatum xtatayana Jehová. Wa xlakata wi tiku ktachuwinalh kteléfono, chu ni lhuwa kilhtamaku titaxtulh Cheri, alh ktamakxtumit akgtum congregación ktachuwin chino anta kVancouver.

Kiwanilh Cheri: «Uma latamanin xlikana kililakgaputsakgo. Tlan kawani la kmakgkatsi». Lu klipaxuwalh xlakata kgaxmatli  uma, xlakata niku kskuja nikxni kgalhikgolh amigos. Cheri chuntiya alh ktamakxtumit. Pero kata 2005 wanika pi xtlawalh akgtiy películas nema takilhtinit tuku xtatlawa makgasa, xtalakaskin xtaspitpa kʼHong Kong. Kata 2006, Cheri xatapaxuwan makamaxkilh xlatamat Jehová chu tamunulh la xTatayana Jehová kʼakgtum xalanka tamakxtumit xala anta. Xla tlakg xlimaxtuputun kilhtamaku xlakata skujnanilh Jehová, pero xlakata xtaskujut ni xmaxki talakaskin, wa xlakata xlilipuwan.

PAXUWAKAN XLAKATA KAMAKGTAYAKAN AMAKGAPITSIN

Kata 2009, xlatamat Cheri talakgpalilh. Laksakli pi namakgxtakga taskujut nema xtlawa kcine xlakata tlakg tlan skujnanilh Jehová. Kgalhilh lhuwa xasasti amigos anta kcongregación. Tlakg tsukulh limaxtu kilhtamaku xlakata tlakg nalichuwinan Dios chu la uku lipaxuwa xlakata kamakgtaya latamanin xatapaxuwan natawilakgo (Mateo 24:24).

Cheri tsukulh katsini tachuwin nepalí xlakata namakgtayanan kʼakgtum aktsu tamakxtumit xla xTatayananin Jehová tiku kalitachuwinankgo Dios latamanin tiku chuwinankgo Nepal tiku wilakgolh kʼHong Kong. Nachuna latamanin tiku wilakgolh kʼHong Kong kalakgmakgankgo nepalíes xlakata ni liwana chuwinankgo inglés chu nipara chino chu xlakata xtalismaninkan ni lakxtum. Cheri xkiwani pi lu xlakgati kamakgtaya latamanin xlakata naʼakgatekgskgo tuku wan Biblia. Akgtum liʼakxilhtit, akgtum kilhtamaku akxni xlichuwinama Dios akgatunu chiki, lakgapasli chatum puskat tiku tsinu xkatsi xlakata Jesús pero ni tuku xkatsi xlakata Jehová. Cheri masiyanilh tuku wan Biblia akxni Jesús tlawanilh oración xTlat xalak akgapun. Akxni katsilh uma puskat pi tlan xtlawanilh oración Dios tiku xaxlikana, tlakg katsiputulh. Ni makgas kilhtamaku titaxtulh, xchixku chu xtsumat na tsukukgolh likgalhtawakgakgo Biblia (Salmo 83:18; Lucas 22:41, 42).

Cheri xala uku

Akxni xakakxilha la xlipaxuwa kiʼamiga akxni xlichuwinan Dios, klakpuwa: «¿Tuku xlakata na nichuna ktlawama?». Uma kilhtamaku, akit xaktaspitnita kʼHong Kong. Liwana klakkaxwililh kilatamat xlakata tlakg naklimaxtu kilhtamaku nakmasiya tuku xaxlikana xlakata Biblia. Klakgati kkakgaxmatni latamanin chu nakkamakgtaya naʼakgatekgskgo xTachuwin Dios.

Klakgati katachuwinan latamanin chu nakkamakgtaya naʼakgatekgskgo xTachuwin Dios

Akgtum liʼakxilhtit, klimakgalhtawakgelh Biblia chatum puskat xalak Vietnam tiku putum kilhtamaku xlipuwan chu xlakgastapu xlakgchuchutla. La uku uma puskat paxuwa chu kgalhi lakwan amigos kcongregación.

Cheri chu akit ktekgswi tuku tlakg tlan ni xawa tlakg nalakgapaskana. Maski lhuwa tuku xʼanan taskujut nema xakkgalhi chu lu kinkalakgapaskan, pero kamasiyanikan amakgapitsin xlakata Jehová tlakg tlan limakgkatsikan xlakata xla lakgchan namalankikan. Liwana kkatsinitaw xlakata xlikana tuku wa Jesucristo: «Tlakg anan tapaxuwan akxni mastakan nixawa akxni makglhtinankan» (Hechos 20:35).