Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Septiembre kata 2015

¿Makgkatsiya pi Dios makgxtakgnitan?

¿Makgkatsiya pi Dios makgxtakgnitan?

«¿TUKU xlakata chuna kiʼakgspulalh? ¿Tuku xlakata Dios mastalh talakaskin pi chuna xlalh?» Chuna xkgalhskinkan Sidnei, chatum kgawasa xalak Brasil tiku xkgalhi 24 kata, nitlan tuku akgspulalh kʼakgtum tobogán chu nialhla tlawalh.

Tapatin nema limin akxni akgspulanan tuku nitlan, akgtum tajatat, akxni tiku lu paxkiyaw, akxni wi tuku masputunan o guerra tlawa pi lhuwa latamanin namakgkatsikgo pi Dios kamakgxtakgnit. Lata makgasa wilakgolh latamanin tiku nachuna makgkatsikgonit. Akxni tiku xpulalin familia Job lakgmilh lhuwa talakgaputsit, lakpuwa pi wa Dios tiku xliminima. Xla wanilh Dios: «Ktasaskiniyan, pero ni kinkgalhtiya. Ktaki pero ni kuenta kintlawaniya. Lu nitlan kilikatsininita. Maklakaskina militliwakga xlakata nakilitlawaniya tuku nitlan» (Job 30:20, 21, La Palabra de Dios para Todos [PDT]).

Job ni xkatsi tiku xliminima taʼakglhuwit chu na nixkatsi tuku xlakata xpatinama. Tuku tlakg tlan wa pi Biblia kinkawaniyan tuku xlakata kgalhiyaw taʼakglhuwit chu tuku natlawayaw akxni chuna titaxtuyaw.

¿LAKASKIN DIOS PI NAPATINANAW?

Biblia wan xlakata Jehová Dios: “Lu tlan putum tuku tlawanit, xlakata putum tuku tlawa xaʼakgstitum. Dios tiku ni makgxtakgnan, wantiku tlawa tuku xaʼakgstitum; xla xaʼakgstitum chu tlawa tuku xalakatitum” (Deuteronomio 32:4). Komo chuna, nila nalakpuwanaw pi chatum Dios tiku “xaʼakgstitum chu tlawa tuku xalakatitum” lakaskin pi kapatinaw o namaklakaskin tuku nitlan xlakata nakinkamapatiniyan o kaj wi tuku nakatsiniyaw.

Wata Biblia kinkawaniyan: «Akxni nakali’akxilhkanatit, niti kawa: “Wa Dios tiku kili’akxilhma”. Xlakata Dios nila tiku namatlawi tuku nitlan, chu xla na niti li’akxilha» (Santiago 1:13). Biblia kinkawaniyan akxni Dios katlawalh latamanin, ni xkgalhikgo talakgalhin: lu kastlan niku xwilakgo, lu tlan taskujut chu kamaxkilh putum tuku xtalakaskin xlakata xpaxuwakgolh. Dios kawanilh: «Kakgalhitit kamanan chu kalhuwantit, kamalakgatsamatit katiyatni chu kakuentajtlawatit». Adán chu Eva nila xlakpuwankgolh pi Dios xkamakgxtakgnit (Génesis 1:28).

Xlikana, kkilatamatkan la uku lhuwa tuku nitlan xʼanan. Asta tlan nawanaw pi latamanin tayanikgonit lhuwa tapatin. Biblia xlikana tuku wan: «Sampi luwa katsiyaw mpi xlipaks ntamalakatsukun, makxtum jalhpanikgoy, chu makxtum tatlakgajkgoy asta chu» (Romanos 8:22). ¿Tuku nitlan lalh?

¿TUKU XLAKATA PATINANAW?

Tapatin kilhtsukucha akxni xlamakgo xapulana latamanin. Tsukulh akxni chatum ángel ni kgalhakgaxmatli Dios. Uma ángel, tiku Satanás chu Akgskgawini litaxtulh, tlawalh pi Adán chu Eva xtatayakgolh. Akxni ni kgaxmatkgolh tuku xkawanikanit pi ni xwakgolh xtawakat «kiwi nema lilakgapaskan tuku xatlan chu nixatlan», xakstukan laksakputunkgolh tuku tlan chu tuku nitlan. Akgskgawini wanilh Eva pi ni xʼama ni komo ni xkgalhakgaxmatnalh, chuna wamputulh pi Dios xaʼakgsanina. Satanás na limawakalh Dios pi ni xlakaskin pi latamanin xakstukan xlaksakkgolh tuku tlan chu tuku nitlan (Génesis 2:17; 3:1-6). Akgskgawini wamputulh pi latamanin tlakg tlan xkinkakitaxtunin komo xtamakgatliniw Dios. Putum uma tlawalh pi xtawilalh takgalhskinin nema lu xlakaskinka: ¿Tlan nakinkamapakgsiyan Dios?

Satanás tlawalh pi xtawilapa atanu takgalhskinin. Wa pi akinin skujniyaw Dios xlakata kaj wi tuku lakaskinaw. Akgskgawini wanilh Dios xlakata Job: «¿Pi kawa ni kuentajtlawaya, xfamilia chu tuku kgalhi? Tlawaya pi tlan kakitaxtunilh putum tuku tlawa [...]. Pero komo namakglhtiya putum tuku kgalhi, xlikana pi nitlan tuku nawaniyan» (Job 1:10, 11, PDT). Maski Satanás xlichuwinama Job, wamputulh pi putum latamanin skujnikgo Dios xlakata kaj wi tuku lakaskinkgo.

¿TUKU LAKPUWA NATLAWA DIOS?

¿La tlan putum kilhtamaku xtalakkaxtlawalh uma taʼakglhuwit? Xlakata Dios lu skgalala, laksakli tuku  tlakg tlan, nema ni xkinkamakgalipuwan (Romanos 11:33). Laksakli pi latamanin xakstukan xkamapakgsika kaj tsinu kilhtamaku chu uma xʼama limasiya tiku tlakg tlan mapakgsinan.

Xlakata lu nitlan wi kakilhtamaku la uku limasiya pi xtamapakgsinkan latamanin lu nitlan kitaxtunit. Ni kajwatiya nila wilikgonit takaksni chu tapaxuwan, wata xkuentajkan xlakata Katiyatni lu nitlan wi. Wa xlakata Biblia wan: «Ni lakgchan chatum chixku xakstu napulalin xtatukit» (Jeremías 10:23). Komo wa Dios namapakgsinan naʼanan takaksni putum kilhtamaku, tapaxuwan chu tlan namakgatsikgo; wa uma tuku Dios xlakaskin kimpalakatakan (Isaías 45:18).

¿Tuku natlawa Dios xlakata namakgantaxti? Kalakapastakti oración nema kamasiyanilh Jesús kstalaninanin: «Kamilh mintamapakgsin. Katatlawalh mintalakaskin, chuna la kʼakgapun, nachuna kkatiyatni» (Mateo 6:10, Traducción del Nuevo Mundo). Chu chuna nawan. Akxni nachan kilhtamaku, xTamapakgsin Dios, namasputu putum tuku kinkamapatiniyan (Daniel 2:44). Nialh katitalakapastakli talimaxkgen, tajatat chu linin. Dios wan pi «xla nalakgmaxtu pobre nak ixmakankan ti tamakgxtakgajnij» (Salmo 72:12-14). Biblia liwana kinkawaniyan pi «ni chatum lataman nawan: “Ktatatlay”» (Isaías 33:24). ¿Chu tuku nakakitaxtuni putum tiku nikgonita chu wi kxtalakapastakni Dios? Biblia wan: «Namin kilhtamaku akxni putum tiku wilakgo kputaknun nakgaxmatkgo xtachuwin [Jesús] chu nataxtukgo» (Juan 5:28, 29TNM). ¡Lu stlan takgalhkgalhin!

Komo tlakg nakanajlayaw tuku kinkamalaknuniyan Dios nakinkamakgtayayan xlakata nalipawamparayaw

LA TLAN NATAYANIYAW TALIPUWAN

Max titaxtunita akgkutujun kata lata nitlan tuku akgspulalh, Sidnei, tiku lichuwinanka kxapulana artículo, xla wa: «Nikxni klimawakalh Dios tuku kiʼakgspulalh, pero xapulana kmakgkatsilh pi Dios xkimakgxtakgnit. Lakgachunin klilipuwan chu ktasa akxni klakapastaka pi nialhla ktlawan. Pero xlakata tuku klikgalhtawakga kBiblia, kkatsi pi ni wa Dios chuna kintlawalh. Biblia kinkawaniyan xlakata “kilhtamaku chu tuku xalan lay putum kalakgchin”. Xlakata ktachuwinan Jehová chu klikgalhtawakga makgapitsi versículos xalak Biblia matliwakglha kintakanajla chu kimakgtaya» (Eclesiastés 9:11; Salmo 145:18; 2 Corintios 4:8, 9, 16).

Akxni lakapastakkan tuku xlakata Dios mastanit nalakaskin pi naʼanan tapatin chu akxni katsiyaw pi nialh makgas nasputa tuku nitlan, tlan nalipawamparayaw Dios. Tlan nakanajlayaw pi Dios wa «nti mputsakgoy lakgalhamankgoy». Ni katimakgalipuwanka tiku lipawan Dios chu xKgawasa (Hebreos 11:6; Romanos 10:11).