Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 LICHUWINAN TUKU WI KXMAKNI REVISTA | ¿TUKU LA AKXNI NIKAN?

¿Tuku kinkaʼakgspulayan akxni niyaw?

¿Tuku kinkaʼakgspulayan akxni niyaw?

«Akit xaklakpuwan pi akxni nakni kaj akgtutu tuku xʼama kiʼakgspula: nakan kʼakgapun, kpupatin o niku kamakglhtinikan xtalakgalhinkan latamanin. Xaklakpuwan pi ni lu tlan xaklikatsi xlakata xakalh kʼakgapun, pero na ni lu lixkajni xaklikatsi xlakata xakalh kpupatin. Ni liwana xakʼakgatekgsa tuku xkilhchanima niku kamakglhtinikan xtalakgalhinkan latamanin. Nikxni xaklikgalhtawakganit tuku wan Biblia; kaj wa xakkatsi tuku xwankgo latamanin.» (Lionel)

«Xkimasiyanikanit pi putum naʼanaw kʼakgapun, pero ni liwana xakkatsi komo xlikana. Xaklakpuwan pi linin anta putum sputa.» (Fernando)

¿Kgalhskinkanitata tuku la akxni nikan? ¿Wi niku patinamakgolh tiku lu xkapaxkiyaw nema nikgonita? ¿Nakaʼakxilhparayaw? ¿La nakatsiyaw komo xlikana naʼanan talakastakwanat? Xlakata nakgalhiyaw xtakgalhtin umakgolh takgalhskinin, ¿la akxilha komo nalakputsananiyaw tuku masiya Biblia? Pulana kaʼakxilhwi tuku wan xlakata linin chu alistalh naʼakxilhaw xtakgalhtin akgtutu takgalhskinin.

 ¿La wilakgolh tiku nikgonita?

TAKGALHTIN NEMA MASTA BIBLIA: «Wantiku staknankgo liwana katsikgo pi nanikgo, pero wantiku nikgonit, xlakan nialh tuku katsikgo, nialh kamaskgawikan, xlakata nialh tuku lakapastakkgo. Putum tuku tlan litlawaya mimakan, katlawa, xlakata ni anan taskujut chu nituku lay lakkaxwilikan talakapastakni chu nipara takatsin nipara liskgalala anta Seol, * niku pimpat.» (Eclesiastés 9:5, 10.)

Akxni wan Seol, Biblia lichuwinama putaknun. Uma kilhchanima niku nitu katsikan chu nitu tuku tlawakan. Kalilakpuwanti tuku xʼakgatekgsa Job tiku ni xmakgxtakga Dios akxni xlichuwinan putaknun. Akgtum kilhtamaku kamakgatsankgalh putum xkamanan chu tuku xkgalhi. Alistalh kgalhilh kxmakni lhuwa tsitsi nema lu mapatinilh. Wa xlakata tasaskinilh Dios: «Maski kputaknun [«pupatin», chuna la wan La Sagrada Biblia, xla Guillermo Jünemann] xkimatsekgti, chu tsekg xkimakgxtakgti» (Job 1:13-19; 2:7; 14:13). Job xkatsi pi putaknun o pupatin ni kilhchani lhkuyat niku tlakg xpatinalh wata niku nialh patinankan, niku jaxkan.

Atanu la nakatsiyaw la wilakgolh tiku nikgonita wa akxni likgalhtawakgayaw tiku kalichuwinan Biblia pi lakastakwanankgolh (kaʼakxilhti recuadro « Akgtsayan talakastakwanat nema lichuwinan Biblia»).

Nipara chatum lataman lichuwinalh pi lu tlan niku xwilacha o niku xmapatinimaka. Komo chuna xwa, ¿ni xlikana pi xtilichuwinankgolh? ¿Ni xlikana pi xtsokgwilika kBiblia xlakata xtakatsilh niku xʼankgonit? Pero Biblia ni lichuwinan. Uma latamanin nitu wankgolh, xlakata nitu tuku xlichuwinankgo. Nitu xkatsikgo xtachuna la snun klhtatamakgolh. Anta kBiblia tamaklakaskin tachuwin «talhtata» xlakata kilhchani linin. Akgtum liʼakxilhtit, akxni kalichuwinan xtsumat Jairo chu Lázaro, Biblia wan pi «klhtatamakgolh» (Lucas 8:52, 53 chu Juan 11:11, 13).

Wa xlakata, ¿anta sputa akxni nikan? ¿Tlan «nalakastakwanankan» kʼuma xasnun talhtata?

^ párr. 7 Tachuwin xaʼhebreo Seol chu tachuwin xagriego Hades wamputun «putaknun», «niku kamaknukan latamanin» o «klhuku». Kmakgapitsi Biblia wilikgonit «pupatin», maski Biblia ni lichuwinan pi wi niku kamapatinikan klhkuyat.