Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Agosto kata 2015

 BIOGRAFÍA

Jehová tlakg kimaxkinit nixawa tuku kilakgchan

Jehová tlakg kimaxkinit nixawa tuku kilakgchan

Akit xaklilakgaputsa chu xaklakaskin tuku lakaskinkgo tiku kgalhikgo 17 kata. Xaklakgati xakkatatawila kiʼamigos, xakpaxtawakatnan chu xakkgamanan fútbol. Pero akgtum kakgotanun kilatamat talakgpalilh. Nitlan tuku kiʼakgspulalh akxni xakama kmoto chu kinchatuminika nialhla ktatsuwilh. Uma chuna kiʼakgspulalh max puxumakaw kata titaxtunita chu la uku nialhla ktaki.

Kstakli kʼAlicante kʼakgtum kachikin xalak España, lakatsu kmar Mediterráneo. Lhuwa taʼakglhuwit xʼanan kkinchik, wa xlakata kkatijin xaklatama. Lakatsu kkinchik xwi niku xkaxtlawakan llantas chu José María kiʼamigo ktlawalh, chatum tiku anta kskuja. Xla lu tlan xlikatsi chu xkinkgaxmatni xlakata kifamilia nichuna xtlawa. Maski akgpuxam kata xkimpulani, akxni xaktitaxtu tuku nitlan la kintala wa, xaxlikana kiʼamigo litaxtulh.

José María xkatalikgalhtawakgama Biblia xtatayananin Jehová. Chu xtasiya pi lu xlakgati tuku xkatsinima xlakata makglhuwa xkilitachuwinan. Maski xakkgaxmatni tuku xkiwani pero ni xaklakgati. Akit kgawasaku xakwanit chu atanu tuku xaklakgati. Pero, kilatamat lakapala xʼama talakgpali.

NITLAN TUKU KIʼAKGSPULALH

Ni klakgati klichuwinan tuku kiʼakgspulalh; kajwatiya nakwan pi ni kuentajtlawalh chu xatonto klitaxtulh. Kaj lakapala talakgpalilh kilatamat. Xakkgalhi lhuwa litliwakga chu kaj lakapala xakwi kʼhospital chu nialhla xaktatsuwi. Nila xakkanajla pi akit chuna xaktitaxtuma. Ankgalhin xkinkgalhskinkan tuku xlakata klamajku.

José María kilakgmilh, chu lakapala kawanilh xtatayananin Jehová pi xkilakgapaxialhnankgolh tiku lakatsu xwilakgolh kʼhospital. Lakgchalh kinaku xlakata putum kilhtamaku xkilakgapaxialhnankgo. Akxni ktaxtulh niku xkinkuentajtlawamaka ktsukulh likgalhtawakga Biblia. Kkatsinilh tuku xaxlikana xlakata latamanin patinankgo chu nikgo, chu tuku xlakata mastama talakaskin pi kalalh tuku nitlan. Nachuna klikgalhtawakgalh xtamalaknun Dios xlakata kilhtamaku nema aku mima, xlakata Katiyatni nalitatsama latamanin tiku ni nakgalhikgo talakgalhin chu «ni chatum lataman nawan: “Ktatatlay”» (Isaías 33:24). Kajku xlimakgtum kilatamat, tlan xakakxilha kilhtamaku nema aku mima.

Akxni ktaxtulh kʼhospital, lakapala ktsukulh kkatsini tuku xalak Biblia. Asta kkilalh ktamakxtumit xla xtatayananin Jehová chu xaklichuwinan Dios ksilla de rueda. Kilhtamaku 5 xla noviembre kata 1988, akxni xakkgalhi 20 kata ktamunulh kʼakgtum bañera. Jehová kimakgtayanit xlakata naklipaxuwa kilatamat. ¿La naklimasiya pi kpaxtikatsini?

 KSKUJNANI DIOS MASKI KTATATLA

Liwana xaklakkaxwilinit pi nitu tuku nakimachokgo xlakata naskujnani Jehová; ktlawaputun chuna la kmatlani (1 Timoteo 4:15). Xapulana lu tuwa xwanit, xlakata kifamilia ni xlakgatikgo uma xasasti kintakanajla. Pero xTatayananin Jehová, tiku watiya takanajla kgalhikgo, kimakgtayakgolh. Lilakgaputsakgolh xlakata ni xakmakgatsankgalh akgtum tamakxtumit chu tlan xakalh lichuwinan Dios.

Pero titaxtulh kilhtamaku tantaku chu tantaskaka xakmaklakaskin tamakgtay. Akxni lhuwata xakputsanit, ktekgsli niku kakuentajtlawakan tatatlanin anta kValencia, max 160 kilómetros kxnorte Alicante. Lata uma kilhtamaku asta la uku, kinchik litaxtunit.

Maski nila ktaki, nitu kimachokgo xlakata ni nakkalitachuwinan kintakanajla amakgapitsin

Maski nila ktaki, chuntiya klakpuwanit nakskujnani Jehová. Tumin nema kimaxkika xlakata nila ktlawan chu amakgapitsi tamakgtay klitamawalh akgtum computadora nema wilika kxpaxtun kimputama. Na ktamawalh akgtum celular. Putum tsisa, wi tiku kimapasini kincomputadora chu kinteléfono. Kincomputadora klimatsuwi kinkgalhtsan chu klimaklakaskin akgtum aparato, chu kkinkilhni klimaklakaskin kgantum aktsu kiwi xlakata naklitsokgnan kteclado chu kkinteléfono.

Kmaklakaskin aktsu kiwi xlakata naktsokga números kteléfono

¿La kimakgtayanit kincomputadora? Tlan ktanu ksitio jw.org chu kBIBLIOTECA EN LÍNEA Watchtower. Uma lu kimakgtayanit. Atsinu ni putum kilhtamaku ktanu xlakata naklikgalhtawakga likgalhtawakga nema takilhtinit kBiblia, chu uma tlawa pi tlakg nakkatsi xlakata Dios chu xlakata lakwan xtayat. Akxni kiʼakstu kimakgkatsikan, putum kilhtamaku ktekgsa akgtum artículo anta ksitio kʼInternet nema tlan kimamakgkatsini.

Nachuna, kkincomputadora tlan kimatitaxtinikan tamakxtumit nema ktlawayaw xTatayananin Jehová. Uma tlawa, pi ni kajwatiya nakgaxmata tuku talichuwinan, na tlan kmasta kintakgalhtin, ktlawa oración, kmasta kintaʼakgchuwin chu asta kkalikgalhtawakgani Makatsinina latamanin; uma putum chuna ktlawa anta niku kwi. Maski nialhla kan ktamakxtumit, kmakgkatsi pi kmakgtapakgsi anta kcongregación.

Kinteléfono chu kincomputadora klimaklakaskin putum kilhtamaku xlakata naklichuwinan Dios. Maski nila ktaxtu xlakata nakan akgatunu kchiki, la tlawakgo amakgapitsin, pero na klichuwinan Dios. Xlakata uma computadora chu teléfono tlan kkalitachuwinan tuku kkanajla amakgapitsin. Klakgati katachuwinan latamanin kteléfono lakgkgolotsin o tiku pulalinkgo akgtum congregación kiskinikgonit pi naklakkaxwili xlakata natalichuwinan Dios kteléfono. Xlakata chuna talichuwinan Dios makgapitsi na makgtlawakgo tiku xalak congregación xlakata nila taxtukgo kxchikkan.

Kmakgalhtawakgenama

 Pero kilatamat ni kajwatiya lipawan tecnología. Putum kilhtamaku kilakgapaxiʼalhnankgo kiʼamigos. Kataminkgo makgapitsi xparientes chu tiku lakgapaskgo xlakata katsiputunkgo tuku wan Biblia. Ankgalhin, kiwanikgo pi akit kakkamasiyanilh tuku wan Biblia. Lakgachunin, minkgo akxni kakninanikgo Dios kfamilia. Klakgati pi laktsu kamanan natawilakgo kkimputama chu kiwanikgo tuku xlakata paxkikgo Jehová.

Klakgati akxni kakninaniyaw Dios «kfamilia»

Lu kpaxtikatsini xlakata lhuwa tiku kilakgapaxialhnankgo niku kwi chu putum kilhtamaku wi tiku wilakgolh. Kilakgminkgo kiʼamigos xalak kaniwa. Uma, kaks kamalakawani tiku skujkgo kʼuma chiki niku kwi. Putum kilhtamaku kpaxtikatsini Jehová xlakata kimaxki talakaskin nakmakgtapakgsi kxkachikin.

«KTAYANIMA»

Akxni wi tiku kinkgalhskin la kwi, kkgalhti: «¡Tlakg tlan, ktayanima!». Pero ni kajwatiya akit chuna ktitaxtuma. Maski katuwa tuku natitaxtuyaw o wi tuku natlawa pi nialhla natatsuwiyaw, kimputumkan kstalaninanin Cristo ankgalhin kgalhiyaw taratlaw, xlakata «ntakanajla» (1 Timoteo 6:12). ¿Tuku kimakgtayanit xlakata naktayani umakgolh kata? Chali chali ktlawani oración Jehová xlakata nakpaxtikatsini pi wi tuku ktlawa kkilatamat. Ankgalhin wi tuku ktlawa xlakata nakskujnani Dios, kkgalhkgalhima kilhtamaku nema aku mima nema Dios malaknunit.

José María

Ankgalhin klilakapastaka Paraíso nema natawila kKatiyatni chu xatapaxuwan nawan akxni nakkgosnan chu nakkgosa. Lakgachunin ktakgalhkgamanan kiʼamigo, José María, tiku xla kgalhi tajatat wanikan poliomielitis. Kkgalhskin tiku xtlajanalh komo xakkgosnaw. Xla kinkgalhti: «Ni xlakaskinka tiku natlajanan. Tuku tlakg xlakaskinka wa pi tlan nakgosnanaw kParaíso».

Akxni klakpuwan pi chuna kwi tuwa kmakgkatsi. Kkatsi pi akxni kgawasaku xakwanit ktlawalh tuku ni xlilat nema klakgaxokgoma la uku. Kpaxtikatsini Jehová xlakata nitu kimakgxtakgma. Lhuwa tuku kimaxkinit... lanka familia, lu klatamaputun, kpaxuwa xlakata kkamakgtaya amakgapitsin chu xatlan takgalhkgalhin nema kkgalhi. Komo xakwa la kmakgkatsi, xakwa pi Jehová tlakg kimaxkinit nixawa tuku kilakgchan.