Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Agosto kata 2015

 TLAN LIʼAKXILHTIT XTAKANAJLAKAN | DÉBORA

«La xtse Israel klitaxtulh»

«La xtse Israel klitaxtulh»

DÉBORA kaʼakxilha soldados nema tamakxtumikgonit kxakgspun sipi Tabor. Matliwakglha akxni kaʼakxilha. Lata taxtuyacha Chichini, lilakapastaka pi ni pekuankgo chu kanajlakgo umakgolh lakchixkuwin chu xcomandantejkan, Barac. Maski xlakan lhuwa 10,000 soldados, putum nakaliʼakxilhkan xtakanajlakan chu komo ni pekuankgo. Ni lhuwa kgalhikgo tuku limakgninankgo chu natalachipakgo tiku lixkajni likatsikgo chu tlakg xlhuwakan. Pero takaxkgonita xlakata natalachipanankgo, chu xpalaka chatum puskat tiku ni pekuan.

Kaj kalilakpuwanti Débora wi kxakgspun sipi Tabor, xlhakgat matsuwi un, akxtum taya Barac chu akxilhmakgo la tasiya. Lata kxakgspun uma sipi, liwaka 400 metros xlitalhman, liwana tasiya kxakapuskan kʼEsdrelón, o Jezreel, nema chan asta ksuroeste. Kgalhtuchokgo Cisón titaxtu kxakapuskan nema xakaxtakni chan asta kmar Grande, titaxtu lakatsu kmonte Carmelo. Max kskaknit kgalhtuchokgo uma tsisa; pero, wi tuku xtasiya kxakapuskan. ¿Tuku xtasiya? Wa ksoldados Sísara nema xtalakatsuwimakgolh. Chu tuku xtasiya wa tuku xlimakgninankgo nema lu lanka xkalimakgkatsikan: 900 putlaw nema xkgalhikgo xastakaka kuchillas xla hierro chu xtasiya pi lu nitlan tuku xʼama la. ¡Sísara xlakpuwanit pi nakamasputu israelitas xtachuna la kachukukan tuwan, o palhma!

Débora xkatsi pi Barac chu ksoldados xkgalhkgalhimakgo pi xkawanilh tuku natlawakgo o wi tuku xkalimasiyanilh. ¿La xmakgkatsi xlakata kaj xakstu puskat tiku anta xwi chu lu lanka taskujut nema xlakgayawakanit? ¿Max xlakpuwama tuku xtlawama unu? ¡Nichuna! Wa Jehová, xDios, tiku xwaninit pi xmatsukilh uma guerra. Na wa Jehová tiku wanilh pi uma guerra xʼama sputa «kxmakan chatum puskat» (Jueces 4:9). ¿Tuku kinkamasiyaniyan xlakata xtakanajla Débora chu soldados tiku ni xpekuankgo?

«MILIPINAT KSIPI TABOR»

Xapulana akxni lichuwinankan Débora anta kBiblia, wan pi xla palakachuwina. Maski ni lu talichuwinan uma tukuwani anta kBiblia, Débora ni kaj xakstu chuna limapakuwikan. * Nachuna, uma puskat tiku ni xmakgxtakga Dios na jueza xwanit, xlakkaxtlawa taʼakglhuwit chu xkamakatsini kachikin tuku xwan Jehová akxni xtawila taʼakglhuwit (Jueces 4:4, 5).

Débora xlama xkasipijni Efraín, anta kBetel chu kRamá. Putum kilhtamaku xtawila xtampin mokgot xlakata anta xkamakgamakglhtinalh latamanin chu xkalimakgtayalh xtastakyaw Jehová. Xlikana, lu tuwa xwanit uma taskujut, pero uma ni xmakgapekuan. Nachuna, lilakgaputsa tuku xlama. Kʼakgtum takilhtlin nema tatlawalh Barac, lichuwinalh tuku xlakata, akxni wa: «Xlakan tsukukgolh laksakkgo xalaksasti dioseskan. Wa xlakata uma kilhtamaku analh guerra» (Jueces 5:8). Israelitas xlakgmakgankgonit Jehová xlakata nakakninanikgo atanu dioses, wa xlakata xkamakamaxkinit xtalatlawananin. La uku xkaʼakgchipanit mapakgsina xalak Canaán wanikan Jabín, nema xpulalin ksoldados chatum puxku tiku lixkajni xlikatsi wanikan Sísara.

Israelitas xpekuankgo akxni xkgaxmatkgo xtukuwani  Sísara. Xtakanajlakan chu xtalismaninkan xalak Canaán xlitalakgapaskgo xlakata lu lixkajni xlikatsikgo. Nachuna, xmakamastakgo xkamanankan chu tiku kstakgo xmaknikan anta ktemplo, wa tuku lu xtalismani . ¿Kalilakpuwanti pi kachikin niku wila akgchipanit chatum mapakgsina xalak Canaán chu ksoldados tiku lixkajni likatsikgo? Chuna la kilhtlilh Débora, nialhla xlatamakan kʼuma kachikin chu klaktsu kachikinin niti xlama (Jueces 5:6, 7). Xlikana, latamanin max xpekuankgo chu xtatsekgkgo kkakiwinin chu kkasipijnin, chu nila kskujkgo kxpukuxtukan chu nila xtlawankgo ktiji xlakata xlakpuwankgo pi wi tiku xʼama katlawani tuku nitlan, nakamakglhtikan xkamanankan o xkalikgamananka xlakpuskatinkan. *

Kachikin Israel xkaʼakgchipakanit akgpuxam kata, asta akxni Jehová akxilhli pi xkachikin tiku ni xkgaxmatni xlakgpalikgonita la xlakpuwankgo. O la wan xtakilhtlin Débora chu Barac: «Asta akxni akit, Débora, ktakilh, asta akxni la xtse Israel klitaxtulh». Débora xtatamakgaxtokgnit chatum chixku xwanikan Lapidot. Maski ni takatsi komo xkgalhi kamanan, Débora «xtse Israel [...]litaxtulh», wamputun pi Jehová laksakli xlakata xkuentajtlawalh kachikin xtachuna la chatum tse. Wanilh pi xmakatsinilh chatum chixku tiku ni xmakgxtakgnan chu ni xpekuan, juez Barac, xlakata xtalachipalh Sísara (Jueces 4:3, 6, 7; 5:7).

Débora makgpuwantinilh Barac xlakata xlakgmaxtuna xkachikin Dios xlitaxtulh

Jehová maklakaskilh Débora, xlakata xwanilh Barac pi xkamamakxtumilh ksipi Tabor 10,000 soldados xalak akgtiy tribus xalak Israel. Débora wanilh pi Dios xwanit pi xʼama makgatlaja Sísara, ksoldados chu 900 putlaw nema litlawakgo guerra. Uma tamalaknun max kaks lilakawa Barac, xlakata Israel ni xkgalhi lhuwa soldados chu ni lhuwa xkgalhikgo tuku limakgninankan. Maski chuna, Barac alh talachipanan. Pero wi tuku skilh: pi Débora xkataʼalh ksipi Tabor (Jueces 4:6-8; 5:6-8).

Makgapitsi wankgo pi Barac ni lu xkanajla wa xlakata chuna skilh, pero uma ni xlikana. Xlakata ni tlakg skinilh Dios tuku limakgninankan; wata chatum xpalakachuwina tiku xkataʼalh xlakata xkamatliwakglhli (Hebreos 11:32, 33). Jehová tlan akxilhli, chu mastalh talakaskin pi Débora xkataʼalh. Maski chuna, tlawalh pi Débora xlichuwinalh kaj xpalakata chatum puskat xʼamakgo tlajanankgo (Jueces 4:9). Dios xlakkaxwilinita pi chatum puskat xʼama makgni Sísara uma lixkajni chixku.

La uku, lakpuskatin katlawanikan tuku ni xaʼakgstitum, kawilinikan chu kalikgamanankan. Ni lu kamaxkikan kakni chuna la Dios lakaskin pi kakalikatsinika.  Pero Dios xlakaskinka kaʼakxilha lakchixkuwin chu lakpuskatin chu putum tlan kaʼakxilha (Romanos 2:11; Gálatas 3:28). Tuku titaxtulh Débora kinkamalakapastakayan pi Dios na kamaxki kakni lakpuskatin akxni kalakgayawa taskujut nema xlakaskinka, chuna limasiya pi kalipawan. Wa xlakata lu xlakaskinka pi ni nakalakgmakganaw chuna la kalikatsinikan kʼuma kakilhtamaku.

«TACHIKILH TIYAT, KʼAKGAPUN NA TAKTALH CHUCHUT»

Barac tunkun tlawalh tuku wanika chu mamakxtumilh 10,000 lakchixkuwin tiku ni xpekuankgo xlakata xkatalachipakgolh xalaklipekuanit ksoldados Sísara. Xlikana, akxni alh ksipi Tabor, ni xpekuan xlakata xkataʼan chatum tiku xkamatliwakglhli. «Débora tsukulh tatalakakxtunan.» (Jueces 4:10.) Max lu kamatliwakglhli umakgolh soldados xlakata xʼakxilhkgo pi xkataʼama chatum puskat tiku ni xpekuan, xʼama masta xlatamat xlakata paxki Jehová.

Sísara lakapala lakkaxwililh akxni katsilh pi Israel xtamakxtumikgonita xlakata nakatalachipakgo. Chalhuwa mapakgsinanin xalak Canaán malakgachakgolh ksoldadoskan xlakata namakgtayakgo mapakgsina Jabín, nema xtasiya pi tlakg lakgtliwakgan xwankgonit. Akxni xʼamakgolh soldados chu 900 xputlaw nema xlitlawakan guerras lipekua xmakawankgo, chu asta xtachiki tiyat niku xtitaxtukgo. Cananeos xlakpuwankgo pi lakapala xkamalakgsputukgolh soldados xalak Israel nema xtasiya pi nitu xlitaxtukgo (Jueces 4:12, 13; 5:19).

¿Tuku natlawakgo Barac chu Débora? Komo xtamakgxtakgkgolh ksipi Tabor, tlan xkatlajakgolh soldados xalak Canaán, xlakata xputlawkan kajwatiya tlan an niku kaxtum. Pero Barac xʼama katalachipa chuna la Jehová nawani, wa xlakata kgalhkgalhilh pi Débora nawani tuku natlawa. Chalh kilhtamaku. Débora wanilh: «Kataki, xlakata uma kilhtamaku Jehová xlikana namakamaxkiyan Sísara. ¿Ni wa Jehová tiku pulaliman?» Chu chuna tlawalh Barac. Taktacha ksipi Tabor chu 10,000 kxsoldados (Jueces 4:14). *

Soldados xalak Israel lakapala taktakgolh chu chankgolh niku natalachipanankgo, kxakaxtum, lakapala kalakgchankgolh niku wilakgolh lu laklipekwa putlaw nema litlawakan guerra. ¿Xʼama kamakgtaya Jehová? ¿Kgantaxtulh chuna la xwanit Débora? Takgalhtin ni makgapalalh chuna la wan Biblia: «Tachikilh tiyat, kʼakgapun na taktalh chuchut». Laktlankajwa ksoldados Sísara ni xkatsikgo tuku natlawakgo akxni milh lankasen. Lu lhuwa senalh chu uma tlawalh pi niku xwilakgolh xlitatsamalh chuchut. Kaj lakapala, umakgolh laktsinka putlaw nialhtu litaxtukgolh. Lakgtsankgakgolh kaputlunin chu nialhla katamakxtuka (Jueces 4:14, 15; 5:4).

Chu Barac chu ksoldados ni kuentajtlawanikgolh sen. Xkatsikgo pi wa Jehová tiku xmalakgachanit sen. Wa xlakata tsukukgolh kamakgnikgo soldados xalak Canaán. Xlakata Dios xkamalakgachanit, putum kamakgnikgolh. Kgalhtuchokgo Cisón lu stakli chu litatsamalh chuchut kxakaxtum, kalilh tiku xnikgonit asta kmar Grande (Jueces 4:16; 5:21).

Chuna la lichuwinalh Débora, Jehová makgtayalh xkachikin chu katlajakgolh ksoldados Sísara

La uku, Jehová nialh kamalakgacha kskujnin xlakata natlawakgo guerra. Pero lakaskin pi ni mastayaw talakaskin nasputa kintakanajlakan, akgtum guerra xaʼespiritual (Mateo 26:52; 2 Corintios 10:4). Akxni kgalhakgaxmataw Dios limasiyayaw tiku tatayayaw kʼuma guerra. Ni nakapekuaniyaw xtalatlawananin Dios max lu nitlan nakinkalikatsinikgoyan. Pero, Jehová nitu talakgpalima chu chuntiya kamakgtaya tiku lipawankgo, chuna la Débora, Barac chu soldados xalak Israel tiku ni xpekuankgo.

«TLAKG NASIKULUNATLAWAKAN XLIPUTUM LAKPUSKATIN»

Pero... ¡chatum talatlawana, tiku tlakg nitlan likatsi, tsalanit! Sísara, tiku tlakg makgapatinalh kxkachikin Dios, tsalalh. Kaʼakgxtakgwililh ksoldados anta kkaputlunin, kalakgstipataxtulh soldados xalak Israel chu chalh niku xakaskakni. Lhuwa kilómetros kgosnalh xlakata xtatsekgli niku xwilakgo tiku xtatayakgo. Lu xpekuanit xlakata xlakpuwan pi israelitas xtekgskgolh, alh kxchik Héber, chatum quenita tiku xmakgxtakgnit xkachikin xlakata xlatamalh tlakg ksur kachikin chu xtalakkaxlanit mapakgsina Jabín xlakata ni natalachipa (Jueces 4:11, 17).

 Sísara lu xtlakgwanit akxni chalh kxchik Héber chu niti xwi; pero Jael, xpuskat Héber, wa tiku makgamakglhtinalh. Sísara xlakpuwan pi xpuskat xʼama kgalhakgaxmata talakkaxlan nema xchixku xtatlawanit mapakgsina Jabín. Max nipara tsinu lakpuwa pi chatum puskat nichuna xʼama lakpuwan la xchixku. ¡Lu xtaʼakgskgawinit! Xlikana, Jael xkatsi pi nitlan xlikatsikgo cananeos chu nitlan xkalikatsinikgo latamanin. Wa xlakata xlilaksakat xwanit tuku xʼama tlawa: tlan xmakgtayalh uma chixku tiku lixkajni xlikatsi o tlan xtatayalh Jehová chu xmasputulh xtalatlawana xkachikin Dios. Pero ¿la tlan xtlajalh chatum puskat soldado tiku lu tliwakga chu katsini talachipanan?

Jael ni xlimakgapalat xwanit, wa xlakata wanilh Sísara pi xtanulh kxchik. Sísara limapakgsilh pi niti xwanilh pi anta xtatsekgnit komo wi tiku xkgalhskininalh. Wa xlakata, Sísara tamalh chu wi tuku limakgtlapalh Jael. Akxni skinilh chuchut, Jael maxkilh xatsitsi leche. Uma chixku lakapala aklhtatatamalh. Akxni lhtatalh, Jael tiyalh xatakankalhpitni kiwi chu akgtum martillo, pulaktiy tuku chatum puskat tiku xtalakxilhtilhakgo, liwana xkatsini maklakaskin. Lakatsuku lakgtalakatsuwilh uma xtalakaskin pi ni xpekualh: xmakgnilh xtalatlawana Jehová. Nitlan tuku xkitaxtulh komo ni lakapala chuna xtlawalh. ¿Chuna tlawalh xlakata lakapastakli xkachikin Dios, nema akglhuwa kata xpatinamakgolh xlakata uma chixku lixkajni xkalikatsini? ¿O chuna tlawalh xlakata tatayaputulh Jehová? Biblia ni wan. Kajwatiya katsiyaw pi lakapala makgnilh Sísara (Jueces 4:18-21; 5:24-27).

Kaj lipuntsu chilh Barac xlakata kstalanima xtalatlawana. Akxni Jael masiyalh niku xma Sísara chu xlakgxtitanuma kiwi, tunkun katsilh pi tuku xwanit Débora xkgantaxtunit. ¡Chatum puskat makgatlajalh xatliwakga Sísara! Lhuwa tiku ni kanajlakgo wankgo pi nitlan tuku tlawalh Jael, pero Barac chu Débora, lu tlan akxilhkgolh tuku tlawalh. Ktakilhtlin nema kamatlawilh Dios, wa pi «tlakg nasikulunatlawakan xliputum lakpuskatin» xlakata ni pekualh (Jueces 4:22; 5:24). Xlikana, Débora ni lakgsitsilh xlakata malankika Jael, xlakata Débora lu xlakaskinka xʼakxilha pi xkgantaxtulh xtachuwin Jehová.

Akxni nilh xapuxku ksoldados, mapakgsina Jabín nialh lu tliwakga wa. ¡Ksputnita la xʼakgchipanankgo tiku xalak Canaán! Israel tlan tawilakgolh tipuxum kata (Jueces 4:24; 5:31). Xlikana pi xtakanajla Débora, Barac chu Jael kalisikulunatlawaka. Chuna la Débora, ni kapekuaw, katatayaw Dios chu kakamakgpuwantiniw amakgapitsin nachuna natlawakgo. Komo chuna natlawayaw, Jehová nakinkamakgtayayan xlakata natlajananaw chu nakgalhiyaw takaksni xliputum kilhtamaku.

^ párr. 7 Amakgapitsi tiku na palakachuwinanin xwankgonit wa Míriam, Huldá chu xpuskat Isaías (Éxodo 15:20; 2 Reyes 22:14; Isaías 8:3).

^ párr. 9 Xtatlin Débora masiya pi akxni xʼan tlawa guerra Sísara xlismaninit xkalimini laktsuman kxsoldados. Lakgachunin, chatunu chalhuwa xkamaxki (Jueces 5:30). Ktatlin nema tlawalh limaklakaskin tachuwin kxaʼhebreo matriz, nema kilhchanima «tsumat». Uma tachuwin limasiya pi lakpuskatin xlakaskinka xkaʼakxilhkan kaj xlakata xkgalhikgolh kamanan. Max xtalismani pi lhuwa tiku xkalikgamanankan.

^ párr. 17 Xlakata uma talachipat makgtiy talichuwinan kBiblia. Kcapítulo 4 xla Jueces talichuwinan tuku lalh, chu kcapítulo 5 min xtatlin Débora chu Barac. Uma lamakgatsi, xlakata pulaktum lichuwinan tuku ni lichuwinan apulaktu.