Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Julio kata 2015

¿Xkatsiyata?

¿Xkatsiyata?

¿La xwankgonit molinos nema xʼanan kxchikkan latamanin xalamakgasa?

Kxchikkan tiku kalichuwinan Biblia xkgalhikgo molino nema amakan xlilakgswakgakan harina. Wa lakpuskatin o skujnin tiku xmaxtukgo harina chali chali. Xtakgaxmata la xmakaksanan molinos akxni xlakgswakganankan chali chali (Éxodo 11:5; Jeremías 25:10).

Tekgskanit dibujos chu muñecos nema xʼanan kxamakgan kʼEgipto limasiya la xtaliskuja uma molino. Akgtiy chiwix xtalakaskin: akgtum tsinu puxmunkgolo chu akgtum tlakg aktsu xwanit nema xlilakgswakganankan. Skujni xtatsokgosta kxlakatin xalanka chiwix chu makgatiy xchipa tlakg xaktsu chiwix. Alistalh, tliwakga xlitamakata, chu kswakganan. Chuna la wan maktum libro, tlakg xaktsu chiwix xtsinkan akgtiy asta akgtati kilo. Komo wi tiku xakwilika, tlan xmakgnilh (Jueces 9:50-54).

Molinos lu xmakgtayanan xlakata familias xkgalhikgolh tuku nawakgo. Wa xlakata, Biblia wan: «Nila tiku natiya molino nema amakan maklakaskinkan chu nipara xmakan, xlakata xtachuna la kaj makglhtima xlatamat» (Deuteronomio 24:6).

¿Tuku xwamputun Jesucristo akxni wa pi xwi kxpaxtun xaTlat?

Biblia wan pi Jesucristo wi «kxpaxtun» xaTlat (Juan 1:18). Uma tachuwin kilhchanima pi Jesús lu tlan talalin xTlat. Kxkilhtsukut uma talismanin kaj paxtuta xtamakan akxni xwayankan.

Kxkilhtamaku Jesús, judíos paxtuta xtamakgo xlakata nawakgo tuku xwilikanit, xlistilikgo mesa nema kgalhtutsu. Chatunu tiku xʼama wayan paxtuta xtama kxlakatin mesa, chu xtantunkan ni niku xmajaxakgo, chu makglhtsankan xapakgaxwiki xmajaxajakgo kʼakgtum cojín. Akxni chuna xtamakgo xpakgastakatkan tlan tuku xlitlawakgo. Maktum libro wan: «Akxni chuna tamakan, xakgxakga chatum chixku lakatsu xtawila kxkuxmun achatum xalak xpakgxwiki». Wa xlakata xwankan pi chatum lataman «xwi kxpaxtun» achatum.

Natawilaya niku kxpaxtun tiku pulalin akgtum familia o xmalana chiki tiku paskuajnama lanka talakgalhaman. Wa xlakata, kxʼawatiya taway nema katatlawalh Jesús kstalaninanin, wantiku xpaxtun xwi wa apóstol Juan, «xlimakgalhtawakgat nti luwa xpaxkiy Jesús». Wan Biblia pi Juan paxtuta tamalh «kxkuxmun Jesús» xlakata natlawani akgtum takgalhskinin (Juan 13:23-25; 21:20).