Ankan kxpulakni

Ankan kliputsan

Xtatayananin Jehová

Laksakkan tachuwin totonaco

¿Tlan namakgapaxuwayaw Dios?

¿Tlan namakgapaxuwayaw Dios?

¿Kalakgapasa tiku wilakgolh kdibujo? Anta kBiblia tlan kalichuwinankan. ¿Lakpuwana pi nikxni chuna nawankan minpalakata? Max nalakpuwana: «Akit makglakgalhina chu nila putum kilhtamaku ktlawa tuku xaʼakgstitum».

Job «tiku ni lilatamay tuku nitlan, xalakatitum». (Job 1:1)

Anta kBiblia lichuwinankan Job chatum chixku «tiku ni lilatamay tuku nitlan, xalakatitum» (Job 1:1). Chu Lot talichuwinan pi «akgstitum chixku» (2 Pedro 2:8). Chu David, xtlawa «tuku xaʼakgstitum» kxlakatin Dios (1 Reyes 14:8). ¿La akxilha komo nalichuwinanaw xlakata xlatamatkan uma lakchixkuwin? Nakatsiyaw pi na tlawakgolh tuku nitlan, xliʼakxilhtit nakinkamakgtayayan xlakata tlan namakgapaxuwayaw Dios maski makglakgalhinanin akinin.

TLAWAKGOLH TUKU NITLAN

Dios «na tilakgmaxtulh xaʼakgstitum chixku Lot nti xlimatlakgwanikgonitta kxkajwa latamatkan nkalawaj chixkuwin». (2 Pedro 2:7, Hua Xasasti Talaccaxlan, 1999)

Job lhuwa tuku nitlan titaxtulh chu lakpuwa pi Dios ni xlakaskinka xʼakxilha komo xkgalhakgaxmatli o ni xkgalhakgaxmatli, chu nitlan la xlakpuwan (Job 9:20-22). Nachuna, Job xlakpuwan pi xla lu tlan xlikatsi. Asta tiku xkgaxmatnikgo xlakpuwankgo pi Job xmakgkatsi pi tlakg xaʼakgstitum xwanit nixawa Dios (Job 32:1, 2; 35:1, 2).

Lot ni liwana xkatsi komo nakgalhakgaxmata  tuku lakatanks xlimapakgsinit Dios. Tiku xlamakgolh kSodoma chu Gomorra lu lixkajni xtalakapastaknikan chu xtayatkan xwanit chu Lot nialh xtayani uma tayat. Uma xalixkajni tayat “xmakgatlakgaja” o nitlan xmamakgkatsini (2 Pedro 2:8). Dios wanilh pi xʼama kamasputu latamanin xalak uma kachikin chu komo xkalakgmaxtuputun xfamilia xtalakaskin pi xkatamakxtulh. Tunkun xlikgaxmatat xwanit; pero nichuna tlawalh, ni makgxtakgputulh xchik. Xaʼawatiya, ángeles nema Dios kamalakgachalh xlakata xlakgmaxtukgolh Lot chu xfamilia, kamakgachipakgolh chu katamakxtukgolh kʼuma kachikin (Génesis 19:15, 16).

David xputsalh Dios «xliputum xnaku, xtlawa tuku xaʼakgstitum». (1 Reyes 14:8)

David tlawalh tuku xmakgkatsi chu tatalakgxtumilh chatum puskat tiku xkgalhi xchixku. Pero ni kajwatiya uma tlawalh: mamakgnininalh xchixku xlakata ni xkatsilh (2 Samuel, capítulo 11). Biblia wan pi «tuku tlawalh David lu nitlan akxilhli Jehová» (2 Samuel 11:27).

Umakgolh kgalhtutu lakchixkuwin tlawakgolh tuku nitlan, makgapitsi lu nitlan tuku tlawakgolh. Pero, chuna la naʼakxilhaw, xlakan lu xlikana xkgalhakgaxmatputunkgo Dios. Limasiyakgolh pi xlikana nitlan xlimakgkatsikgo tuku xtlawakgonit chu xlakgpaliputunkgo xlatamatkan, chu wa tuku makgapaxuwalh Dios. Wa xlakata, maski tlawakgolh tuku nitlan, Biblia kalimapakuwi lakchixkuwin tiku kgalhikgolh takanajla.

LA KINKAMAKGTAYAYAN UMA XLIʼAKXILHTITKAN

Liwana tasiya pi putum tlawayaw tuku nitlan (Romanos 3:23). Tuku tlan natlawayaw wa pi namakgxtakgaw kintalakgalhinkan chu naliskujaw xlakata tlan nakinkaʼakxilhan Dios.

 ¿La tlawakgolh Job, Lot chu David xlakata Dios tlan xkaʼakxilhpa? Job tiku xkgalhi tlan naku, litayalh pi nitlan tuku xwanit chu lakgpalilh la xlakpuwan (Job 42:6). Lot, nachuna xʼakxilha la Dios, tuku xalixkajni xʼanan kSodoma chu Gomorra. Wa tuku nitlan tlawalh wa pi ni xmakgxtakgputun xchik. Pero alistalh kgalhakgaxmatnalh. Taxtulh kʼuma kachikin chu nipara lakgtalakgaspitli tuku xmakgxtakgma. Maski David lakatsalalh xlimapakgsin Dios, limasiyalh pi tlan naku xkgalhi: nitlan limakgkatsilh tuku xtlawanit chu tasaskinilh Dios pi xtapatilh (Salmo 51).

Dios katsi pi akinin makglakgalhinanin. Wa xlakata, tuku nitlan tlawakgolh uma lakchixkuwin ni lakgpalilh la xkaʼakxilha Dios. Xla ni kinkaskiniyan tuku nila tlawayaw xlakata «katsi tuku litsukunitaw y nitu kinkgasatkan, katsi xlakata ankin pokgxni» (Salmo 103:14). Wa xlakata, ¿tuku lakaskin natlawayaw?

Dios «katsi tuku litsukunitaw y nitu kinkgasatkan, katsi xlakata ankin pokgxni». (Salmo 103:14)

¿TLAN NAMAKGAPAXUWAYAW DIOS?

Xtakgalhtin tekgsaw kxtachuwin David nema wanilh xkgawasa: «Chu wix, Salomón, kinkgawasa, kalakgapasti xDios mintlat chu kaskujni xliputum minaku» (1 Crónicas 28:9). ¿Chu tuku wamputun naskujniyaw Dios xliputum kinakujkan? Wamputun pi napaxkiyaw chu lu nalakgapasputunaw chu namakgantaxtiyaw tuku kinkaskiniyan. Ni wamputun pi lu skulunku nawanaw. Tiku skujni Dios xliputum xnaku lu lakaskin pi kapulalilh chu masta talakaskin pi kastakyawalh. Xlakata chuna xlikatsi, Dios wa xlakata Job «tiku ni lilatamay tuku nitlan, xalakatitum», xlakata Lot «akgstitum chixku» chu xlakata David chatum chixku tiku xtlawa «tuku tlan». Maski tlawakgolh tuku nitlan, makgapaxuwakgolh Dios.

Skujnanikan Dios xliputum naku wamputun pi napaxkiyaw chu lu nalakgapasputunaw chu namakgantaxtiyaw tuku kinkaskiniyan

Komo natsukuyaw lakapastakaw tuku nitlan, nawanaw tuku limaxananaw o wi tuku natlawayaw chu alistalh naʼakxilhaw pi nitlan tuku tlawaw, ni kataxlajwaniw. Kalakapastakwi xliʼakxilhtitkan umakgolh kgalhtutu xlakskujnin Dios. Xla katsi pi putum akinin tlawayaw tuku nitlan. Pero lakaskin pi xliputum kinakujkan naskujnaniyaw, uma wamputun pi napaxkiyaw chu naliskujaw xlakata nakgalhakgaxmataw. Komo chuna natlawayaw, xla lu nalipaxuwa.